കൊച്ചി: ശബരിമല വിഷയത്തില്‍ സുപ്രീം കോടതിയില്‍ കൊടുത്തിട്ടുള്ള പുഃനപരിശോധന ഹര്‍ജികളില്‍ നാളെ സുപ്രീംകോടതിയുടെ വിധി വരാനിരിക്കെ അയ്യപ്പഭക്തര്‍ക്ക് നിര്‍ദേശവുമായി ശബരിമല കര്‍മ്മ സമിതി. ഹര്‍ജികളില്‍ വാദം കേട്ട അഞ്ചംഗ ഭരണഘടനാ ബെഞ്ചിന്റെ വിധിയെ സംബന്ധിച്ച് വളരെയധികം തെറ്റായ വാര്‍ത്തകള്‍ പ്രചരിപ്പിക്കുന്നുണ്ട്. നമ്മള്‍ ഈ വിഷയത്തില്‍ അയോദ്ധ്യ വിധിയുടെ സമയത്ത് എടുത്തതുപോലെ സംയമനം പാലിക്കുകയും ഊഹാപോഹങ്ങള്‍ പ്രചരിപ്പിക്കാതിരിക്കുകയുമാണ് ചെയ്യേണ്ടത്. കിംവദന്തികളില്‍ വശംവദരാകാതെ വിധി ദിവസം പ്രാര്‍ത്ഥനാനിരതരായിരിക്കണമെന്നും ശബരിമല കര്‍മ്മ സമിതി ആവശ്യപ്പെട്ടു.
ശബരിമല യുവതി പ്രവേശന ഉത്തരവിന് എതിരെ സമര്‍പ്പിച്ച പുനഃപരിശോധന ഹര്‍ജികളിലെ വിധി സുപ്രീംകോടതി നാളെയാണ് പ്രഖ്യാപിക്കുന്നത്. ചീഫ് ജസ്റ്റിസ് രഞ്ജന്‍ ഗോഗോയ് അധ്യക്ഷനായ മറ്റൊരു ഭരണഘടന ബെഞ്ചാണ് അന്തിമവിധി പ്രഖ്യാപിക്കുക. വിധി പറയുന്നതിനായി അസമിലായിരുന്ന ചീഫ് ജസ്റ്റിസ് രഞ്ജന്‍ ഗോഗോയും, നിയുക്ത ചീഫ് ജസ്റ്റിസ് എസ് എ ബോബ്ഡെയും ഡല്‍ഹിയില്‍ മടങ്ങി എത്തിയിട്ടുണ്ട്. ഗുരു നാനാക്ക് ജയന്തിയുടെ അവധിക്ക് ശേഷം ഇനി കോടതി തുറന്നത് ഇന്നായിരുരുന്നു.
അതേസമയം, അയോധ്യയില്‍ രാമക്ഷേത്രം നിര്‍മിക്കണമെന്ന സുപ്രീം കോടതി വിധി ശബരിമല യുവതീ പ്രവേശന വിഷയത്തില്‍ നിര്‍ണായകമാകുമെന്ന് നിയമവൃത്തങ്ങള്‍ പറയുന്നത്. വിശ്വാസത്തെ പിന്തുണച്ചുള്ള വിധിയിലെ പരാമര്‍ശങ്ങളാണ് ഇത്തരമൊരു ചര്‍ച്ചയ്‌ക്ക് തുടക്കമിട്ടിരിക്കുന്നത്. ഭരണഘടന അനുശാസിക്കുന്ന തരത്തില്‍ പ്രവര്‍ത്തിക്കുന്ന മതേതര സ്ഥാപനമാണ് കോടതിയെങ്കിലും വിശ്വാസത്തെ ചോദ്യം ചെയ്യുന്നതില്‍ നിന്നും വ്യാഖ്യാനങ്ങളില്‍നിന്നും വിട്ടുനില്‍ക്കണമെന്ന് അയോധ്യ വിധിന്യായത്തില്‍ അഞ്ചംഗ ഭരണഘടനാ ബെഞ്ച് ചൂണ്ടിക്കാട്ടുന്നു. ഭരണഘടനയുടെ ഇരുപത്തിയഞ്ചാം അനുച്ഛേദം തകര്‍ക്കുന്നത് അപകടകരമാണ്, വിധി വിശദീകരിക്കുന്നു.
2018 സപ്തംബര്‍ 28നാണ് ശബരിമലയില്‍ യുവതീ പ്രവേശനത്തിന് സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് വിധിച്ചത്. ഇതിന്റെ പുനഃപരിശോധനാ ഹര്‍ജിയില്‍ ഏതാനും ദിവസത്തിനുള്ളില്‍ സുപ്രീം കോടതി വിധി പറയാനിരിക്കുകയാണ്. അയോധ്യ കേസില്‍ വിധി പറഞ്ഞ ഭരണഘടനാ ബെഞ്ചിലുണ്ടാായിരുന്ന ചീഫ് ജസ്റ്റിസ് രഞ്ജന്‍ ഗൊഗോയിയും ജസ്റ്റിസ് ഡി.വൈ. ചന്ദ്രചൂഡും പുനഃപരിശോധനാ ഹര്‍ജികള്‍ പരിഗണിക്കുന്ന ബെഞ്ചിലും അംഗങ്ങളാണ്. അയോധ്യയിലെ വിശ്വാസ അനുകൂല നിലപാട് ശബരിമലയില്‍ പ്രതിഫലിക്കുമോയെന്ന ആകാംക്ഷയിലാണ് നിയമ ലോകം.
