ന്യൂദല്‍ഹി : യോഗാ ആചാര്യന്‍ ബാബാ രാംദേവിനെ അപകീര്‍ത്തിപ്പെടുത്തുന്ന വിധത്തില്‍ വീഡിയോകള്‍ പ്രചരിക്കുന്നത് നീക്കം ചെയ്യാന്‍ ദല്‍ഹി ഹൈക്കോടതി നിര്‍ദ്ദേശം. ഫേസ്ബുക്ക്, ഗൂഗിള്‍, യൂട്യൂബ്, ട്വിറ്റര്‍ എന്നിവയിലൂടെ പ്രചരിക്കുന്ന അപകീര്‍ത്തിപ്പെടുത്തുന്ന വീഡിയോകളും മറ്റും നീക്കം ചെയ്യാന്‍ അധികൃതരോടാണ് ആവശ്യപ്പെട്ടിരിക്കുന്നത്.
കേസ് പരിഗണിച്ച ദല്‍ഹി ഹൈക്കോടതി ജസ്റ്റിസ് പ്രതിഭാ എം. സിങ്ങാണ് ഇത്തരത്തില്‍ ഉത്തരവിറക്കിയത്. അപകീര്‍ത്തികരമായ പോസ്റ്റുകള്‍ക്ക് ജിയോ ബ്ലോക്ക് സംവിധാനം ഏര്‍പ്പെടുത്തേണ്ടത് ആലോചിക്കണം. ഇന്ത്യയില്‍ മാത്രമല്ല, ലോകത്താകമാനം അപകീര്‍ത്തി ഉള്ളടക്കങ്ങള്‍ തടയണം. തെറ്റായ വിവരങ്ങളും അപകീര്‍ത്തിപ്പെടുത്തുന്ന വിവരങ്ങളും ആര്‍ക്കും ലഭ്യമാകരുത്. ഐടി നിയമത്തിലെ വകുപ്പുകള്‍ കോടതി ഉത്തരവുകള്‍ ഉറപ്പുവരുത്തി ഫലവത്താക്കണമെന്നും കോടതി വ്യക്തമാക്കി. ബാബാ രാംദേവ് നല്‍കിയ പരാതിയിലാണ് ഈ ഉത്തരവ്.
79(3)(ബി) വകുപ്പ് പ്രകാരം അപകീര്‍ത്തികരമായതും തെറ്റായതുമായ വിവരങ്ങള്‍ നീക്കം ചെയ്യണമെന്നതിന് അര്‍ത്ഥം ഇന്ത്യയില്‍ മാത്രമല്ല എല്ലായിടത്തുമാണെന്നും കോടതി നിരീക്ഷിച്ചു. സമൂഹ മാധ്യമങ്ങളിലൂടം വ്യക്തികളെ അപകീര്‍ത്തിപ്പെടുത്തുന്ന വിധത്തിലുള്ള പ്രസ്താവനകള്‍ പ്രചരിക്കുന്നത് ഉത്ഭവ സ്ഥാനത്തുനിന്ന് തന്നെ നീക്കം ചെയ്യണം. കമ്പ്യൂട്ടറുകളില്‍ നന്നും പ്രചരിക്കുന്ന ഇത്തരം പോസ്റ്റുകള്‍ക്ക് ആഗോളതലത്തില്‍ നിരോധനം കൊണ്ടുവരണമെന്നും കോടതി നിര്‍ദ്ദേശം നല്‍കി.
ഗോഡ്മാന്‍ ടു ടൈക്കൂണ്‍ എന്ന പുസ്തകത്തില്‍ തനിക്കെതിരെ അപകീര്‍ത്തികരമായ ഉള്ളടക്കമുണ്ട്. അതേസമയം, ഇന്ത്യയില്‍ പ്രചരിക്കുന്ന അപകീര്‍ത്തി ഉള്ളടക്കം തടയാന്‍ നടപടി സ്വീകരിക്കുമെന്ന് സോഷ്യല്‍മീഡിയ അധികൃതര്‍ വ്യക്തമാക്കിയിട്ടുണ്ട്.
