കൊച്ചി: പി.എസ്.സി പരീക്ഷാ തട്ടിപ്പില്‍ സര്‍ക്കാരിനെതിരെ ഹൈക്കോടതി. പരീക്ഷ തട്ടിപ്പ് സ്വതന്ത്ര ഏജന്‍സി അന്വേഷിക്കണമെന്നും ഹൈക്കോടതി വ്യക്തമാക്കി. അടുത്തിടെ നടന്ന എല്ലാ നിയമനങ്ങളും അന്വേഷിക്കണം. നിലവിലെ അവസ്ഥ നിരാശാജനകമാണെന്നും ഹൈക്കോടതി പറഞ്ഞു. അനര്‍ഹര്‍ സര്‍ക്കാര്‍ ജോലിയില്‍ കയറുന്നത് തടയാന്‍ പി.എസ്.സിയ്‌ക്ക് കഴിയുന്നില്ലെന്നും ഹൈക്കോടതി നിരീക്ഷിച്ചു. യൂണിവേഴ്‌സിറ്റി കോളേജിലെ വധശ്രമക്കേസില്‍ പ്രതികളായ രണ്ട് പേരും യൂണിയന്‍ ഭാരവാഹിയായിരുന്ന മറ്റൊരാളും നാലാം പോലീസ് ബറ്റാലിയനിലേക്കുള്ള റിക്രൂട്ട്‌മെന്റില്‍ ആദ്യ റാങ്കുകളില്‍ ഇടംപിടിച്ച സംഭവത്തിലാണ് ഹൈക്കോടതി രൂക്ഷ വിമര്‍ശനം ഉന്നയിച്ചത്.
തിരുവനന്തപുരം യൂണിവേഴ്‌സിറ്റി കോളജ് കുത്തുകേസ് പ്രതികളായ എസ് എഫ് ഐ നേതാക്കള്‍ പി എസ് സി പരീക്ഷയില്‍ വന്‍തട്ടിപ്പ് നടത്തിയതായി നേരത്തെ കണ്ടെത്തിയിരുന്നു. ശിവരഞ്ജിത്ത്, നസീം , പ്രണവ് എന്നിവരെ റാങ്ക് പട്ടികയില്‍ നിന്ന് ഒഴിവാക്കാനും പി എസ് സി പരീക്ഷയില്‍ നിന്നും സ്ഥിരമായി അയോഗ്യരാക്കാനും തീരുമാനിച്ചിരുന്നു. പി എസ് സി വിജിലന്‍സിന്റെ കണ്ടെത്തലിന്റെ അടിസ്ഥാനത്തില്‍ പോലീസ് കേസ് രജിസ്റ്റര്‍ ചെയ്യാനും ശുപാര്‍ശ നലല്‍കിയിരുന്നു. എന്നാല്‍ പോലീസ് ഇതുവരെ കേസ് രജിസ്റ്റര്‍ ചെയ്തില്ല.
ഒരു ക്രമക്കേടുമില്ലെന്ന് മുഖ്യമന്ത്രിയും പി എസ് സി ചെയര്‍മാനും തറപ്പിച്ചു പറഞ്ഞ പരീക്ഷയില്‍ തട്ടിപ്പ് നടന്നതായാണ് പി എസ് സി തന്നെ സ്ഥിരീകരിക്കുന്നത്. കോണ്‍സ്റ്റബിള്‍ പരീക്ഷയില്‍ ഒന്നും രണ്ടും റാങ്കുകളിലെത്തിയ എസ് എഫ് ഐ നേതാക്കളും വധശ്രമക്കേസ് പ്രതികളുമായ ആര്‍ ശിവരഞ്ജിത്ത്, പി പി പ്രണവ് ഇരുപത്തിയെട്ടാം റാങ്കിനുടമ എ എന്‍ നസീം എന്നിവര്‍ ക്രമക്കേട് നടത്തിയതായാണ് പി എസ് സി വിജിലന്‍സ് കണ്ടെത്തല്‍. മൊബൈല്‍ ഫോണ്‍ ഉപയോഗിച്ചായിരുന്നു ക്രമക്കേട്. ഫോണില്‍ക്കൂടി ചോദ്യങ്ങളും ഉത്തരങ്ങളും കൈമാറിയതായി സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തില്‍ വ്യക്തമായിരുന്നു.
ശിവരഞ്ജിത്തിനും പ്രണവിനും ഉത്തരങ്ങളെത്തിയത് ഒരേ നമ്പറില്‍ നിന്നാണ്. ഫോണുമായി ബന്ധിപ്പിച്ച സ്മാര്‍ട് വാച്ച് ഉപയോഗിച്ചിരിക്കാന്‍ സാധ്യതയുണ്ടെന്നും അന്വേഷണ സംഘം വിലയിരുത്തുന്നു. കണ്ടെത്തലിന്റെ അടിസ്ഥാനത്തില്‍ മൂവര്‍ക്കും പി എസ് സി പരീക്ഷകളില്‍ നിന്ന് സ്ഥിരം വിലക്കേര്‍പ്പെടുത്തി. പൊലീസ് കേസ് റജിസ്റ്റര്‍ ചെയ്ത് അന്വേഷിക്കാനും പി എസ് എസി ശുപാര്‍ശ ചെയ്യും. ആയിരക്കണക്കിന് ഉദ്യോഗാത്ഥികവ്! കുറ്റമറ്റമറ്റ രീതിയില്‍ നടത്തുന്നുവെന്ന് വിശ്വസിക്കുന്ന പി എസ് സി പരീക്ഷകളുടെ വിശ്വാസ്യതയെത്തന്നെ ചോദ്യം ചെയ്യുന്ന വിധത്തിലാണ് പരീക്ഷാ തട്ടിപ്പ് പുറത്തു വരുന്നത്.
