സന്നിധാനം: മണ്ഡലകാലത്ത് ശബരിമലയിലെത്തുന്ന അയ്യപ്പ ഭക്തരെ സ്വാമി എന്ന് തന്നെ അഭിസംബോധന ചെയ്യണമെന്ന് ശബരിമലയിലെ സുരക്ഷാ ചുമതലയുള്ള എഐജി രാഹുല് ആര്. നായരുടെ നിര്ദ്ദേശം. തീര്ത്ഥാടനം തുടങ്ങുന്നതിന് മുന്നോടിയായി വിളിച്ച പോലീസ് ഉദ്യോഗസ്ഥരുടെ യോഗത്തിലാണ് എഐജിയുടെ നിര്ദ്ദേശം. ശരണം വിളിയോടെയാണ് യോഗം ആരംഭിച്ചത്.
അയ്യപ്പ സന്നിധിയിലെത്തുന്ന ഭക്തരെ സ്വാമി എന്ന് വിളിക്കേണ്ടെന്ന നിലപാട് കഴിഞ്ഞ മണ്ഡല-മകരവിളക്ക് കാലത്ത് യുവതീ പ്രവേശന വിഷയത്തോടൊപ്പം സംഘര്ഷഭരിതമായ വിഷയമായിരുന്നു. ശബരിമലയില് യുവതികളെ ഇപ്പോള് പ്രവേശിപ്പിക്കേണ്ടെന്ന് സര്ക്കാരിന് നിയമോപദേശം ലഭിച്ചതിനാല് സര്ക്കാരും പോലീസും ഇത്തവണ അതിന് മുതിരില്ല. യുവതികള് എത്തിയാല് പമ്പയില് തടയണമെന്ന് പോലീസിന് നിര്ദ്ദേശവും ലഭിച്ചിട്ടുണ്ട്.
മണ്ഡലമകരവിളക്ക് പൂജകള്ക്കായി ഇന്ന് വൈകുന്നേരമാണ് ശബരിമല നടതുറക്കുന്നത്. വൈകുന്നേരം അഞ്ച് മണിയ്ക്ക് തന്ത്രി കണ്ഠരര് മഹേഷ് മോഹനരുടെ മുഖ്യകാര്മ്മികത്വത്തില്മേല്ശാന്തി നടതുറക്കും. പുതിയ മേല്ശാന്തിമാരുടെ സ്ഥാനാരോഹണ ചടങ്ങുകള് മാത്രമാണ് ഇന്ന് നടക്കുക.
