തിരുവനന്തപുരം: ശബരിമല യുവതിപ്രവേശന വിഷയത്തില് സുപ്രീംകോടതി വിധി നടപ്പാക്കുമെന്ന് മുഖ്യമന്ത്രി പിണറായി വിജയന്. ശബരിമലയില് ഒരു നിയമനിര്മാണത്തിന് സര്ക്കാരില്ല. ഇക്കാര്യത്തില് റിവ്യു ഹര്ജി കൊടുക്കുന്നതടക്കം ഒരു നടപടിയും സര്ക്കാര് ചെയ്യില്ല. സുപ്രീംകോടതി എന്ത് പറയുന്നുവോ അത് നടപ്പാക്കും എന്ന നിലപാടാണ് സര്ക്കാര് നേരത്തെ മുതല് സ്വീകരിച്ചിരുന്നത്.
സര്ക്കാര് നല്കിയ സത്യവാങ്മൂലത്തില് ഹിന്ദു ധര്മശാസ്ത്ര പണ്ഡിതന്മാരുടെ കമീഷന് വെച്ച് അഭിപ്രായം തേടണമെന്ന് കോടതിയില് ആവശ്യപ്പെട്ടതാണ്. പുരുഷനോടൊപ്പം തന്നെ സ്ത്രീയ്ക്കും എല്ലാ അവകാശവുമുണ്ടെന്ന നിലപാടാണ് സര്ക്കാരിന്റേത്.ദേവസ്വം ബോര്ഡ് നല്കുമോ എന്ന ചോദ്യത്തിന് അവരല്ലെ തീരുമാനിക്കേണ്ടതെന്നും മുഖ്യമന്ത്രി മറുപടിയായി പറഞ്ഞു.
ശബരിമലയിലെത്തുന്ന വിശ്വാസികള്ക്ക് സംരക്ഷണമൊരുക്കാന് സര്ക്കാര് എല്ലാവിധ നടപടിയും സ്വീകരിക്കുമെന്ന് മുഖ്യമന്ത്രി പറഞ്ഞു. നിലയ്ക്കലില് വനിതാമാധ്യമപ്രവര്ത്തകരെ തടയുന്ന സ്ഥിതിയുണ്ടായി. അത്തരം സംഭവങ്ങള് ആവര്ത്തിക്കാന് സമ്മതിക്കില്ല. വാഹനങ്ങളില് ആരാണ് യാത്രചെയ്യുന്നതെന്ന് പരിശോധിക്കാനോ നിയമം കയ്യിലെടുക്കാനോ ആരെയും അനുവദിക്കില്ല.വിശ്വാസികള്ക്ക് കാര്യമായ സഹായവും സംരക്ഷണവും നല്കാനാണ് സര്ക്കാര് ശ്രമിക്കുന്നത്. അതിന് തടസ്സമായി നില്ക്കുന്ന ഒന്നിനെയും പ്രോത്സാഹിപ്പിക്കില്ല. വിശ്വാസികള്ക്ക് ശബരിമലയില് പോകാനും പ്രാര്ത്ഥന നടത്താനും സൗകര്യമൊരുക്കും.മുഖ്യമന്തി പറഞ്ഞു.
