ന്യൂയോര്‍ക്ക് : യുഎന്‍ സഭയില്‍ കശ്മീര്‍ വിഷയം പ്രതിപാദിച്ച ചൈനയോടും ആഭ്യന്തര കാര്യമാണെന്ന് മറുപടി നല്‍കി ഇന്ത്യ. പാക് പ്രധാനമന്ത്രി ഇമ്രാന്‍ ഖാനു പിന്നാലെ ചൈനീസ് വിദേശകാര്യ മന്ത്രിയും ഐക്യരാഷ്‌ട്രസഭയില്‍ കശ്മീര്‍ പ്രശ്‌നം ഉന്നയിച്ചതോടെയാണ് ഇന്ത്യ മറുപടി നല്‍കിയത്.
യുഎന്‍ രക്ഷാസമിതിയുടെ മുന്‍പ്രമേയങ്ങള്‍ക്ക് അനുസൃതമായി കശ്മീര്‍ വിഷയം സമാധാനപരമായി പരിഹരിക്കണമെന്ന് ചൈനീസ് വിദേശകാര്യമന്ത്രി വാങ് യിക്കാണ് അറിയിച്ചത്. എന്നാല്‍ വിഷയം ആഭ്യന്തരകാര്യമാണെന്നും രാജ്യത്തിന്റെ പരമാധികാരവും അഖണ്ഡതയും മാനിക്കണമെന്നും ഇന്ത്യ അറിയിക്കുകയായിരുന്നു. കശ്മീരും, ലഡാക്കും ഇന്ത്യയുടെ ഭാഗമാണെന്നും രാജ്യത്തിന്റെ പരമാധികാരത്തെ എല്ലാ രാജ്യങ്ങളും മാനിക്കണമെന്നും വിദേശകാര്യ വക്താവ് രവീഷ് കുമാര്‍ പ്രതികരിച്ചു. പാക് അധിനിവേശ കശ്മീരിലൂടെയുള്ള ചൈന പാക്കിസ്ഥാന്‍ സാമ്പത്തിക ഇടനാഴി പദ്ധതി ഉപേക്ഷിക്കണമെന്നും ഇന്ത്യ ആവശ്യപ്പെട്ടു.
അതിനിടെ യുഎന്‍ പൊതുസഭയില്‍ പാക് പ്രധാനമന്ത്രി ഇമ്രാന്‍ ഖാന്‍ നടത്തിയത്് വിദ്വേഷപ്രസംഗമെന്ന് ഇന്ത്യ പ്രതികരിച്ചു. വിദ്വേഷം ആദര്‍ശമാക്കി ഭീകരതയെ വ്യവസായമായി കെട്ടിപ്പൊക്കിയവരില്‍നിന്ന് ഇന്ത്യന്‍ ജനതയ്‌ക്ക് ഉപദേശം ആവശ്യമില്ലെന്നായിരുന്നു യുഎന്നിലെ ഇന്ത്യന്‍ ഫസ്റ്റ് സെക്രട്ടറി വിദിഷ മൈത്ര കുറ്റപ്പെടുത്തി.
