തിരുവനന്തപുരം: മാവോയിസ്റ്റ് ബന്ധത്തില്‍ അറസ്റ്റിലായ സിപിഎം പ്രവര്‍ത്തകരായ അലന്‍ ഷുഹൈബ്, താഹ ഫസല്‍ എന്നിവര്‍ പങ്കെടുത്ത യോഗങ്ങളില്‍ പ്രചരിപ്പിച്ചിരുന്നത് ഇന്ത്യ വിരുദ്ധ നിലപാടുകള്‍. ഇതു സംബന്ധിച്ച വിവരങ്ങള്‍ സംസ്ഥാന പോലീസിനു കൈമാറിയത് കേന്ദ്ര രഹസ്യാന്വേഷണ ഏജന്‍സികള്‍. ഇരുവരും കൂടാതെ പോലീസിനെ കണ്ടു രക്ഷപെട്ട ഉസ്മാന്‍ അടക്കം മറ്റു ചിലരും ഇതില്‍ പങ്കാളികളാണ്. കശ്മീര്‍ അടക്കം വിഷയങ്ങളില്‍ തീവ്ര ഇന്ത്യ വിരുദ്ധ പ്രചാരണം ഇവര്‍ വിളിച്ചു ചേര്‍ത്ത യോഗങ്ങളില്‍ പ്രചരിപ്പിച്ചിരുന്നു. വയനാട്, എറണാകുളം, കോഴിക്കോട് ജില്ലകളിലായിരുന്നു ഇവര്‍ മാവോയിസ്റ്റ് ആശയ പ്രചാരണം എന്ന തരത്തില്‍ യോഗങ്ങള്‍ സംഘടിപ്പിച്ചതും തീവ്ര ഇന്ത്യ വിരുദ്ധ നിലപാടുകള്‍ സ്വീകരിച്ചതും. മാസങ്ങള്‍ക്കു മുന്‍പേ കേന്ദ്ര രഹസ്യാനേഷണ വിഭാഗം സംസ്ഥാന ഇന്റലിജന്‍സിന് ഇതു സംബന്ധിച്ച വിവരങ്ങള്‍ കൈമാറിയിരുന്നു. കശ്മീരിന്റെ പ്രത്യേക പദവി കേന്ദ്രസര്‍ക്കാര്‍ റദ്ദാക്കിയതിനു പിന്നാലെ ഇവര്‍ ഇന്ത്യ വിരുദ്ധ പ്രചാരണം സജീവമാക്കിയിരുന്നു. ഇസ്ലാമിക തീവ്രവാദ സംഘടനകളുമായും ഇവര്‍ക്ക് ബന്ധമുണ്ടെന്നും എത്രയും വേഗം യുഎപിഎ ചുമത്തി അറസ്റ്റ് ചെയ്യാനും കൂടുതല്‍ തെളിവുകള്‍ സ്വീകരിക്കാനും കേന്ദ്ര ഏജന്‍സി സംസ്ഥാന പോലീസിനോട് നിര്‍ദേശിക്കുകയായിരുന്നു. കേന്ദ്ര ആഭ്യന്തര വകുപ്പിന്റെ കര്‍ശന നിര്‍ദേശത്തെ തുടര്‍ന്നാണ് കടുത്ത സമ്മര്‍ദം ഉണ്ടായിട്ടും ഇവര്‍ക്കെതിരേ ചുമത്തിയ യുഎപിഎയില്‍ ഉറച്ചു നില്‍ക്കാന്‍ പോലീസ് നിര്‍ബന്ധിതമായത്. വിഷയം രാജ്യദ്രോഹമാണെന്നും സംസ്ഥാന സര്‍ക്കാര്‍ വിഷയത്തില്‍ ഇടപെടരുതെന്നും കേന്ദ്ര ആഭ്യന്തരമന്ത്രാലയം മുഖ്യമന്ത്രി പിണറായി വിജയനോടും നിര്‍ദേശിച്ചിരുന്നു. ഇവര്‍ക്കെതിരായ തെളിവുകളും കൈമാറി. ഇതോടെയാണു വിഷയത്തില്‍ മുഖ്യമന്ത്രിയും കര്‍ശന നിലപാട് സ്വീകരിച്ചത്.
ദിവസങ്ങള്‍ക്കു മുന്‍പ് ചേര്‍ന്ന സിപിഎം സംസ്ഥാന സെക്രട്ടേറിയറ്റ് യോഗത്തിലും വിഷയം ചര്‍ച്ചയ്‌ക്കു വന്നപ്പോള്‍ മുഖ്യമന്ത്രി ഇക്കാര്യം പാര്‍ട്ടിയെ അറിയിച്ചിരുന്നു. രാജ്യവിരുദ്ധ വിഷയമായതിനാല്‍ സംസ്ഥാന സര്‍ക്കാരിന് ഇടപെടാന്‍ ആകില്ലെന്നും ഏതെങ്കിലും തരത്തില്‍ സമ്മര്‍ദം ചെലുത്തിയാല്‍ കേന്ദ്ര ഏജന്‍സികള്‍ പിടിമുറുക്കുമെന്നും മുഖ്യമന്ത്രി വ്യക്തമാക്കി. ഇതോടെയാണു സിപിഎമ്മും വിഷയത്തില്‍ നിന്നു പിന്തിരിഞ്ഞത്. കോഴിക്കോട് സിപിഎം ജില്ല സെക്രട്ടറി മോഹനന്‍ അടക്കം ഇന്ന് മാവോയിസ്റ്റുകള്‍ക്ക് മുസ്ലിം തീവ്രവാദികളുമായ ബന്ധമുണ്ടെന്ന് തുറന്നു പറഞ്ഞിരുന്നു. സംസ്ഥാന ആഭ്യന്തര വകുപ്പിന് ലഭിച്ച തെളിവുകളുടെ അടിസ്ഥാനത്തിലാണ് ഇക്കാര്യം സിപിഎം നേതാക്കളും വ്യക്തമാക്കുന്നത്. വരും ദിവസങ്ങള്‍ കേസില്‍ കൂടുതല്‍ അറസ്റ്റിനു സാധ്യയുണ്ടെന്നാണ് പോലീസ് വൃത്തങ്ങള്‍ നല്‍കുന്ന സൂചന.
അതേസമയം, മാവോയിസ്റ്റ് ബന്ധത്തെ തുടര്‍ന്ന് അറസ്റ്റിലായ അലനും, താഹയ്‌ക്കുമൊപ്പമുണ്ടായിരുന്ന മൂന്നാമന്‍ ഉസ്മാനെതിരേയും യുഎപിഎ ചുമത്തിയിട്ടുണ്ട്. അലനേയും, താഹയേയും പിടികൂടിയെങ്കിലും ഉസ്മാനു വേണ്ടി തെരച്ചില്‍ നടത്തിയെങ്കിലും കണ്ടെത്താനായില്ല. ഇതിനെ തുടര്‍ന്ന് അന്വേഷണം വ്യാപകമാക്കുന്നതിനായാണ് പോലീസ് ഉസ്മാനെതിരേയും യുഎപിഎ ചുമത്തിയത്. അലനെയും താഹയെയും ചോദ്യം ചെയ്തപ്പോള്‍ ഉസ്മാനെ സംബന്ധിച്ചുള്ള വിവരങ്ങള്‍ പോലീസിന് ലഭിച്ചിരുന്നു. കൂടാതെ ഇരുവരും നഗര മാവോയിസ്റ്റുകളാണെന്ന് ചോദ്യം ചെയ്യലില്‍ സമ്മതിക്കുകയും ചെയ്തു.
