മുംബൈ: റിലയന്സ് ജിയോ ഉപഭോക്താകള്ക്ക് മറ്റ് മൊബൈല് നെറ്റ്വര്ക്കുകളിലേക്ക് ഇനി മുതല് വിളിക്കാന് മിനിറ്റിന് ആറ് പൈസ ചെലവാകും. ഇന്റര്നെറ്റ് ഇതര കോളുകള്ക്കാണ് ഈ പുതിയ നിരക്കുകള് ബാധകമായിരിക്കുന്നത്. കോള് നടത്തുന്ന ഉപയോക്താവിന്റെയും നെറ്റ്വര്ക്ക് കോള് സ്വീകരിക്കുന്ന ഉപയോക്താവിന്റെയും നിയമപ്രകാരം നല്കേണ്ടുന്ന ഫീസായ ഇന്റര്കണക്ട് യൂസേജ് ചാര്ജ് (ഐയുസി) ആണ് ഈ തുക. ഇതുവരെ ഉപയോക്താക്കളില് നിന്ന് ഈ തുക ഈടാക്കാതെ ജിയോ തന്നെ നല്കുകയായിരുന്നു എന്ന് അവര് വ്യക്തമാക്കി. മൂന്നു വര്ഷത്തിനുള്ളില് 13500 കോടി രൂപയാണ് ജിയോ നല്കിയത്.
ടെലികോം നിയന്ത്രണ അതോറിറ്റി (ട്രായി) 2020 വരെയാണ് ഐയുസി ഉണ്ടായിരിക്കുമെന്ന് പറഞ്ഞിരുന്നത്. ഈ കാലാവധിക്കു ശേഷം ഐയുസി ചാര്ജുചെയില്ലെന്ന ട്രായിയുടെ നിലപാടിനെ തുടര്ന്നണ് ജിയോ നിരക്കു വേണ്ടെന്നു വച്ചത്. എന്നാല്, ആ തീയതി പുനര്നിര്ണയിക്കുന്ന കാര്യം പരിഗണിക്കുമെന്ന് കഴിഞ്ഞ മാസം ട്രായി പറഞ്ഞത് അനിശ്ചിതത്വമുണ്ടാക്കിയ സാഹചര്യത്തിലാണ് തുക ഈടാക്കേണ്ടിവരുന്നതെന്നും ജിയോ വൃത്തങ്ങള് വ്യക്തമാക്കുന്നു. ഇപ്പോഴത്തെ ആറ് പൈസ തന്നെ പോരെന്നും 14 പൈസ എന്ന പഴയ നിരക്കെങ്കിലും പുനഃസ്ഥാപിക്കണമെന്നുമാണ് എയര്ടെല്, വോഡഫോണ്, ഐഡിയ എന്നിവയുടെ പക്ഷം.
ജിയോയുടെ കടന്നുവരവോടെ വന് നഷ്ടം നേരിട്ട ഭാരതി എയര്ടെല്, വോഡഫോണ്, ഐഡിയ എന്നിവ ഓഫ്-നെറ്റ് ഔട്ട്ഗോയിങ് കോളുകള്ക്കും മറ്റും നിരക്ക് ഈടാക്കാന് ഗൗരവമായി ആലോചിച്ച് വരുമ്പോഴാണ് ആ വഴി തുറന്നു കൊടുത്തുകൊണ്ടുള്ള ജിയോയുടെ പ്രഖ്യാപനം വന്നിരിക്കുന്നത്. പ്രമുഖ ടെലികോം കമ്പനികള് ജിയോയുടെ പാത പിന്തുടരാന് തുടങ്ങുന്നതിലൂടെ വൈകാതെ തന്നെ ഇവര് രാജ്യത്തെ അണ്ലിമിറ്റഡ് ഫ്രീ കോള് അവസാനിപ്പിച്ചേക്കുമെന്നാണ് കരുതുന്നത്. ഓഫ്-നെറ്റ് ഔട്ട്ഗോയിംഗ് കോളുകള്ക്ക് പ്രത്യേകം ചാര്ജ് ചെയ്യുന്നതിലൂടെയോ അല്ലെങ്കില് ഇപ്പോള് നല്കുന്ന പാക്കുകളുടെ ചാര്ജ് വര്ദ്ധനയിലൂടെയോ സാമ്പത്തിക ലാഭമാണ് കമ്പനികള് ലക്ഷ്യമിടുന്നത്.
എന്നാല്, ജിയോ ഉപയോക്താകള്ക്കായി പുതിയ ഓഫറുകളാണ് കമ്പനി മുന്നോട്ട് വച്ചിരിക്കുന്നത്. വരിക്കാര് ഈ കോള് നിരക്കിനായി 10 രൂപ (124 മിനിറ്റ്), 20 രൂപ (249 മിനിറ്റ്), 50 രൂപ (656 മിനിറ്റ്), 100 രൂപ (1362 മിനിറ്റ്) എന്നീ ടോപ് അപ് വൗച്ചറുകള് ഉപയോഗിക്കണം. എന്നാല് ഈ തുകയ്ക്കു തുല്യമായ ഡേറ്റ (യഥാക്രമം, 1 ജിബി, 2 ജിബി, 5 ജിബി, 10 ജിബി) ജിയോ സൗജന്യമായി ഉപയോക്താവിനു നല്കും.
