കോഴിക്കോട്: സര്‍വേയുടെ മറവില്‍ വിവരശേഖരണത്തിനും ആയുധപരിശീലന കേന്ദ്രങ്ങള്‍ തുടങ്ങാനും സിപിഎം നീക്കം. വീടുകള്‍ കേന്ദ്രീകരിച്ച് സിപിഎമ്മിന്റെ പ്രാദേശിക നേതാക്കള്‍ നടത്തുന്ന സര്‍വേയില്‍ കുറഞ്ഞ ചെലവില്‍ കരാട്ടേ, കിക്ക് ബോക്‌സിങ് എന്നിവയില്‍ താല്‍പര്യമുണ്ടോ എന്ന ചോദ്യവുമുണ്ട്.
കണ്ണൂര്‍ ജില്ലയില്‍ യോഗ, മാര്‍ഷ്യല്‍ ആര്‍ട്‌സ് പരിശീലനകേന്ദ്രങ്ങളുടെ മറവില്‍ ആയുധ പരിശീലന കേന്ദ്രങ്ങള്‍ ആരംഭിച്ചിരുന്നു. മറ്റു വിവിധ വിവരങ്ങള്‍ ശേഖരിക്കുന്നതോടൊപ്പം പത്താമത്തെ പട്ടികയിലാണ് കരാട്ടെ പഠിക്കാന്‍ താല്‍പര്യമുണ്ടോ എന്ന ചോദ്യം ചേര്‍ത്തിരിക്കുന്നത്. വീട്ടുടമസ്ഥന്റെയും വീട്ടിലുള്ളവരുടെയും പൂര്‍ണവിവരങ്ങള്‍ പ്രത്യേക ഫോറത്തില്‍ ശേഖരിക്കുകയാണ്. ഇതില്‍ അക്കൗണ്ടുള്ള ബാങ്കിന്റെ അക്കൗണ്ട് നമ്പറും ഐഎഫ്എസ്‌സി കോഡും ആധാര്‍ നമ്പറും ചോദിക്കുന്നുണ്ട്. പ്രളയദുരിത മേഖലയില്‍ നല്‍കുന്ന ഫോറങ്ങളില്‍ 10,000 രൂപ കിട്ടിയോ എന്ന അന്വേഷണവുമുണ്ട്.
സിപിഎമ്മില്‍ പ്രവര്‍ത്തിക്കാന്‍ താല്‍പര്യമുണ്ടോ, സിഐടിയു, ഡിവൈഎഫ്‌ഐ, എസ്എഫ്‌ഐ എന്നീ സംഘടനകളില്‍ ചേരാന്‍ താല്‍പ്പര്യമുണ്ടോ എന്നും സര്‍വേയില്‍ ചോദ്യമുണ്ട്. ഏതൊക്കെ പത്രങ്ങളാണ് വീട്ടില്‍ വരുത്തുന്നതെന്നും ദേശാഭിമാനി വരിക്കാരാകാന്‍ താല്‍പ്പര്യമുണ്ടോ എന്നും സര്‍വേ അന്വേഷിക്കുന്നു. ബാങ്ക് ലോണ്‍, വാഹനം, വിദ്യാഭ്യാസം തുടങ്ങിയ വ്യക്തികളുടെയും കുടുംബത്തിന്റെയും സാമാന്യ വിവരങ്ങള്‍ മുഴുവന്‍ അന്വേഷിക്കുകയാണ് സര്‍വേയിലൂടെ.
തൊഴില്‍ മേഖലകളില്‍ ഏതിനോടാണ് താല്‍പര്യമെന്നും ബാങ്ക് ലോണ്‍, വീടിന്റെ ഘടന എന്നിവയും സര്‍വേയില്‍ അന്വേഷിക്കുന്നു. പ്രദേശത്ത് വരേണ്ട മാറ്റങ്ങളെക്കുറിച്ചും അന്വേഷണങ്ങളുണ്ട്. എന്നാല്‍ ഇത്തരം ചോദ്യങ്ങളുമായി ബന്ധമില്ലാതെയാണ് കരാട്ടെയുള്‍പ്പെടെയുള്ള കായിക പരിശീലനത്തെക്കുറിച്ചുള്ള ചോദ്യമുള്ളത്. താല്‍പ്പര്യമുള്ളവരെ ചേര്‍ത്ത് ആയുധപരിശീലന കേന്ദ്രങ്ങള്‍ ആരംഭിക്കാനാണ് സിപിഎം ലക്ഷ്യമിടുന്നത്. സിപിഎം വളണ്ടിയര്‍ സേന യൂണിഫോമില്‍ പാര്‍ട്ടി പരിപാടികളുടെ ഭാഗമായി മാര്‍ച്ച് നടത്താറുണ്ടെങ്കിലും പരിശീലനങ്ങള്‍ രഹസ്യമായാണ് നടത്താറ്. പുതിയ കേന്ദ്രങ്ങളാരംഭിച്ച് പരസ്യമായ ആയുധപരിശീലനത്തിന് തുടക്കം കുറിക്കാനാണ് സിപിഎം നീക്കം.
കണ്ണൂര്‍ ജില്ലയിലെ പാപ്പിനിശേരി മേഖലയില്‍ പൂട്ടിക്കിടക്കുന്ന ഒരു നെയ്‌ത്ത്ശാല കേന്ദ്രീകരിച്ച് സിപിഎമ്മിന്റെ നേതൃത്വത്തില്‍ കുറേ വര്‍ഷങ്ങളായി രഹസ്യമായി ആയുധപരിശീലനം നടന്നു വരുന്നുണ്ട്.
