കോഴിക്കോട്: മാവോയിസ്റ്റ് പ്രവര്ത്തനം നടത്തിയെന്നാരോപിച്ച് പന്തീരാങ്കാവില് നിന്ന് സിപിഎം പ്രവര്ത്തകരെ അറസ്റ്റ് ചെയ്ത് യുഎപിഎ ചുമത്തിയ നടപടിയില് വിശദീകരണം നിരത്തി പോലീസ്. പിടിയിലായവര് നഗര മാവോയിസ്റ്റുകളാണ്. ലഘുലേഖയോ നോട്ടീസോ കൈവശം വച്ചതിനോ വിതരണം ചെയ്തതിനോ മാത്രമല്ല അറസ്റ്റെന്നും യുഎപിഎ ചുമത്താവുന്ന വിധത്തില് ഇവരുടെ മാവോയിസ്റ്റ് ബന്ധത്തിന് വ്യക്തമായ തെളിവ് കയ്യിലുണ്ടെന്നും പോലീസ് വ്യക്തമാക്കി. അറസ്റ്റിലായ യുവാക്കളുടെ പ്രവര്ത്തനം നാളുകളായി നിരീക്ഷിച്ച് വരികയാണെന്നും പോലീസ് പറഞ്ഞു.
കാട്ടില് തോക്കേന്തി നടക്കുന്ന മാവോയിസ്റ്റുകളല്ല അറസ്റ്റിലായവര്. അര്ബന് നക്സലിസത്തേക്കാള് (നഗര മാവോയിസ്റ്റുകള്) തീവ്രതയേറിയ രീതിയില് ഇവരുടെ ആശയങ്ങള് നഗരത്തില് നടപ്പാക്കുകയും പ്രചരിപ്പിക്കുകയും ചെയ്യുന്നവരാണെന്നും പോലീസ് വ്യക്തമാക്കി. പിടിയില് നിന്ന് ഓടി രക്ഷപ്പെട്ട മൂന്നാമത്തെയാള് കോഴിക്കോട് സ്വദേശിയാണെന്നും ഇയാളെ കുറിച്ച് വ്യക്തമായ വിവരങ്ങള് തങ്ങളുടെ കൈവശമുണ്ടെന്നും പോലീസ് പറഞ്ഞു. ഇവര്ക്ക് പുറമേ നിരവധിപേര് നിരീക്ഷണത്തിലാണ്.
അതിനിടെ പന്തീരാങ്കാവില് സിപിഎം പ്രവര്ത്തകരായ യുവാക്കളെ യുഎപിഎ ചുമത്തി അറസ്റ്റ് ചെയ്തതിനെതിരെ സിപിഎം കോഴിക്കോട് സൗത്ത് ഏരിയാ കമ്മിറ്റി പ്രമേയം പാസാക്കി. ലഘുലേഖയോ നോട്ടീസോ കൈവശം വയ്ക്കുന്നത് യുഎപിഎ ചുമത്താവുന്നത്ര വലിയ കുറ്റമല്ലെന്നും അലനു നിയമസഹായം നല്കുമെന്നും സിപിഎം വ്യക്തമാക്കി.
