വയനാട്: സുല്‍ത്താന്‍ ബത്തേരിയില്‍ പാമ്പുകടിയേറ്റ് മരണപ്പെട്ട ഷഹല ഷെറിന്റെ വിഷയത്തില്‍ സ്‌കൂളിനെതിരെ പ്രതികരിച്ച വിദ്യാര്‍ത്ഥിക്കും അച്ഛനും നേരെ ഭീഷണി. ബാലാവകാശ കമ്മീഷന്‍ പ്രതിനിധികള്‍ക്ക് മൊഴി നല്‍കിയ ശേഷമാണ് നാട്ടുകാരില്‍ കണ്ടാല്‍ തിരിച്ചറിയാവുന്ന ഏതാനും ചിലര്‍ ഷഹലയുടെ സഹപാഠിയായ വിസ്മയയ്‌ക്കും അച്ഛന്‍ രാജേഷിനുമെതിരെ ഭീഷണി മുഴക്കിയത്. വാര്‍ത്താമാദ്ധ്യമങ്ങളോട് വിസ്മയയും മറ്റ് കുട്ടികളും സംസാരിച്ചതും ഇവരെ ചൊടിപ്പിച്ചിട്ടുണ്ടെന്ന് രാജേഷ് പറയുന്നു. സ്‌കൂളിനെ തകര്‍ക്കാനാണ് ശ്രമിക്കുന്നതെന്നാണ് ഭീഷണിപ്പെടുത്തിയവര്‍ ആരോപിച്ചതെന്ന് രാജേഷ് പറയുന്നു.
‘മക്കളെ ഓരോന്ന് പറഞ്ഞ് പഠിപ്പിച്ച് സ്‌കൂളിനെ തകര്‍ക്കാനാണ് ശ്രമമെങ്കില്‍, ചാനലുകാര്‍ ഇന്നല്ലെങ്കില്‍ നാളെയങ്ങ് പോകും, നിങ്ങള്‍ അനുഭവിക്കും,’ എന്നാണ് രാജേഷിനെയും വിസ്മയേയും ഭീഷണിപ്പെടുത്തിയത്. തന്നെ ആരും ഇക്കാര്യങ്ങള്‍ പഠിപ്പിച്ച് വിട്ടതല്ലെന്നും ഷഹലയ്‌ക്കും കുടുംബത്തിനും വേണ്ടി താന്‍ ഇനിയും സംസാരിക്കുമെന്നും വിസ്മയയും രാജേഷും പറഞ്ഞു. താന്‍ പറഞ്ഞുകൊടുത്തിട്ടല്ല മകള്‍ മാധ്യമങ്ങളോട് സംസാരിച്ചതെന്ന് പറഞ്ഞ രാജേഷ്, മകളെ കുറിച്ച് അഭിമാനമേയുള്ളൂ എന്നും പറഞ്ഞു. അച്ഛനെ അപായപ്പെടുത്തുമോയെന്ന് പേടിയുണ്ടെന്ന ആശങ്കയും വിസ്മയ പങ്കുവയ്‌ക്കുന്നു. ഷഹലയുടെ മരണത്തോടെ വന്‍ പ്രതിഷേധമാണ് വിവിധ കേന്ദ്രങ്ങളില്‍ നിന്ന് ഉയര്‍ന്നത്.
അതേസമയം സര്‍വജന സ്‌കൂളില്‍ അദ്ധ്യയനം പുനരാരംഭിക്കുന്നതുമായി ബന്ധപ്പെട്ട തീരുമാനം ഇന്നുണ്ടാകും. വൈകീട്ട് 5 മണിക്ക് ബത്തേരി നഗരസഭ സര്‍വകക്ഷി യോഗം ചേരും. രാഷ്‌ട്രീയ പാര്‍ട്ടി പ്രതിനിധികള്‍, ജന പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുക്കും.
