റായ്പൂര്: പൊതുമേഖലാ സ്ഥാപനമായ ഭീലായ് സ്റ്റീല് പ്ലാന്റിലുണ്ടായ പൊട്ടിത്തെറിയില് ഒന്പതു പേര് മരിച്ചു. 14 പേര്ക്ക് പരിക്കേറ്റു. പരിക്കേറ്റവരെ ആശുപത്രിയില് പ്രവേശിപ്പിച്ചതായി ഭിലായ് പ്ലാന്റ് അധികൃതര് അറിയിച്ചു.
ഇന്നലെ രാവിലെ 11.30ന് ഗ്യാസ് പൈപ്പ്ലൈനിന്റെ അറ്റകുറ്റപ്പണികള് നടക്കുന്നതിനിടെയായിരുന്നു അപകടം. 20ലേറെ തൊഴിലാളികളാണ് സംഭവസ്ഥലത്തുണ്ടായിരുന്നത്. സ്ഫോടനത്തിന്റെ ശക്തിയില് ജോലിക്കാര് പലയിടങ്ങളിലായി തെറിച്ചു വീണു. ആറു പേരുടെ മൃതദേഹങ്ങള് കത്തിക്കരിഞ്ഞ നിലയിലാണ് കണ്ടെടുത്തത്. പരിക്കേറ്റവര്ക്ക് 80 ശതമാനത്തിലേറെ പൊള്ളലേറ്റതായാണ് റിപ്പോര്ട്ടുകള്. ഇവരില് അഞ്ചുപേരുടെ നില ഗുരുതരമാണ്.
കൂടുതല് പേര് അപകടസ്ഥലത്ത് കുടുങ്ങിക്കിടക്കുന്നതായി പോലീസ് സംശയിക്കുന്നു. കനത്ത പുകയും തീയുമാണ് രക്ഷാദൗത്യങ്ങള്ക്ക് തടസ്സമായത്.
