തിരുവനന്തപുരം : ശബരിമലയില് സുപ്രീംകോടതി ഉത്തരവ് ഉണ്ടാകുന്നതുവരെ യുവതികളെ പ്രവേശിപ്പിക്കേണ്ടെന്ന് തീരുമാനിച്ചതില് മുഖ്യമന്ത്രി പിണറായി വിജയനെ രൂക്ഷമായി വിമര്ശിച്ച് നവോത്ഥാന സംരക്ഷണ സമിതി ജനറല് സെക്രട്ടറി പുന്നല ശ്രീകുമാര്. സംസ്ഥാനത്തെ നവോത്ഥാന ചിന്താഗതികള്ക്ക് തിരിച്ചടിയാണ് പിണറായി സര്ക്കാരിന്റെ ഈ തീരുമാനമെന്നും കുറ്റപ്പെടുത്തി.
2007 ല് വി.എസ്. അച്ച്യുതാനന്ദന് സര്ക്കാറും പിണറായി സര്ക്കാരും സുപ്രീംകോടതിയില് നല്കിയ സത്യവാങ്മൂലത്തില് യുവതീ പ്രവേശനത്തെ അനുകൂലിക്കുന്ന നിലപാടാണ് ഉള്ളത്. അത്തരം ഒരു നിലപാടെടുത്ത രാഷ്ട്രീയ നേതൃത്വമാണ് തല്ക്കാലം യുവതികളെ ശബരിമലയില് കയറ്റേണ്ടതില്ലെന്ന നിലപാട് മാറ്റത്തിലേക്ക് എത്തുന്നത്. നവോത്ഥാന മുന്നേറ്റങ്ങളെ ദുര്ബലപ്പെടുത്തുന്നതാണ് ഇത്തരം തീരുമാനങ്ങള്.
രാജാവിനേക്കാള് വലിയ രാജഭക്തിയാണ് ശബരിമല യുവതീ പ്രവേശന വിഷയത്തില് പിണറായി വിജയന് സര്ക്കാരിനെന്നും പുന്നല ശ്രീകുമാര് തുറന്നടിച്ചു. പരിഷ്കരണ ആശയങ്ങളെ പുറകോട്ട് വലിക്കുന്നതാണ് ഇത്തരം തീരുമാനങ്ങള്. വിഷയത്തില് സര്ക്കാറും സിപിഎം അടക്കം സംഘടനാ നേതൃത്വവും നിലപാട് വ്യക്തമാക്കാന് തയ്യാറാകണമെന്നും അദ്ദേഹം പറഞ്ഞു.
യുവതീ പ്രവേശന വിധി ഏഴംഗ ഭരണഘടനാ ബെഞ്ചിന് വിടുകയും പഴയ വിധി സ്റ്റേ ചെയ്യാത്ത സാഹചര്യത്തില് ഹര്ജികളില് തീരുമാനം വരും വരെ യുവതീ പ്രവേശനം വേണ്ടെന്നാണ് സര്ക്കാരിന്റേയും സിപിഎമ്മിന്റേയും നിലപാട് ഇതിനെതിരെയാണ് പുന്നലയുടെ പ്രതികരണം.
