തിരുവനന്തപുരം: ബന്ധുനിയമന വിവാദത്തില്‍ മന്ത്രി കെ.ടി. ജലീലിന് സിപിഎമ്മിന്റെ പൂര്‍ണ പിന്തുണ. ഇന്നലെ ചേര്‍ന്ന സിപിഎം സംസ്ഥാന സെക്രട്ടറിയേറ്റ് ജലീലിന് പൂര്‍ണ പിന്തുണ നല്‍കി. ആക്ഷേപമുള്ളവര്‍ കോടതിയെ സമീപിക്കട്ടെ എന്നാണ് സെക്രട്ടേറിയറ്റിന്റെ നിലപാട്. ആരോപണങ്ങളെക്കുറിച്ചു മന്ത്രി മാധ്യമങ്ങളില്‍ നടത്തിയ പ്രതികരണം തെറ്റിദ്ധാരണയുണ്ടാക്കിയെന്ന വിമര്‍ശനവും ചില അംഗങ്ങള്‍ ഉന്നയിച്ചു. എന്നാല്‍ അത് കൂടുതല്‍ ചര്‍ച്ച ചെയ്യേണ്ടെന്ന നിലപാട് സംസ്ഥാനസെക്രട്ടറി കോടിയേരി ബാലകൃഷ്ണന്‍ യോഗത്തെ അറിയിക്കുകയായിരുന്നു.
പ്രതിപക്ഷ ആരോപണങ്ങള്‍ അടിസ്ഥാനരഹിതമാണെന്ന ജലീലിന്റെ വിശദീകരണം സ്രെകട്ടറിയേറ്റ് അംഗീകരിച്ചു. വിവാദത്തില്‍ മുഖ്യമന്ത്രി പിണറായി വിജയനേയും സിപിഎം സംസ്ഥാനസെക്രട്ടറി കോടിയേരി ബാലകൃഷ്ണനേയും നേരില്‍കണ്ട് കെ.ടി. ജലീല്‍ വിശദീകരണം നല്‍കിയിരുന്നു. ഇത് സെക്രട്ടേറിയറ്റ് മുഖവിലയക്കെടുത്തതോടെ ആരോപണങ്ങള്‍ സെക്രട്ടേറിയേറ്റ് തള്ളിയത്.
മാനദണ്ഡങ്ങള്‍ പാലിച്ചും മതിയായ യോഗ്യത ഉറപ്പുവരുത്തിയുമാണ് ന്യൂനപക്ഷ വികസന ധനകാര്യ കോര്‍പറേഷനിലെ ജനറല്‍ മാനേജര്‍ തസ്തികയില്‍ നിയമനം നടന്നതെന്ന് യോഗം വിലയിരുത്തി. കെ.ടി. അദീബിന്റേത് ഒരു വര്‍ഷത്തേക്കുമാത്രമുള്ള കരാര്‍ നിയമനമാണ്.
ആക്ഷേപമുള്ളവര്‍ കോടതിയെ സമീപിക്കണം. കോടതിയില്‍ നിന്ന് ഏതെങ്കിലും തരത്തിലുള്ള വ്യത്യസ്ത അഭിപ്രായം ഉയര്‍ന്നാല്‍ മാത്രം കൂടുതല്‍ ചര്‍ച്ചകള്‍ നടത്തിയാല്‍മതി. മുസ്ലിം ലീഗ് കെ.ടി. ജലീലിനെതിരെ നിരന്തരം നടത്തിക്കൊണ്ടിരിക്കുന്ന അപവാദപ്രചരണങ്ങളുടെ തുടര്‍ച്ചയാണ് ഇപ്പോള്‍ നടക്കുന്നതെന്നും യോഗത്തില്‍ അഭിപ്രായമുയര്‍ന്നു. അതേസമയം ഷൊര്‍ണ്ണൂര്‍ എംഎല്‍എ പി.കെ.ശശിയ്‌ക്കെതിരെ ഉയര്‍ന്ന പീഡന ആരോപണം ഇന്നലത്തെ സെക്രട്ടേറിയേറ്റിലും ചര്‍ച്ചയായില്ല.
