അബുദാബി: വീണ്ടു ഭാഗ്യപരീക്ഷണത്തില് വിജയിച്ച് മലയാളി സുഹൃത്തുകള്. അബുദാബി ഡ്യൂട്ടി ഫ്രീ ബിഗ് ടിക്കറ്റിലെ ഒന്നാം സമ്മാനം നേടി ചെങ്ങന്നൂര് സ്വദേശി ശ്രീനു ശ്രീധരന് നായരും 21 സുഹൃത്തുക്കളും. 28 കോടി രൂപയാണ് സമ്മാനത്തുക. ദുബായിലെ ജബല്അലി കോംബര്ഗന് ഷുബര്ത് കമ്പനിയില് ടെക്നിക്കല് ജീവനക്കാരാണ് ശ്രീനുവും സംഘവും. ബംബര് സമ്മാനം ലഭിച്ചത് ശ്രീനുവിനാണെങ്കിലും ഫോണില് ബന്ധപ്പെടാന് സാധിക്കാത്തതിനാല് ആരാണെന്നു വ്യക്തമായിരുന്നു. സംസ്ഥാന ഭാഗ്യക്കുറി വകുപ്പിന്റെ ഓണം ബംപര് കരുനാഗപ്പള്ളിയിലെ 6 ജ്വല്ലറി ജീവനക്കാരായ സുഹൃത്തുക്കള് ചേര്ന്നെടുത്ത ടിക്കറ്റിനായിരുന്നു. ഇതിനു പിന്നാലെയാണു മലയാളി സുഹൃത്തുക്കളുടെ കൂട്ടായ്മയ്ക്ക് വന്തുകയ്ക്കുള്ള ലോട്ടറി കൂടി അടിക്കുന്നത്.
സണ്ണി സ്റ്റാന്ലി, ഷിനോജ്, അഭിജിത് (കണ്ണൂര്), സബിന് (കോട്ടയം), ശ്രീനു, അനന്ദു (ആലപ്പുഴ), ഗിരീഷ്, സുജിത് (കാസര്കോട്), നിധിന്, സുമിന്, ശ്രീഹരി (തൃശൂര്), ഷിജു രമേഷ്, മാത്യു ജോസഫ്, (പത്തനംതിട്ട), ശ്രീജിത് (കോന്നി), എബിന് (ഹരിപ്പാട്), പ്രിന്സ്, വിഷ്ണു(തിരുവനന്തപുരം), അഖില് (എറണാകുളം), ജിനേഷ് (കോഴിക്കോട്), രമണ (ആന്ധ്രപ്രദേശ്), ഖലീല് (തമിഴ്നാട്) തുടങ്ങിയവര് 22.72 ദിര്ഹം വീതം പങ്കിട്ടാണ് ടിക്കറ്റെടുത്തത്.
എല്ലാവരുടെയും ഭാഗ്യമായി കരുതുന്നു. വാര്ത്തയറിഞ്ഞ് എല്ലാവരും എന്തു ചെയ്യണമെന്ന് അറിയാത്ത അവസ്ഥയിലാണെന്നും ശ്രീനു പറഞ്ഞു. സമ്മാന തുകകൊണ്ട് മുടങ്ങിക്കിടക്കുന്ന വീടുപണി പൂര്ത്തിയാക്കണമെന്നും ബാങ്കിലെ വായ്പ അടച്ച് തീര്ക്കണമെന്നുമാണ് ശ്രീനുവിന്റെ ആഗ്രഹം. ഏകദേശം 10,000 രുപ വിലയുള്ള ടിക്കറ്റിന്റെ സമ്മാനത്തുക തുല്യമായി വീതിക്കുമ്പോള് ഓരോരുത്തര്ക്കും ഒരു കോടി 33 ലക്ഷം രൂപക്ക് മേലെ ലഭിക്കും.
