ന്യൂദല്‍ഹി: ബിജെപി എംപിമാര്‍ക്കായി ദ്വിദിന പരിശീലന പരിപാടി ആരംഭിച്ചു. പാര്‍ലമെന്റിലെ ലൈബ്രറി കെട്ടിടത്തില്‍ നടക്കുന്ന ക്ലാസുകളില്‍ എംപിമാര്‍ക്കൊപ്പം പ്രധാനമന്ത്രി നരേന്ദ്ര മോദിയും ശ്രോതാവായി പങ്കെടുത്തത് ശ്രദ്ധേയമായി. ദേശീയ അധ്യക്ഷന്‍ അമിത് ഷാ, വര്‍ക്കിങ് പ്രസിഡന്റ് ജെ.പി. നദ്ദ എന്നിവരുടെ നേതൃത്വത്തിലാണ് എംപിമാര്‍ക്കുള്ള അഭ്യാസവര്‍ഗ്.
പെരുമാറ്റം, അച്ചടക്കം, പാര്‍ലമെന്ററി നടപടിക്രമങ്ങള്‍, പ്രത്യയശാസ്ത്ര നിലപാടുകള്‍ തുടങ്ങി നിരവധി പ്രാഥമിക കാര്യങ്ങളില്‍ എംപിമാര്‍ക്ക് അറിവ് നല്‍കാന്‍ ലക്ഷ്യമിട്ടുള്ളതാണ് പരിശീലന ക്ലാസുകള്‍. രാവിലെ പത്തു മുതല്‍ രാത്രി പത്തു വരെയാണ് രണ്ടു ദിവസവും പരിശീലന പരിപാടി ക്രമീകരിച്ചിട്ടുള്ളത്.
എംപിമാര്‍ക്കൊപ്പം ഇരുന്ന് ക്ലാസുകള്‍ കേള്‍ക്കുന്ന പ്രധാനമന്ത്രി നരേന്ദ്ര മോദിയുടെ ചിത്രം പുറത്തുവന്നത് ഏറെ ശ്രദ്ധിക്കപ്പെട്ടു. പ്രധാനമന്ത്രി അടക്കമുള്ള എല്ലാ എംപിമാരും പാര്‍ലമെന്ററി നടപടിക്രമങ്ങള്‍ കൂടുതല്‍ സൂക്ഷ്മതയോടെ പഠിക്കാനുള്ള ശ്രമമാണ് ക്ലാസുകളിലൂടെ ബിജെപി ലക്ഷ്യമിടുന്നത്. ജെ.പി. നദ്ദയുടെ ഉദ്ഘാടന പ്രസംഗത്തോടെ ആരംഭിച്ച പരിശീലന പരിപാടിയില്‍ പാര്‍ലമെന്റിലെ എംപിമാരുടെ പങ്കിനെപ്പറ്റി ദേശീയ അധ്യക്ഷന്‍ അമിത് ഷാ വിശദീകരിച്ചു. പ്രധാനമന്ത്രി നരേന്ദ്ര മോദി അഭ്യാസവര്‍ഗിന്റെ സമാപന പരിപാടിയില്‍ പ്രസംഗിക്കും.
ലോക്‌സഭയിലെയും രാജ്യസഭയിലെയും 350ലേറെ എംപിമാരാണ് വര്‍ഗില്‍ പങ്കെടുക്കുന്നത്. എല്ലാവരും പരിശീലനത്തില്‍ പങ്കെടുക്കണമെന്ന് കര്‍ശന നിര്‍ദേശമാണ് പാര്‍ട്ടി നല്‍കിയത്. പുതിയ എംപിമാര്‍, പുതുതായി പാര്‍ട്ടിയില്‍ ചേര്‍ന്ന് എംപിമാരായവര്‍ തുടങ്ങിയ നിരവധി നേതാക്കള്‍ ഇത്തവണ പാര്‍ലമെന്റില്‍ എത്തിയതോടെയാണ് എംപിമാര്‍ക്ക് പാര്‍ട്ടിയെപ്പറ്റി പഠിപ്പിക്കാന്‍ തീരുമാനിച്ചത്.
