റാഞ്ചി: സ്വന്തം തട്ടകത്തില്‍ റാഞ്ചിയുടെ പുത്രന്‍ മഹേന്ദ്രസിങ് ധോണിക്ക് അതിവിശിഷ്ടമായ സമ്മാനം ഒരുക്കാന്‍ കോഹ്‌ലിയും കൂട്ടുകാരും ഒരുങ്ങുന്നു. ഇന്ന് ഓസ്‌ട്രേലിയക്കെതിരായ മൂന്നാം ഏകദിനത്തില്‍ വിജയം പിടിച്ചെടുത്ത് പരമ്പര പോക്കറ്റിലാക്കി മുന്‍ നായകന് സമര്‍പ്പിക്കാനുള്ള പുറപ്പാടിലാണ് ഇന്ത്യ. റാഞ്ചിയില്‍ ഇന്ത്യന്‍ ജേഴ്‌സിയില്‍ ധോണിയുടെ അവസാന മത്സരമായേക്കും ഈ പോരാട്ടം. ഉച്ചകഴിഞ്ഞ് 1.30ന് കളി തുടങ്ങും.
ആദ്യ രണ്ട് മത്സരങ്ങളും സ്വന്തമാക്കിയ ഇന്ത്യ അഞ്ചു മത്സരങ്ങളുടെ പരമ്പരയില്‍ 2-0ന് മുന്നിലാണ്. തുടര്‍ച്ചയായ മൂന്നാം വിജയത്തോടെ പരമ്പരയില്‍ അപരാജിത ലീഡു നേടുകയാണ് കോഹ്‌ലിപ്പടയുടെ ലക്ഷ്യം.
ഈ പരമ്പരയിലെ ഓരോ മത്സരത്തിലും ധോണിക്ക് ആരാധകരില്‍ നിന്ന് അകമഴിഞ്ഞ പിന്തുണയാണ് ലഭിക്കുന്നത്. റാഞ്ചിയിലെ സ്വന്തം ആരാധകരും ധോണിക്ക് ഉറച്ച പിന്തുണ നല്‍കും.
ആദ്യ രണ്ട് മത്സരങ്ങള്‍ കീശയിലാക്കിയെങ്കിലും ഇന്ത്യക്ക് മുന്‍നിരയുടെ ബാറ്റിങ്ങില്‍ ചില പ്രശ്‌നങ്ങളുണ്ട്. സീനിയര്‍ ബാറ്റ്‌സ്മാന്‍ ശിഖര്‍ ധവാന്റെ മോശം ഫോമാണ് ഇന്ത്യക്ക് തലവേദനയാകുന്നത്. അവസാന പതിനഞ്ച് ഏകദിനമത്സരങ്ങളില്‍ ധവാന് രണ്ട് അര്‍ധ സെഞ്ചുറികള്‍ മാത്രമാണ് നേടാനായത്. എന്നിരുന്നാലും ആദ്യ രണ്ട് മത്സരങ്ങളിലും വിജയം നേടിയ ടീമില്‍ മാറ്റം വരുത്താന്‍ ടീം മാനേജ്‌മെന്റ് തയ്യാറാകാന്‍ സാധ്യതയില്ല. കെ.എല്‍. രാഹുല്‍ മികച്ച ഫോമിലാണ്. ഓപ്പണറാണെങ്കിലും രാഹുലിനെ മൂന്നാം സ്ഥാനത്തേ പരിഗണിക്കൂ.
ആറു വിക്കറ്റിനും എട്ട് റണ്‍സിനുമാണ് ഇന്ത്യ ആദ്യ രണ്ട് മത്സരങ്ങളില്‍ വിജയിച്ചത്. പക്ഷെ അവസാന നിമിഷങ്ങളില്‍ കടുത്ത സമ്മര്‍ദ്ദത്തിലൊടുവിലാണ് വിജയങ്ങള്‍ നേടിയത്. ഇത് ടീമിന്റെ ആത്മവിശ്വാസം ഉയര്‍ത്തിയതായി ക്യാപ്റ്റന്‍ കോഹ്‌ലി പറഞ്ഞു.
രണ്ട് മത്സരങ്ങളിലും ബൗളിങ് സൂപ്പറായിരുന്നു. ഓസ്‌ട്രേലിയയെ 250നുള്ളില്‍ ഒതുക്കിനിര്‍ത്താനായി. ബുംറയും ഷമിയും കുല്‍ദീപുമൊക്ക തകര്‍ത്തെറിയുന്നുണ്ട്.
ബാറ്റിങ്ങ് നിരയിലെ സ്ഥിരതയാര്‍ന്ന രണ്ടാമത്തെ താരമായ രോഹിത് ശര്‍മ ആദ്യ മത്സരത്തില്‍ തകര്‍ത്തുകളിച്ചു. പക്ഷെ രണ്ടാം മത്സരത്തില്‍ നിറംമങ്ങി. നാലാം നമ്പറായ അമ്പാട്ടി റായ്ഡു ഫോം കണ്ടെത്താന്‍ വിഷമിക്കുകയാണ്. ഈ സാഹചര്യത്തില്‍ രാഹുലിന് നറുക്ക് വീഴാന്‍ സാധ്യതയുണ്ട്.
ഓസ്‌ട്രേലിയയ്‌ക്ക് ഇന്നത്തെ മത്സരം നിര്‍ണായകമാണ്. പരമ്പരയില്‍ തിരിച്ചുവരാന്‍ ആരോണ്‍ ഫിഞ്ചിനും കൂട്ടര്‍ക്കും ഇന്ന് ഇന്ത്യയെ തോല്‍പ്പിക്കണം. ഗ്ലെന്‍ മാക്‌സ്‌വെല്‍, മാര്‍കസ് സ്‌റ്റോയിനിസ്, ഷോണ്‍ മാര്‍ഷ്, പീറ്റര്‍ ഹാന്‍ഡ്‌സ്‌കോമ്പ് തുടങ്ങിയവരാണ് അവരുടെ ശക്തി കേന്ദ്രങ്ങള്‍.
