ഡര്ബന്: ഒറ്റയ്ക്ക് പൊരുതിയ കുശാല് പെരേര സെഞ്ചുറിയുമായി അജയ്യാനായ് നിന്ന് ശ്രീലങ്കയെ വിജയത്തിലേക്ക് കൈപിടിച്ചുയര്ത്തി. ആദ്യ ടെസ്റ്റില് ഒരു വിക്കറ്റിനാണ് ശ്രീലങ്ക ദക്ഷിണാഫ്രിക്കയെ തകര്ത്തത്. കുശാല് 153 റണ്സുമായി കീഴടങ്ങാതെ നിന്നു. ടെസ്റ്റില് കുശാലിന്റെ ഉയര്ന്ന സ്കോറാണിത്. 200 പന്ത് നേരിട്ട കുശാല് പന്ത്രണ്ട് ഫോറും അഞ്ച് സിക്സറും അടിച്ചു. പെരേരയാണ് കളിയിലെ താരം.
304 റണ്സ് വിജയത്തിലേക്ക് ബാറ്റ് പിടിച്ച ശ്രീലങ്കയുടെ ഒമ്പതാം വിക്കറ്റ് വീഴുമ്പോള് സ്കോര് ബോര്ഡില് 226 റണ്സ്. പിന്നീടെത്തിയ ഫെര്നാന്ഡോ കുശാലിനൊപ്പം പിടിച്ചുനിന്നതോടെ ശ്രീലങ്ക വിജയ പീഠം കയറി. ഒമ്പത് വിക്കറ്റിന് 304. വേര്പിരിയാത്ത അവസാന വിക്കറ്റില് കുശാലും ഫെര്നാന്ഡോയും 78 റണ്സ് കൂട്ടിച്ചേര്ത്തു. ഇതില് ഫെര്നാന്ഡോയുടെ സമ്പാദ്യം ആറു റണ്സ് മാത്രം.
ഒരു ദിവസത്തെ കളി ശേഷിക്കെയാണ് ശ്രീലങ്ക വിജയിച്ചത്. ഇതോടെ രണ്ട് മത്സരങ്ങളുടെ പരമ്പരയില് അവര് 1- 0 ന് മുന്നിലായി.മൂന്നിന് 83 റണ്സെന്ന സ്കോറിനാണ് ശ്രീലങ്ക നാലാം ദിവസം കളി പുനരാരംഭിച്ചത്. ഡിസില്വ 48 റണ്സും ബി ഒ പി ഫെര്നാന്ഡോ 37റണ്സും കുറിച്ചു.
സ്കോര്: ദക്ഷിണാഫ്രിക്ക 235, 259. ശ്രീലങ്ക 191, ഒമ്പതിന് 304.
