അമരാവതി : തീരദേശ നിയമ വിരുദ്ധമായി നിര്‍മിച്ച മുന്‍ മുഖ്യമന്ത്രിയും ടിഡിപി നേതാവുമായ ചന്ദ്രബാബു നായിഡുവിന്റേയും വീട് പൊളിച്ചു നീക്കും. കൃഷ്ണാ നദിക്കരയിലെ അനധികൃത നിര്‍മാണങ്ങള്‍ക്കെതിരെ ആന്ധ്രയിലെ ജഗന്‍മോഹന്‍ റെഡ്ഡി സര്‍ക്കാര്‍ നടപടികള്‍ ശക്തമാക്കിയിരുന്നു. ഇതിന്റെ ഭാഗമായാണ് നായിഡുവിനെതിരേയും നടപടി സ്വീകരിച്ചിരിക്കുന്നത്.
ചന്ദ്രബാബു നായിഡു ഇപ്പോള്‍ താമസിക്കുന്ന അമരാവതിയിലെ വീട് ഏഴുദിവസത്തിനകം പൊളിക്കണമെന്ന് ആവശ്യപ്പെട്ട് നോട്ടീസ് നല്‍കിയതായാണ് റിപ്പോര്‍ട്ടുകള്‍ പുറത്തുവന്നിരിക്കുന്നത്. ഇതുകൂടാതെ ഉടമ സ്വമേധയാ പൊളിച്ചുനീക്കിയില്ലെങ്കില്‍ നേരിട്ട് കെട്ടിടം പൊളിക്കുമെന്നു ചൂണ്ടിക്കാണിച്ച് ആന്ധ്രപ്രദേശ് ക്യാപിറ്റല്‍ റീജിയണ്‍ ഡെവലപ്‌മെന്റ് അതോറിട്ടി (എപിസിആര്‍ഡിഎ) ഉടമകള്‍ക്കും നോട്ടിസ് നല്‍കിയിരുന്നു. മറുപടി തൃപ്തികരമല്ലാത്തതിനാലാണ് ഈ മേഖലയിലെ അഞ്ചോളം കെട്ടിടങ്ങള്‍ ഇടിച്ചു നിരത്തിയതെന്ന് എപിസിആര്‍ഡിഎ വിശദീകരിക്കുന്നു.
അമരാവതിയില്‍ നിന്ന് 32 കിലോമീറ്റര്‍ അകലെ കൃഷ്ണാനദിക്കരയില്‍ പണികഴിപ്പിച്ച ടിഡിപി നേതാവ് കോട്ടേശ്വര റാവുവിന്റെ വീട് കഴിഞ്ഞ ദിവസം പൊളിച്ചുനീക്കിയിരുന്നു. ചന്ദ്രബാബു നായിഡു ഇപ്പോള്‍ താമസിക്കുന്ന വീടിന്റെ അടുത്താണ് കോട്ടശ്വര റാവുവിന്റെ പൊളിച്ചുനീക്കിയ വീട്. 24 ഓളം കെട്ടിട്ടങ്ങളാണ് കൃഷ്ണനദിയോട് ചേര്‍ന്ന് അനധികൃതമായി നിര്‍മിച്ചിട്ടുള്ളത്.
ചന്ദ്രബാബു നായിഡുവും കുടുംബവും എയര്‍ കോസ്റ്റ ഉടമയായിരുന്ന ലിംഗനേനി രമേശില്‍നിന്ന് പാട്ടത്തിനെടുത്ത വീട്ടിലാണ് ഇപ്പോള്‍ താമസിക്കുന്നത്. കൃഷ്ണ നദിയുടെ തീരത്തുള്ള ഈ വീട് 1.38 ഏക്കറില്‍ ചട്ടങ്ങള്‍ ലംഘിച്ചും നിയമപരമായ അനുമതിയില്ലാതെയുമാണ് നിര്‍മിച്ചതെന്നാണ് എപിസിആര്‍ഡിഎയുടെ കണ്ടെത്തല്‍. വീട് പൊളിച്ചുനീക്കണമെന്നാവശ്യപ്പെട്ട് എപിസിആര്‍ഡിഎ കഴിഞ്ഞ ജൂണ്‍ 27നും നോട്ടീസ് നല്‍കിയിരുന്നു. ലിംഗനേനി രമേശ് നല്‍കിയ മറുപടി തൃപ്തികരമല്ലെന്നു കാണിച്ചു ഈ മാസം 19 വീണ്ടും നോട്ടിസ് നല്‍കി. ഏഴു ദിവസത്തിനകം പൊളിച്ചു നീക്കണമെന്നായിരുന്നു ആവശ്യം.
നായിഡുവിന്റെ വസതിയോടു ചേര്‍ന്നു നിര്‍മിച്ചിരുന്ന പ്രജാവേദികയുടെ നിര്‍മാണം അനധികൃതമാണെന്നും നിര്‍മാണത്തില്‍ അഴിമതിയുണ്ടെന്നും കണ്ടെത്തിയതിനെ തുടര്‍ന്നാണ് സര്‍ക്കാര്‍ നടപടി. അതേസമയം ഒരു സാധാരണക്കാരന്‍ അനധികൃത നിര്‍മാണം നടത്തിയാല്‍ സ്വീകരിക്കുന്ന നടപടികളാണ് നായിഡുവിന്റെ കാര്യത്തിലും സ്വീകരിക്കുന്നതെന്നായിരുന്നു മുഖ്യമന്ത്രി ജഗന്‍ മോഹന്‍ റെഡ്ഡിയുടെ പ്രതികരണം.
