ന്യൂദല്‍ഹി : ജമ്മു കശ്മീരിന്റെ പ്രത്യേക പദവി റദ്ദാക്കിയ സംഭവത്തില്‍ എന്ത് നിലപാട് എടുക്കണമെന്ന് അറിയാതെ കുഴങ്ങി കോണ്‍ഗ്രസ് നേതൃത്വം. ബില്ല് രാജ്യസഭയില്‍ പാസാവുകയും ലോക്‌സഭയില്‍ ഇന്ന് അംഗാകാരം നേടാനിരിക്കുന്ന സാഹചര്യത്തിലാണ് നിലപാടില്ലാതെ കോണ്‍ഗ്രസ് നട്ടംതിരിയുന്നത്. രാഹുല്‍ ഗാന്ധിയും, സോണിയ ഗാന്ധിയും വിഷയത്തില്‍ ഇതുവരെ പ്രതികരിച്ചിട്ടില്ല. ഔദ്യോഗികമായി ഇരുവരും വിഷയത്തില്‍ ഒന്നും അറിയിക്കാത്തതിനെ തുടര്‍ന്ന് അണികളും എന്ത് നിലപാട് എടുക്കണമെന്ന സംശയത്തിലാണ്.
അതിനിടെ ബില്ലിനെ അനുകൂലിച്ച് പല മുതിര്‍ന്ന നേതാക്കളും രംഗതെത്തിയത് കോണ്‍ഗ്രസ്സിന് തലവേദനായിട്ടുണ്ട്. ഇതില്‍ പാര്‍ട്ടി പ്രവര്‍ത്തകര്‍ക്കിടയില്‍ രണ്ട് അഭിപ്രായവും രൂപപ്പെട്ടു. വിഷയത്തില്‍ ഒരു തീരുമാനം എടുക്കാത്തതിനാല്‍ അനുകൂലിച്ച നേതാക്കളോട് എന്ത് മറുപടി നല്‍കുമെന്ന നിലാടിലാണ് കോണ്‍ഗ്രസ്.
ആര്‍ട്ടിക്കിള്‍ 370 ചരിത്രപരമായ തെറ്റാണ്, ആ തീരുമാനത്തെ ഇപ്പോള്‍ തിരുത്തിയെന്നുമാണ് മുതിര്‍ന്ന കോണ്‍ഗ്രസ് നേതാവ് ജനാര്‍ദ്ദന്‍ ദ്വിവേദി പ്രതികരിച്ചത്. ഇതോടെ ഭരണഘടനയോട് ആര്‍ട്ടിക്കിള്‍ 370 ചേര്‍ത്തുകൊണ്ടുള്ള മുന്‍ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ തീരുമാനത്തേയാണ് ദ്വിവേദി തള്ളിപ്പറഞ്ഞിരിക്കുന്നത്. സ്വതന്ത്ര്യ ഇന്ത്യയുടെ ആദ്യത്തെ പ്രധാനമന്ത്രിയായ നെഹ്‌റു അന്നത്തെ കശ്മീര്‍ മുഖ്യമന്ത്രി ഷെയ്ഖ് അബ്ദുള്ളയുമായി ചര്‍ച്ച നടത്തിയശേഷമാണ് അനുച്ഛേദം 370 ഭരണഘടനയോട് ചേര്‍ത്തത്.
ഇതൊരു പഴയ പ്രശ്‌നമാണ്. സ്വാതന്ത്യത്തിന് ശേഷം പല സ്വാതന്ത്ര്യ സമരസേനാനികളും 370 വേണ്ടെന്ന നിലപാടിലായിരുന്നു. തന്റെ രാഷ്‌ട്രീയഗുരു ഡോ. രാം മനോഹര്‍ ലോഹ്യ ഈ ഇതിനെതിരായിരുന്നു. ഇത് രാജ്യത്തിനാകെ സംതൃപ്തിയുണ്ടാക്കുന്ന തീരുമാനമാണെന്നാണ് വ്യക്തിപരമായി എന്റെ നിലപാടെന്നുമാണ് ദ്വിവേദിയുടെ പ്രതികരണം. മോദിയുടെ നോട്ട് നിരോധനത്തെയും ദ്വിവേദി സ്വാഗതം ചെയ്തിരുന്നു.
ഇതുകൂടാതെ ഹരിയാനയില്‍ നിന്നുള്ള മുന്‍ കോണ്‍ഗ്രസ് എംപി ദീപേന്ദര്‍ എസ്. ഹൂഡയും തീരുമാനത്തെ അംഗീകരിച്ച് രംഗത്തെത്തി. 370-ാം അനുച്ഛേദം ഭരണഘടനയില്‍ വേണ്ടതില്ലെന്നാണ് ഹുഡ അഭിപ്രായപ്പെട്ടത്. ദേശ താത്പര്യത്തിന് അനുകൂലമായ തീരുമാനമാണിത്. ഇതിലൂടെ യഥാര്‍ത്ഥത്തില്‍ ജമ്മു കശ്മീര്‍ ഇന്ത്യയുടെ ഭാഗമാവുകയാണ്. സമാധാനപരമായി ഈ നീക്കം നടപ്പാവുന്നുണ്ടെന്ന് ഉറപ്പാക്കേണ്ടത് ഈ സര്‍ക്കാരിന്റെ ഉത്തരവാദിത്തമാണെന്നും അദ്ദേഹം ട്വിറ്ററിലൂടെ അറിയിച്ചു.
അതിനിടെ ബില്ലിന്മേല്‍ തിരുമാനമെടുക്കാന്‍ സോണിയാ ഗാന്ധി കോണ്‍ഗ്രസ് എംപിമാരെയെല്ലാം വിളിപ്പിച്ചു. എംപിമാരോടെല്ലാം ഇന്ന് രാവിലെ ദല്‍ഹിയില്‍ എത്തണമെന്ന നിര്‍ദ്ദേശമാണ് ഇവര്‍ക്ക് നേതൃത്വം നല്‍കിയിരിക്കുന്നത്. ലോക്‌സഭാ സമ്മേളനത്തിനു മുന്നോടിയായി പാര്‍ലമെന്റില്‍ സോണിയ ഗാന്ധിയുടെ അധ്യക്ഷതിയിലാണ് യോഗം ചേരുക. അതിനുശേഷമെങ്കിലും നേതൃത്വം ഒരു നിലപാട് അറിയിക്കുമെന്ന പ്രതീക്ഷയിലാണ് പ്രവര്‍ത്തകര്‍.
