ലങ്കാദ്വീപിനെക്കുറിച്ചുള്ള വിഭീഷണന്റെ വിവരങ്ങള് തുടര്ന്നു. ‘സമുദ്രത്തിന് അലങ്കാരമായ ലങ്കയത്രയും രത്നമയമാണ്. ബ്രഹ്മദേവന്റെ അനുവാദത്തോടെ രാക്ഷസന്മാര് അവരുടെ ഉത്ഭവകാലത്ത് ലങ്ക സ്വന്തമാക്കുകയായിരുന്നു. ദൈത്യന്മാരുടെ ശില്പിയായ മയനാണ് ലങ്കാനഗരി രൂപകല്പന ചെയ്തത്. സര്വൈശ്വര്യങ്ങളോടും കൂടി ലങ്കയില് അഹങ്കരിച്ചു വാണ രാക്ഷസന്മാര് മറ്റു ജനങ്ങളെ ദ്രോഹിക്കാന് തുടങ്ങി. ഇതു കണ്ട മഹാവിഷ്ണു അവരെ സംഹരിച്ചു.ശേഷിച്ച രാക്ഷസന്മാര് പാതാളത്തില് ഓടിയൊളിച്ചു.
ജനങ്ങളില്ലാതെ ശൂന്യമായ ലങ്കയില് വൈശ്രവണന്, സ്വപിതാവായ വിശ്രവസ്സു മഹര്ഷിയുടെ ഉപദേശപ്രകാരം കുറേക്കാലം കഴിഞ്ഞു. വൈകാതെ രാവണന്, കുബേരനെ ആട്ടിയോടിച്ച്, ലങ്ക സ്വാധീനത്തിലാക്കി. ‘ ഉത്ഭവകഥ പറഞ്ഞു തീര്ത്തശേഷം വിഭീഷണന് ലങ്കയുടെ ഇപ്പോഴത്തെ അവസ്ഥയെന്തെന്ന് പറഞ്ഞു തുടങ്ങി.
‘രാവണന് ലങ്കയുടെ അധിപനായതോടെ പാതാളത്തിലേക്കോടിപ്പോയ രാക്ഷസന്മാര് തിരിച്ചെത്തി. മയാചാരിയെക്കൊണ്ട് ലങ്കയെ പൂര്വാധികം വിസ്തൃതവും മനോഹരവുമാക്കി പണിതു. മാനം തൊടുന്ന ഏഴു കോട്ടമതിലുകളും അവയ്ക്കു ചുറ്റും പാതാളത്തോളം ആഴത്തില് കിടങ്ങുകളും തീര്ത്തു. മഹാനഗരിയുടെ കേന്ദ്രസ്ഥാനത്ത് ഒമ്പതു നില മാളികയിലാണ് ലങ്കേശ്വരന് വാഴുന്നത്. രാജ്യം കാക്കുന്നതിന് കോടിക്കണക്കിനുള്ള രാക്ഷസപ്പട സദാ സന്നദ്ധരായി നില്ക്കുന്നു.
ലങ്കയില് 64 മന്ത്രിമാരും അവര്ക്ക് വേറെവേറെ മഹാസേനകളുമുണ്ട്. കൂടാതെ പുരോഹിതര്, ആചാര്യന്മാര്, വൈദ്യന്മാര്, ജ്യോത്സ്യന്മാര്, മാന്ത്രികര്, ഒറ്റുകാര്, ദൂതന്മാര് തുടങ്ങി വിവിധകര്മമേഖലകളിലായി അനേകലക്ഷം വിദ്ഗ്ധരുണ്ട്. സാമ്പത്തികമായും രാഷ്ട്രീയമായും ലങ്ക സുരക്ഷിതം. മൂര്ത്തിത്രയത്തിന് പോലും അങ്ങോട്ടൊന്ന് എത്തിനോക്കാന് കഴിയാത്ത അവസ്ഥയിലാണ്.
വിവാഹിതനാണ് രാവണന്. മണ്ഡോദരി, വന്യമാല എന്നിങ്ങനെ രണ്ടു ഭാര്യമാരുണ്ട്. മേഘനാദന്, ത്രിശിരസ്സ്, അക്ഷകുമാരന്, അതികായന് എന്നിങ്ങനെ നാലുപുത്രന്മാര്. അതില് അക്ഷയകുമാരന് ജീവിച്ചിരിപ്പില്ല. അതികായന് വന്ധ്യയായ ധന്യമാലയുടെ വളര്ത്തു പുത്രനാണ്. മറ്റു മൂവരും മണ്ഡോദരിയുടെ പുത്രന്മാര്. അനേകശതം വാരവിലാസിനിമാരില് ആയിരക്കണക്കിന് മക്കള് വേറെയുണ്ട്. അതേക്കുറിച്ച് ഞാന് പറയുന്നില്ല.
ലങ്കയില് ഒട്ടേറെ കാളീക്ഷത്രങ്ങളും ശിവക്ഷേത്രങ്ങളുമുണ്ട്. അദ്ദേഹം ഒരു ശിവഭക്തനാണ്. ശാസ്ത്രങ്ങളിലും കലകളിലും അതിനിപുണനുമാണ്. പരസ്ത്രീപരിഗ്രഹം വെടിഞ്ഞാല് എന്റെ ജ്യേഷ്ഠന് മാന്യനായി തീരേണ്ടതാണ്. എന്നാല് അവസ്ഥ മറ്റൊന്നായിപ്പോയി. ‘ എത്ര കുടിലനെങ്കിലും വിഭീഷണന് തന്റെ സഹോദരന്റെ കഴിവുകള് പരാമര്ശിക്കാന് മറന്നില്ല.
( തുടരും)
