മൊഹാലി: ഐപിഎല്ലില് രാജസ്ഥാന് റോയല്സിനെതിരായ വിജയത്തില് കിങ്സ് ഇലവന് പഞ്ചാബിന് വഴിത്തിരിവായത് നായകന് രവിചന്ദ്ര അശ്വിന്റെ ഒാള്റൗണ്ട് പ്രകടനം. ബൗളിങ്ങിനൊപ്പം ബാറ്റിങ്ങിലും താരം തിളങ്ങിയതോടെയാണ് പഞ്ചാബ് പന്ത്രണ്ട് റണ്സിന്റെ ഉജ്ജ്വല വിജയം സ്വന്തമാക്കിയത്.
പഞ്ചാബിനായി മുന്നിര ബാറ്റ്സ്മാന്മാര് ഭേദപ്പെട്ട പ്രകടനം നടത്തിയപ്പോള് അവസാന ഓവറുകളില് അശ്വിന് തകര്ത്തടിച്ചു. അവസാന ഓവറില് ബാറ്റ് ചെയ്യാനെത്തിയ അശ്വിന് നാല് പന്തില് രണ്ട് സിക്സും ഒരു ഫോറും അടക്കം 17 റണ്സ് നേടി പുറത്താകാതെനിന്നു. ഇതോടെയാണ് പഞ്ചാബിന്റെ സ്കോര് 180 കടന്നത്. അശ്വിന് നാലോവറില് 24 റണ്സിന് രണ്ട് വിക്കറ്റ് വീഴ്ത്തി. ഓപ്പണര് രാഹുല് ത്രിപാഠി, ആഷ്ടണ് ടേര്ണര് എന്നിവരുടെ വിക്കറ്റുകളാണ് അശ്വിന് വീഴ്ത്തിയത്്.
ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ പഞ്ചാബ് ഇരുപതോവറില് ആറു വിക്കറ്റിന് 182 റണ്സ് നേടി. മറുപടി ബാറ്റിങ്ങിനിറങ്ങിയ രാജസ്ഥാന് ഇരുപതോവറില് ഏഴു വിക്കറ്റിന് 170 റണ്സില് ഒതുങ്ങി.
183 റണ്സ് വിജയലക്ഷ്യവുമായി കളത്തിലിറങ്ങിയ രാജസ്ഥാനായി ഓപ്പണര് രാഹുല് ത്രിപാഠി അര്ധസെഞ്ചുറി നേടി. 45 പന്തില് നാല് ഫോറോടെ 50 റണ്സ് നേടി. ജോസ് ബട്ലര് പതിനേഴ് പന്തില് രണ്ട് സിക്സും ഒരു ഫോറും അടക്കം 23 റണ്സ് നേടി. സഞ്ജു സാംസണ് (27), അജിങ്ക്യ രഹാനെ (26) എന്നിവര് ചെറിയ സ്കോറുകളില് പുറത്തായി. ഓള് റൗണ്ടര് സ്റ്റുവേര്ട്ട് ബിന്നി ആഞ്ഞടിച്ചെങ്കിലും വിജയം കാണാനായില്ല. ബിന്നി 11 പന്തില് മൂന്ന് സിക്സും രണ്ട് ഫോറും അടക്കം 33 റണ്സ്് നേടി പുറത്താകാതെനിന്നു.
പഞ്ചാബിനായി മുന്നിര ബാറ്റ്സ്മാന്മാര് ഭേദപ്പെട്ട രീതിയില് ബാറ്റ് വീശി. ഓപ്പണര് കെ.എല്. രാഹുലിന്റെ അര്ധസെഞ്ചുറിയാണ് പഞ്ചാബ് സ്കോര് മുന്നോട്ടു നയിച്ചത്. രാഹുല് 47 പന്തില് രണ്ട് സിക്സും മൂന്ന് ഫോറും അടക്കം 52 റണ്സ് നേടി. വിന്ഡീസ് താരം ക്രിസ് ഗെയില് (30), അഗര്വാള് (26), ഡേവിഡ് മില്ലര് (40) എന്നിവര്ക്ക് മികച്ച തുടക്കം ലഭിച്ചെങ്കിലും വലിയ സ്കോര് കണ്ടെത്തുന്നതില് പരാജയപ്പെട്ടു. രാജസ്ഥാനായി ഫാസ്റ്റ് ബൗളര് ജോഫ്രെ ആര്ച്ചര് മൂന്ന് വിക്കറ്റ് വീഴ്ത്തി.
