തിരുവനന്തപുരം: മാവോയിസ്റ്റുകള്ക്കെതിരെ സ്വീകരിക്കുന്ന കടുത്ത നടപടികളെ അനുകൂലിച്ച് റസിഡന്റ് എഡിറ്റര് കെ.കുഞ്ഞിക്കണ്ണന് ജന്മഭൂമിയില് എഴുതിയ ‘പിണറായിക്ക് ബിഗ് സല്യൂട്ട്’ എന്ന് ലേഖനത്തെ വിമര്ശിച്ച് പ്രതിപക്ഷ നേതാവ് രമേശ് ചെന്നിത്തല. യുഎപിഎയുടേയും മാവോയിസ്റ്റ് വേട്ടയുടേയും കാര്യത്തില് മോദി – ഷാ നേതൃത്വം എന്താഗ്രഹിച്ചുവോ അക്കാര്യം പിണറായി അക്ഷരംപ്രതി നടപ്പാക്കുന്നുവെന്നാണ് ബിജെപി പത്രം സൂചിപ്പിക്കുന്നതെന്ന് ചെന്നിത്തലയുടെ വിമര്ശനം. ‘അമിത്ഷായുടേയും പിണറായി വിജയന്റേയും ശബ്ദം ഒന്നാകുമ്പോള്’ എന്ന പ്രസ്താവനയിലാണ് ലേഖനത്തിനെതിരെ വിമര്ശനം ഉന്നയിച്ചിരിക്കുന്നത്.
സിപിഎം – ബിജെപി അന്തര്ധാരയുടെ പരസ്യമായ അംഗീകാരമാണ് സംഘപരിവാരം നല്കിയ ബിഗ് സല്യൂട്ട്. അമിത്ഷായുടെ ന്യൂനപക്ഷ വേട്ടയ്ക്ക് പിണറായി കുട പിടിക്കുന്നു എന്നതിനുള്ള ഉദാഹരണമാണ് ലേഖനം. നാഴികയ്ക്ക് നാല്പത് വട്ടം സംഘപരിവാറിനെ എതിര്ക്കാന് തങ്ങള് മാത്രമേ ഉള്ളൂ എന്ന് അവകാശപ്പെടുന്ന മുഖ്യമന്ത്രി പിണറായി വിജയന് ബിഗ് സല്യൂട്ട് നല്കി. മുഖ്യമന്ത്രി പിണറായി വിജയന് എടുക്കുന്ന പല നിലപാടുകളും ബിജെപിയുടെ വളര്ച്ചയ്ക്ക് സഹായകരമാണ്. കോണ്ഗ്രസ്സ് വിമുക്ത ഭാരതം എന്ന ബിജെപിയുടെ ലക്ഷ്യത്തോട് ചേര്ന്ന് നില്ക്കുന്നത് കൊണ്ടാണ് സംഘ പരിവാറിനും പിണറായി പ്രിയങ്കരനാകുന്നത്. രക്തസാക്ഷികളെയും സ്വന്തം പാര്ട്ടിയിലെ ബഹു ഭൂരിപക്ഷത്തെയും അന്ധകാരത്തില് നിര്ത്തിയാണ് പിണറായി തീക്കളി കളിക്കുന്നത്. സിപിഐയും സിപിഎമ്മിന്റെ ജനറല് സെക്രട്ടറിയും മുന്ജനറല് സെക്രട്ടറിയും നടത്തിയ അഭിപ്രായത്തെക്കാള് അമിത് ഷായുടെ അഭിപ്രായത്തിനാണ് പിണറായി വില കല്പ്പിക്കുന്നത് എങ്കില് അതിന് ആര്എസ്എസ് ബിഗ് സല്യൂട്ട് നല്കിയതില് അത്ഭുതപ്പെടാനില്ല, പ്രസ്താവനയില് പറയുന്നു. നരേന്ദ്രമോദിയുടെയും, അമിത് ഷായുടേയും പാത പിന്തുടരുന്നതിലൂടെ ഇടതുപക്ഷത്തേയും, കേരളത്തിന്റെ മതനിരപേക്ഷ മനസ്സിനേയുമാണ് പിണറായി ഒറ്റു കൊടുക്കുന്നതെന്നുമാണ് ചെന്നിത്തലയുടെ വിമര്ശനം.
പാലക്കാട് മഞ്ചിക്കണ്ടിയിലെ പോലീസ് വെടിവയ്പിനെയും കോഴിക്കോട് പന്തീരാങ്കാവിലെ സിപിഎം പ്രവര്ത്തകരായ മാവോയിസ്റ്റുകള്ക്കെതിരെ യുഎപിഎ ചുമത്തിയതിനെയും അനുകൂലിച്ചാണ് നവംബര് ഒമ്പതിന് മറുപുറം എന്ന പതിവുപംക്തിയില് കെ. കുഞ്ഞിക്കണ്ണന് എഴുതിയത്. മാവോയിസ്റ്റ് വിരുദ്ധ നിലപാടില് ഉറച്ചുനില്ക്കുന്നുവെങ്കില് പിണറായിക്കായി കരുതിവെക്കാം ഒരു ബിഗ് സല്യൂട്ട് എന്ന് അവസാനിക്കുന്ന ലേഖനത്തില് ചെന്നിത്തലയെ രൂക്ഷമായി വിമര്ശിച്ചിട്ടുമുണ്ട്.
