ബെംഗളൂരു: കഴിഞ്ഞ ഇരുപത് വര്‍ഷത്തിനുള്ളില്‍ രാജ്യത്തെ ബഹിരാകാശ ഏജന്‍സി ഐഎസ്ആര്‍ഒ വിജയകരമായി പൂര്‍ത്തിയാക്കിയത് മുന്നൂറിലധികം ഉപഗ്രഹ വിക്ഷേപണ ദൗത്യങ്ങള്‍. 1999 മെയ് 26 മുതല്‍ 33 രാജ്യങ്ങളില്‍ നിന്നായി 310ഓളം ഉപഗ്രഹങ്ങളാണ് ഐഎസ്ആര്‍ഒ ഇതുവരെ ഭ്രമണപഥത്തിലത്തിച്ചത്.
കഴിഞ്ഞ ദിവസം ഇന്ത്യ തദ്ദേശീയമായി വികസിപ്പിച്ചെടുത്ത ഭൗമ നിരീക്ഷണ ഉപഗ്രഹം കാര്‍ട്ടോസാറ്റ്-മൂന്ന് വിജയകരമായി വിക്ഷേപിച്ചു. ഇതിനൊപ്പം അമേരിക്കയില്‍ നിന്നുള്ള 13 ചെറിയ ഉപഗ്രഹങ്ങളെയും വഹിച്ചാണ് പിഎസ്എല്‍വി-സി47 ശ്രീഹരിക്കോട്ടയില്‍ നിന്ന് കുതിച്ചു പൊങ്ങിയത്. ചന്ദ്രയാന്‍ രണ്ടിലെ വിക്രമിന്റെ സോഫ്റ്റ് ലാന്‍ഡിങ് പരാജയപ്പെട്ടതിനു ശേഷമുള്ള ആദ്യ ഉപഗ്രഹ വിക്ഷേപണമായിരുന്നു കാര്‍ട്ടോസാറ്റ്-മൂന്നിന്റേത്.കാര്‍ട്ടോസാറ്റ്-മൂന്ന്, മറ്റ് പതിമൂന്ന് ഉപഗ്രഹങ്ങള്‍ എന്നിവ വിജയകരമായി വിക്ഷേപിച്ചതില്‍ ഐഎസ്ആര്‍ഒയെ പ്രധാനമന്ത്രി നരേന്ദ്ര മോദി അഭിനന്ദിച്ചു. അത്യാധുനിക സൗകര്യങ്ങളുള്ള കാര്‍ട്ടോസാറ്റ്-മൂന്ന് ഉയര്‍ന്ന വ്യക്തതയോടു കൂടിയ ചിത്രങ്ങള്‍ പകര്‍ത്തും. ഐഎസ്ആര്‍ഒ ഒരിക്കല്‍ കൂടി രാജ്യത്തിന്റെ അഭിമാനമായി മാറി, മോദി ട്വിറ്ററില്‍ കുറിച്ചു.
മൂന്നാം തലമുറ ഉപഗ്രഹങ്ങളില്‍ ആദ്യത്തേതും കാര്‍ട്ടോസാറ്റ് വിഭാഗത്തില്‍പ്പെട്ട ഒന്‍പതാമത്തെയും ഉപഗ്രഹമാണ് കാര്‍ട്ടോസാറ്റ്-മൂന്ന്. 1,625 കിലോ ഭാരം. പിഎസ്എല്‍വി ഉപയോഗിച്ച് വിജയിച്ച നാല്‍പ്പത്തേഴാമത്തെ വിക്ഷേപണമായിരുന്നു കാര്‍ട്ടോസാറ്റ്-മൂന്നിന്റേത്. 1994 ഒക്ടോബര്‍ പതിനഞ്ചിനായിരുന്നു ഇതുപയോഗിച്ചുള്ള ആദ്യ വിക്ഷേപണം. പിന്നീട് ചന്ദ്രയാന്‍, മംഗള്‍യാന്‍ തുടങ്ങി നിരവധി ചെറുതും വലുതുമായ വിക്ഷേപണങ്ങള്‍ പിഎസ്എല്‍വി വിജയകരമായി പൂര്‍ത്തിയാക്കി.
2019ലെ അഞ്ചാമത്തെ വിക്ഷേപണമായിരുന്നു കഴിഞ്ഞ ദിവസത്തേത്. ഇതിന് മുന്‍പ് ചന്ദ്രയാന്‍-രണ്ട് വിക്ഷേപിച്ചത് ജിഎസ്എല്‍വി മാര്‍ക്ക് മൂന്നിലായിരുന്നു. 2020 മാര്‍ച്ച് വരെ 13 ദൗത്യങ്ങളാണ് ഐഎസ്ആര്‍ഒയ്‌ക്ക് മുന്നിലുള്ളത്. കൈനിറയെ ദൗത്യങ്ങളുണ്ട്. ഐഎസ്ആര്‍ഒ സാഹചര്യത്തിനൊത്ത് ഉയരും, ചെയര്‍മാന്‍ കെ. ശിവന്‍ പറഞ്ഞു.
