തിരുവനന്തപുരം: കോഴിക്കോട്ട് പന്തീരാങ്കാവില് യുഎപിഎ ചുമത്തി രണ്ട് യുവാക്കളെ അറസ്റ്റ് ചെയ്ത സംഭവത്തില് നിഷ്പക്ഷമായ അന്വേഷണം വേണമെന്ന് സംസ്ഥാന പോലീസ് മേധാവി ലോക്നാഥ് ബെഹ്റ. അന്വേഷണം നടത്തി നടപടിയെടുക്കാന് ക്രമസമാധാനവിഭാഗം എഡിജിപിക്കും ഉത്തരമേഖലാ ഐജിക്കുമാണ് സംസ്ഥാന പോലീസ് മേധാവി നിര്ദ്ദേശം നല്കിയത്. മാവോയിസ്റ്റ് ബന്ധം ആരോപിച്ച് രണ്ട് യുവാക്കളെ യുഎപിഎ ചുമത്തി അറസ്റ്റ് ചെയ്ത സംഭവം വലിയ വിവാദമായതോടെയാണ് ഡിജിപിയുടെ ഇടപെടല്.
അറസ്റ്റുമായി ബന്ധപ്പെട്ട നടപടികളില് ഇപ്പോള് പ്രാഥമിക അന്വേഷണം മാത്രമാണ് നടന്നിട്ടുള്ളത്. സംഭവത്തിന്റെ എല്ലാവശവും തെളിവുകള് ശേഖരിച്ച് വിശദമായി അന്വേഷിച്ചശേഷം യുഎപിഎ ചുമത്തിയത് നിലനില്ക്കുമോയെന്ന് പരിശോധിക്കും. അതനുസരിച്ച് ആവശ്യമായ റിപ്പോര്ട്ട് കോടതിയില് സമര്പ്പിക്കുമെന്നും പോലീസ് ആസ്ഥാനത്ത് നിന്നിറക്കിയ വാര്ത്താ കുറിപ്പില് ഡിജിപി വിശദീകരിക്കുന്നു.
