മുംബൈ: ക്രിക്കറ്റിലെ റെക്കോഡുകള്‍ എതെങ്കിലും കാലത്ത് തിരുത്തപ്പെടാനുള്ള സാധ്യതകളുണ്ട്. കളിയിലെ നിയമങ്ങള്‍ മാറുന്നതും സാങ്കേതിക വിദ്യകൊണ്ട് ലഘൂകരിക്കപ്പെടുന്നതുമൊക്കെ ഇതിനു സഹായകമാകുമെന്ന് കരുതാവുന്ന കാരണങ്ങളാണ്.എന്നാല്‍ ഇത്തവണ ഇന്ത്യന്‍ നായകന്‍ വിരാട് കോലി നേടിയിരിക്കുന്നത് തിരുത്തപ്പെടാന്‍ സാധ്യത തീരെയില്ലാത്ത ഒരു റെക്കോഡാണ്. ഒരു ദശാബ്ദത്തില്‍ 20000 റണ്‍സ് പൂര്‍ത്തിയാക്കുന്ന ആദ്യ ബാറ്റ്‌സ്മാനായിരിക്കുകയാണ് കോലി. ഈ റെക്കോഡില്‍ മൂന്നാം സ്ഥാനത്തുള്ള സച്ചിന്‍ നേടിയിട്ടുള്ള റണ്‍സ്15962 ആണ്.
രണ്ടാം സ്ഥാനത്തുള്ളത് മുന്‍ ഓസീസ് ക്യാപ്റ്റന്‍ റിക്കി പോണ്ടിംഗാണ്.18962റണ്‍സ് പോണ്ടിംഗ് നേടിയത് 2000കലാഘട്ടത്തിലാണ്. വിന്‍ഡീസിനെതിരെ നടന്ന മൂന്നാം ഏകദിനത്തിലാണ് ഇന്ത്യന്‍ നായകന്‍ ഈ നേട്ടത്തിലെത്തിയത്. ഈ ദശാബ്ദത്തില്‍ 20018 റണ്‍സാണ് കോലി ഇതുവരെ നേടിയത്. ആകെ 20502 റണ്‍സാണ് കോലിക്കുള്ളത്. ദക്ഷിണാഫ്രിക്കയുടെ മുന്‍ ഓള്‍റൗണ്ടര്‍ ജാക്കസ് കാലിസ് 16777 റണ്‍സുമായി മൂന്നാമതുണ്ട്.
മത്സരത്തില്‍ 43ാം സെഞ്ചുറി കുറിച്ച കോലിയുടെ മികവില്‍ ഇന്ത്യ വിജയിച്ചിരുന്നു. മഴ മൂലം 35 ഓവറാക്കി ചുരുക്കിയ മത്സരത്തില്‍ വിന്‍ഡീസ് 240/7 എന്ന സ്‌കോര്‍ നേടിയപ്പോള്‍ ഡക്ക്വര്‍ത്ത് ലൂയിസ് നിയമപ്രകാരം ഇന്ത്യയുടെ വിജയലക്ഷ്യം 255 റണ്‍സായിരുന്നു. 2.3 ഓവര്‍ ബാക്കി നില്‍ക്കെയാണ് ഇന്ത്യ വിജയലക്ഷ്യം മറികടന്നത്. ഇതോടെ മൂന്ന് മത്സരങ്ങളടങ്ങിയ പരമ്പര ഇന്ത്യ 2-0ന് സ്വന്തമാക്കി. പരമ്പരയിലെ ആദ്യ മത്സരം മഴ മൂലം ഉപേക്ഷിച്ചിരുന്നു.
