മൈസൂര്: ഇന്ത്യ എ ക്കെതിരായ രണ്ടാം അനൗദ്യോഗിക ടെസ്റ്റില് ഇംഗ്ലണ്ട് ലയണ്സ് തോല്വിയിലേക്ക്. ഒന്നാം ഇന്നിങ്ങ്സില് 252 റണ്സ് ലീഡ് വഴങ്ങി ഫോളോ ഓണ് ചെയ്യുന്ന ലയണ്സ് രണ്ടാം ദിനം കളി നിര്ത്തുമ്പോള് വിക്കറ്റ് നഷ്ടം കൂടാതെ 24 റണ്സ് എടുത്തിട്ടുണ്ട്. രണ്ട് ദിവസത്തെ കളിശേഷിക്കെ ഇന്നിങ്ങ്സ് തോല്വി ഒഴിവാക്കാന് അവര്ക്ക് ഇനി 228 റണ്സ് കൂടി വേണം. പത്ത് വിക്കറ്റും കൈയ്യിലുണ്ട്. ഹോള്ഡനും (5), ഡക്കറ്റും (13) പുറത്താകാതെ നില്ക്കുകയാണ്.
ബൗളര്മാരുടെ മികവില് ലയണ്സിനെ 140 റണ്സിന് പുറത്താക്കിയതോടെയാണ് ഇന്ത്യ എയ്ക്ക് ഒന്നാം ഇന്നിങ്ങ്സില് 252 റണ്സ് ലീഡ് ലഭിച്ചത്. ഇന്ത്യ ഒന്നാം ഇന്നിങ്ങ്സില് 392 റണ്സാണെടുത്തത്്.
ഇന്ത്യ എ ബൗളര്മാര് ആഞ്ഞടിച്ചതോടെ ലയണ്സിന് പിടിച്ചുനില്ക്കാനായില്ല. 25 റണ്സ് കുറിച്ച പോപ്പാണ് അവരുടെ ടോപ്പ് സ്കോറര്. ഇന്ത്യ എ ക്കുവേണ്ടി സെയ്നിയും നദീമും മൂന്ന് വിക്കറ്റുകള് വീതം വീഴ്ത്തി. ആരോണിനും ജലജ് സക്സേനയ്ക്കും രണ്ട് വിക്കറ്റുകള് വീതം ലഭിച്ചു.
നേരത്തെ മൂന്നിന് 282 റണ്സെന്ന സ്കോറിന് ഒന്നാം ഇന്നിങ്ങ്സ് പുനരാരംഭിച്ച ഇന്ത്യ എ 392 റണ്സിന് ഓള് ഔട്ടായി.കെ.എസ്. ഭരത് 46 റണ്സ് എടുത്തു. സെയ്നി ഏഴു റണ്സുമായി പുറത്താകാതെ നിന്നു.
ഇംഗ്ലണ്ട് ലയണ്സിന്റെ ചാപ്പല് അറുപത് റണ്സിന് നാലു വിക്കറ്റുകള് വീഴ്ത്തി. ബ്രിഗ്ഗസിന് മൂന്ന്് വിക്കറ്റുകള് ലഭിച്ചു.സ്കോര്: ഇന്ത്യ എ 392, ഇംഗ്ലണ്ട് ലയണ്സ്: 140, വിക്കറ്റ് നഷ്ടം കൂടാതെ 24.
