ന്യൂദല്ഹി: ഇന്ത്യയിലെ ജൂത-ഇസ്രായേല് സമുദായങ്ങളെ ആക്രമിക്കാന് അല്-ക്വയ്ദ, ഐഎസ് ഉള്പ്പെടെ അന്താരാഷ്ട്ര ഭീകര സംഘടനകള് പദ്ധതിയിടുന്നതായി രഹസ്യാന്വേഷണ ഏജന്സികള്. സെപ്റ്റംബര്, ഒക്ടോബര് മാസങ്ങളിലാണ് ആക്രമണങ്ങള്ക്ക് സാധ്യതയെന്നാണ് റിപ്പോര്ട്ടുകള്. ദല്ഹി ഉള്പ്പടെ ജൂത ജനസംഖ്യ കൂടുതലുള്ള സംസ്ഥാനങ്ങള്ക്ക് ജാഗ്രത നിര്ദേശവും നല്കി.
ജൂത സമൂഹത്തിന്റെ ആഘോഷ സമയങ്ങളില് കൂട്ടകുരുത്തിക്കാണ് ഭീകര സംഘടനകള് ശ്രമിക്കുന്നതെന്നാണ് രഹസ്യാന്വേഷണ ഏജന്സികള് വ്യക്തമാക്കുന്നത്. സെപ്റ്റംബര് 29 മുതല് ഒക്ടോബര് ഒന്നുവരെ നീളുന്ന റോഷ് ഹാഷാന (ജൂത പുതുവര്ഷം), ഒക്ടോബര് എട്ട് ഒമ്പത് തീയതികളില് വരുന്നു യോം കിപ്പൂര് (യഹൂദമതത്തിലെ ഏറ്റവും വിശുദ്ധ ദിനം) , ഒക്ടോബര് 13നും 22നുമായി നടക്കുന്ന സുക്കോട്ട് ഉള്പ്പടെയുള്ള സമയങ്ങളില് ആതീവ ജഗ്രത പുലര്ത്താനും ഏജന്സികള് നിര്ദേശിച്ചിട്ടുണ്ട്.
ന്യൂദല്ഹിയിലെ ഇസ്രായേല് എംബസി ആക്രമിക്കാനുള്ള ഭീകരവാദ സംഘടനകളുടെ പദ്ധതികളെക്കുറിച്ച് മറ്റ് രാജ്യങ്ങളിലെ ചാര ഏജന്സികളില് നിന്ന് രഹസ്യാന്വേഷണ വിവരങ്ങള് ലഭിച്ചതായി റിപ്പോര്ട്ടുകള് സൂചിപ്പിക്കുന്നു. ആര്ട്ടിക്കിള് 370 റദ്ദാക്കിയ വിഷയത്തില് ഇസ്രായേല് ഇന്ത്യയെ പിന്തുണച്ചതിനെത്തുടര്ന്ന് ഇസ്രയേലിനെതിരെ ആക്രമണം നടത്താന് ഭീകരവാദ സംഘടനകള് ആഗ്രഹിക്കുന്നുണ്ടെന്ന് വൃത്തങ്ങള് അറിയിച്ചു. ഇസ്രായേലികള് പതിവായി സന്ദര്ശിക്കുന്ന സ്കൂളുകളും ഹോട്ടലുകളും ഉള്പ്പെടുന്നു സ്ഥലങ്ങളിലും സുരക്ഷ ഏര്പ്പെടുത്തും.
ഇത്തരത്തിലുള്ള ഏതൊരു ശ്രമവും തടയാന് ഉചിതമായ പ്രതിരോധ, മുന്കരുതല് നടപടികള് സ്വീകരിക്കണമെന്ന് രഹസ്യാന്വേഷണ ഏജന്സികള് ലോക്കല് പോലീസിനും പ്രാദേശിക രഹസ്യാന്വേഷണ വിഭാഗത്തിനും മുന്നറിയിപ്പ് നല്കിയിട്ടുണ്ട്. അനിഷ്ട സംഭവങ്ങള് ഉണ്ടാകാതിരിക്കാന് ദല്ഹിയിലെ ഇസ്രായേലി സ്ഥാപനങ്ങള്, ചബാദ് വീടുകള് എന്നിവയ്ക്ക് പുറത്ത് സുരക്ഷ ഏര്പ്പെടുത്തിയിട്ടുണ്ട്.
