കോട്ടയം: ഇരുമുടി കെട്ടുമായി ശബരിമലയിലേക്ക് പോകുന്ന അയ്യപ്പഭക്തരെ പിടികൂടി ദര്‍ശനത്തിന് അനുവദിക്കാതെ കസ്റ്റഡിയിലെടുക്കുന്നത് ആചാര ലംഘനവും വിശ്വാസികളുടെ ആവകാശങ്ങളിലുള്ള കടന്നുകയറ്റവുമാണെന്ന് തന്ത്രവിദ്യാപീഠം രക്ഷാധികരിയും യോഗക്ഷേമസഭ മുന്‍ പ്രസിഡന്റുമായ അക്കീരമണ്‍ കാളിദാസന്‍ ഭട്ടതിരിപ്പാട് അഭിപ്രായപ്പെട്ടു.
ശബരിമല തീര്‍ഥാടകരുടെ പുണ്യവും പവിത്രവുമായ സമര്‍പ്പണമാണ് ഇരുമുടിക്കെട്ട്. വ്രതാനുഷ്ഠാനത്തിന്റെ സാഫല്യം സ്വാമിദര്‍ശനമാണ്. ഇരുമുടിയേന്തിയ ഓരോ ഭക്തന്റെയും ലക്ഷ്യവും അതുതന്നെയാണ്. അത് തടസ്സപ്പെടുത്തുന്നത് ഭരണഘടനാദത്തമായ വിശ്വാസ സംരക്ഷണത്തിന്റെ നഗ്‌നമായ ലംഘനമാണ്. ആചാര്യ മതമനുസരിച്ച് പ്രായച്ഛിത്തവും പരിഹാരക്രിയകളും നടത്തേണ്ട ഒന്നാണ് ഇത്.
ശബരിമലയുടെ ചരിത്രത്തില്‍ കേട്ടുകേഴ്‌വിയില്ലാത്ത സമാനതകളില്ലാത്ത സംഭവങ്ങളാണ് നടക്കുന്നത്. യാതൊരു അടിസ്ഥാന സൗകര്യവും ഒരുക്കാത്ത ശബരിമലയിലേക്ക് അതെല്ലാം സഹിച്ച് എത്തുന്ന ഭക്തരോടുള്ള ക്രൂരതയാണ് ഇതെന്നും അദ്ദേഹം പറഞ്ഞു.
