ലണ്ടന്‍: ജമ്മു കശ്മീരിന് പ്രത്യേക പദവി നല്‍കിയിരുന്ന 370-ാം വകുപ്പ് റദ്ദാക്കിയ കേന്ദ്രസര്‍ക്കാര്‍ നടപടിയെ പിന്തുണച്ച് പ്രശസ്ത അഭിഭാഷകന്‍ ഹരീഷ് സാല്‍വേ. 370-ാം വകുപ്പ് ഒരു തെറ്റായിരുന്നു. വര്‍ഷങ്ങളായി തുടര്‍ന്നു പോരുന്ന ആ തെറ്റാണ് നരേന്ദ്ര മോദി സര്‍ക്കാര്‍ തിരുത്തിയത്. കശ്മീര്‍ വിഷയത്തില്‍ പാക്കിസ്ഥാന്റെ നിലപാടും പ്രതികരണം അവരുടെ പാപ്പരത്വം വ്യക്തമാക്കുന്നതാണ്. കശ്മീര്‍ ഇന്ത്യയുടെ അവിഭാജ്യ ഘടകമാണ്. അവിടെ നുഴഞ്ഞുകയറിയവരാണ് പാക്കിസ്ഥാന്‍. ഇപ്പോള്‍ പാക്കിസ്ഥാന്‍ അധീനതയിലുള്ള കശ്മീരും ഇന്ത്യയുടേത്. പാക്കിസ്ഥാന്‍ അവിടെ നുഴഞ്ഞുകയറിയതാണ്. ഏതെങ്കിലും തരത്തിലുള്ള അതിര്‍ത്തി തര്‍ക്കം ഉണ്ടെങ്കില്‍ അതു പാക്ക് അധീന കശ്മീരിനെ ചൊല്ലിയാണ്. ഇന്ത്യന്‍ ഭരണഘടന മാത്രമല്ല, കശ്മീര്‍ ഭരണഘടനയും വ്യക്തമാക്കുന്നത് കശ്മീര്‍ ഇന്ത്യയുടെ അവിഭാജ്യ ഘടകമെന്നാണ്. ഇതിലൊന്നും കശ്മീരികള്‍ക്ക് ഒരു സംശയവുമില്ല. ചില പാക്കിസ്ഥാനികള്‍ക്ക് മാത്രമാണ് ഇക്കാര്യങ്ങള്‍ സംശയം.
വര്‍ഷങ്ങളായി തുടര്‍ന്നു പോരുന്ന ഒരു സമ്പ്രദായം മാറ്റാന്‍ ചിലര്‍ ശ്രമിക്കാറില്ല. എന്നാല്‍, തെറ്റായ ഒരു സമ്പ്രദായമാണതെങ്കില്‍ വളരെ വലിയ പ്രത്യാഘാതം നമ്മള്‍ നേരിടേണ്ടി വരും. അസാധ്യമെന്നു തോന്നിയ കാര്യമാണ് ഇപ്പോള്‍ കേന്ദ്രസര്‍ക്കാര്‍ ചെയ്തത്. 370-ാം വകുപ്പ് റദ്ദാക്കുന്നത് സംബന്ധിച്ച് ഒരു ചര്‍ച്ചയും ആവശ്യമുണ്ടായിരുന്നില്ല. അങ്ങനെ ഒരു ചര്‍ച്ച നടന്നിരുന്നെങ്കില്‍ അത് തീവ്രവാദ ആക്രമണങ്ങള്‍ അടക്കം തിരിച്ചടികള്‍ക്ക് കാരണമായേനെ. വിഷയത്തില്‍ കേന്ദ്രസര്‍ക്കാര്‍ സ്വീകരിച്ച നടപടികള്‍ കൃത്യവും സുതാര്യവുമായിരുന്നെന്നും സാല്‍വേ. ലണ്ടനിലെ ഇന്ത്യന്‍ ഹൈക്കിഷനില്‍ മാധ്യമപ്രവര്‍ത്തകരോടു സംസാരിക്കുകയായിരുന്നു സാല്‍വേ.
