പത്തനംതിട്ട: സമൂഹമാധ്യമം വഴിയും പൊതുവേദിയിലും പന്തളം കൊട്ടാരത്തെയും തന്ത്രി കുടുംബത്തെയും അയ്യപ്പഭക്തരെയും അവഹേളിക്കുന്ന മുഖ്യമന്ത്രിയുടെ നിലപാടില് യോഗക്ഷേമസഭ പ്രതിഷേധിച്ചു. കൊട്ടാരത്തെയും തന്ത്രിയെയും യോഗക്ഷേമ സഭാംഗങ്ങളെയും വിമര്ശിക്കുന്ന മുഖ്യമന്ത്രി ആ പദത്തിന് അര്ഹനല്ലെന്ന് ഒരിക്കല്കൂടി തെളിയിക്കുകയാണെന്ന് യോഗക്ഷേമസഭ സംസ്ഥാന പ്രസിഡന്റ് വൈക്കം വി.എന്. നമ്പൂതിരി പറഞ്ഞു. പത്തനംതിട്ട ജില്ലാ ഓഫീസില് ചേര്ന്ന ദക്ഷിണമേഖല യോഗം ഉദ്ഘാടനം ചെയ്യുകയായിരുന്നു അദ്ദേഹം.
ശനിയാഴ്ച സെക്രട്ടറിയേറ്റ് പടിക്കലും ഞായറാഴ്ച സംസ്ഥാനത്ത് 108 കേന്ദ്രങ്ങളിലും പ്രാര്ഥനായജ്ഞങ്ങള് നടത്താന് സഭായോഗം തീരുമാനിച്ചു. ജനറല് സെക്രട്ടറി അഴിയിടം വിജയന്, കെ. കൃഷ്ണന്കുട്ടി, സഭ വനിതാവിഭാഗം പ്രസിഡന്റ് സോയ ടീച്ചര്, സെക്രട്ടറി സുജാത തുടങ്ങിയവര് പങ്കെടുത്തു.
