കൊച്ചി: തനിക്ക് ആനക്കൊമ്പ് സൂക്ഷിക്കുന്നതിന് അനുമതിയുണ്ടെന്ന് നടന് മോഹന് ലാല്. കേസില് ഒന്നാം പ്രതിയാക്കി കുറ്റപത്രം സമര്പ്പിച്ചത് പൊതുജനമധ്യത്തില് തന്റെ പ്രതിച്ഛായ മോശമാക്കാനുള്ള ശ്രമത്തിന്റെ ഭാഗമായാണെന്നും മോഹന് ലാല്. പെരുമ്പാവൂര് കോടതിയില് സമര്പ്പിച്ച മറുപടി സത്യവാങ്മൂലത്തിലാണ് ഇക്കാര്യം വ്യക്തമാക്കിയത്.
വിശദീകരിക്കാനാവാത്ത വിധം മാനസിക പീഡനമാണ് ഇപ്പോള് നടക്കുന്നത്. കേസിന്റെ പേരില് ചില വ്യക്തികളും സംഘടനകളും പൊതുസമൂഹത്തില് തന്നെ മോശക്കാരനാക്കാന് ശ്രമം നടത്തുന്നുണ്ട്. ഈ കേസ് വ്യക്തിഹത്യ നടത്താനുള്ള ശ്രമം മാത്രമാണ്. തേവരയിലെ വസതിയില് നിന്നും പിടികൂടിയ രണ്ട് ജോഡി ആനക്കൊമ്പുകള് കൈവശം വയ്ക്കാന് സര്ക്കാര് മുന്കാല പ്രാബല്യത്തോടെ അനുമതി നല്കിയതാണ്. എന്നിട്ടും ആനക്കൊമ്പ് അനധികൃതമാണെന്നാണ് ഹര്ജിക്കാരുടെ അരോപണം. ഇത് അടിസ്ഥാന രഹിതമാണെന്നും മോഹന്ലാല് ബോധിപ്പിച്ചു.
കേസില് എഫ്ഐആര് രജിസ്റ്റര് ചെയ്യണമെന്നും ആനക്കൊമ്പ് കൈവശം വയ്ക്കാന് മുഖ്യവനപാലകന് നല്കിയ അനുമതി റദ്ദാക്കണമെന്നും ആവശ്യപ്പെട്ട് ഏലൂര് സ്വദേശി എ.എ പൗലോസ് സമര്പ്പിച്ച ഹര്ജിയിലാണ് ലാലിന്റെ സത്യവാങ്മൂലം. കേസില് മോഹന്ലാലിന്റെ ഹര്ജി അടുത്ത ദിവസം കോടതി പരിഗണിക്കും. 2012ലാണ് മോഹന്ലാലിന്റെ വീട്ടില് നിന്നും ആദായനികുതി വകുപ്പ് നാല് ആന കൊമ്പുകള് കണ്ടെത്തിയത്. തുടര്ന്ന് കേസ് രജിസ്റ്റര് ചെയ്ത് ഏഴ് വര്ഷത്തിന് ശേഷമായിരുന്നു കേസില് മോഹന്ലാലിനെ പ്രതിചേര്ത്ത് പോലീസ് കുറ്റപത്രം സമര്പ്പിച്ചത്.
കേസില് മോഹന്ലാല് അടക്കം നാല് പ്രതികളാണുള്ളത്. തൃശൂര് ഒല്ലൂര് സ്വദേശി പി.എന് കൃഷ്ണകുമാര് രണ്ടാം പ്രതിയും തൃപ്പൂണിത്തുറ എരൂര് സ്വദേശി കെ.കൃഷ്ണകുമാര് മൂന്നാം പ്രതിയും ചെന്നൈ പെനിന്സുല ഹൈറോഡില് നളിനി രാധാകൃഷ്ണന് നാലാം പ്രതിയുമാണ്.
