കൊച്ചി: പാലക്കാട് മെഡിക്കല് കോളേജിലെ എസ്എഫ്ഐ യൂണിയന് പരിപാടിയില് നടന് ബിനീഷ് ബാസ്റ്റിനെ വേദിയില് കയറ്റാതെ അപമാനിച്ച സംഭവത്തില് വിശദീകരണവുമായി സംവിധായകന് അനില് രാധാകൃഷ്ണ മേനോന്. ചാന്സ് ചോദിച്ചെത്തിയ നടനൊപ്പം വേദി പങ്കിടാന് കഴിയില്ലെന്ന് സംവിധായകന് അറിയിച്ചതിനെ തുടര്ന്ന് യൂണിയന് ചെയര്മാന് ബിനീഷിനെ വേദിയില് കയറ്റാതെ തടയുകയായിരുന്നു. ഇത് വിവാദമാവുകയും ഫെഫ്ക വിശദീകരണം തേടുകയും ചെയ്തതോടെയാണ് അനില് പ്രതികരണവുമായി രംഗത്ത് എത്തിയിരിക്കുന്നത്.
മെഡിക്കല് കോളേജിലെ പരിപാടിക്ക് അതിഥിയായെത്തിയ നടന് ബിനീഷ് ബാസ്റ്റിനൊപ്പം വേദി പങ്കിടാന് കഴിയില്ലെന്ന് മറ്റൊരു അതിഥിയായി എത്തിയ സംവിധായകന് അനില് രാധാകൃഷ്ണ മേനോന് പറഞ്ഞതാണ് വിവാദത്തിന് തിരികൊളുത്തിയത്. തന്റെ സിനിമയില് അവസരം ചോദിച്ച് നടക്കുന്ന ഒരു മൂന്നാംകിട നടനൊപ്പം വേദി പങ്കിടാനാകില്ലെന്ന് സംവിധായകന് പറഞ്ഞുവെന്ന് പറഞ്ഞ് യൂണിയന് ഭാരവാഹികള് പിന്നീട് വന്നാല് മതിയെന്ന് ബിനീഷിനെ അറിയിക്കുകയായിരുന്നു.
സംഭവം വിവാദമായതോടെ ബിനീഷിനോട് മാപ്പ് ചോദിക്കുന്നുവെന്ന് അനില് രാധാകൃഷ്ണന് അറിയിച്ചു. ബിനീഷ് ആയതുകൊണ്ടല്ല, പരിപാടിയില് താനല്ലാതെ മറ്റാരെങ്കിലും ഉണ്ടെങ്കില് തന്നെ ഒഴിവാക്കണമെന്ന് സംഘാടകരോട് ആവശ്യപ്പെടുക മാത്രമാണ് ചെയ്തതെന്നും അദ്ദേഹം പറഞ്ഞു.
പരിപാടിക്ക് തലേന്ന് മാസിക പ്രകാശനത്തിനായാണ് തന്നെ യൂണിയന് ഭാരവാഹികള് ക്ഷണിച്ചത്. ആദ്യം പരിപാടിയില് പങ്കെടുക്കില്ലെന്ന് അറിയിച്ചെങ്കിലും തീരുമാനം പിന്നീട് മാറ്റി. ഔദ്യോഗികമായി എന്നെ ക്ഷണിക്കാന് വരണമെന്നും സംഘാടകരോട് പറഞ്ഞിരുന്നു. മറ്റൊരാളുടെ ലൈം ലെറ്റ് പങ്കുവയ്ക്കാന് താന് ആഗ്രഹിക്കുന്നില്ല. അതുകൊണ്ട് ഞാന് അല്ലാതെ മറ്റാരെങ്കിലും ഉണ്ടെങ്കില് ഇല്ലെന്ന് പറഞ്ഞിരുന്നു. പിറ്റേ ദിവസമാണ് എന്നോട് പറയുന്നത്, ബിനീഷ് ബാസ്റ്റിന് ഉണ്ടെന്ന്. അപ്പോള് എന്നെ ഒഴിവാക്കണെന്ന് പറഞ്ഞു. ബിനീഷ് ആയതുകൊണ്ടല്ല ഞാന് അങ്ങനെ പറഞ്ഞത്.
ബിനീഷ് വന്നപ്പോള് താന് തന്നെയാണ് എല്ലാവരോടും കയ്യടിക്കാന് പറഞ്ഞത്. ബിനീഷ് വേദിയില് വന്നപ്പോള് കസേരയില് ഇരിക്കാനും പറഞ്ഞു. പേരിനൊപ്പം മേനോനുണ്ട് എന്ന് കരുതി സവര്ണനായി മുദ്രകുത്തരുത്. അത്തരത്തില് ചിന്തിക്കുന്നില്ലെന്നും അനില് കൂട്ടിച്ചേര്ത്തു.
അതിനിടെ സംഭവത്തില് അനിലിനോട് ഫെഫ്ക വിശദീകരണം തേടിയെന്ന് ജനറല് സെക്രട്ടറി ബി. ഉണ്ണികൃഷ്ണന് അറിയിച്ചു. ഇദ്ദേഹത്തിനെതിരെ നടപടിയുണ്ടാകുമെന്നും അദ്ദേഹം പറഞ്ഞു.
