എടുക്കപ്പെടും കൊടുക്കപ്പെടും

എസ്‌കെ

കര്‍മ്മണി പ്രയോഗത്തില്‍(പാസ്സീവ് വോയിസ്)കമ്പമുള്ളവരാണ് പലരും. ആവശ്യമില്ലാത്തിടത്തും അത് പ്രയോഗിക്കുന്നവരുണ്ട്. തെറ്റായി പ്രയോഗിക്കുന്നവരും കുറവല്ല. ബസ്സപകടം: 20 പേര്‍ കൊല്ലപ്പെട്ടു. ഇവിടെ കൊല്ലപ്പെട്ടു എന്ന് പ്രയോഗിക്കേണ്ടതില്ല. കൊന്നു എന്ന കര്‍ത്തരി പ്രയോഗത്തില്‍(ആക്ടീവ് വോയിസ്)ആകാവുന്നിടത്ത് മാത്രമേ കര്‍മ്മണി പ്രയോഗത്തില്‍ കൊല്ലപ്പെട്ടു എന്ന് ചേരൂ. ബസ്സ് മനപൂര്‍വ്വം ആരെയും കൊല്ലുകയില്ലല്ലോ. അതുകൊണ്ട് മരിച്ചു എന്ന് മതി. ബസ്സപകടം: 20 പേര്‍ മരിച്ചു(ശരി). വെള്ളപ്പൊക്കത്തില്‍ 100ലേറെ പേര്‍ കൊല്ലപ്പെട്ടു എന്ന വാക്യത്തിലും ഈ വൈകല്യമുണ്ട്. വെള്ളപ്പൊക്കത്തില്‍ 100 പേര്‍ മരിച്ചു(ശരി). 

ഒരു ലേഖനത്തില്‍ നിന്ന്: ആശയഗംഭീരന്‍ എന്നാണല്ലോ മഹാകവി കുമാരനാശാന്‍ പൊതുവേ വിശേഷിക്കപ്പെടുന്നത്(ശരി), ആശയഗംഭീരന്‍ എന്നാണല്ലോ മഹാകവി കുമാരനാശാനെ പൊതുവേ വിശേഷിപ്പിക്കുന്നത്(ശരി)

വാര്‍ത്തകളില്‍ നിന്ന്: കെഎസ്ആര്‍ടിസി ജീവനക്കാരെ പുതിയ സര്‍ക്കാരിന്റെ കാലത്തും അവഗണിക്കപ്പെടുകയാണ് ഉണ്ടായതെന്ന് ചില പ്രതിനിധികള്‍ കുറ്റപ്പെടുത്തി(തെറ്റ്). ഈ വാക്യവും മുന്‍ വാക്യത്തെപ്പോലെ രണ്ടുവിധത്തില്‍ ശരിയാക്കാം. കൃത്രിമത്വവും അഭംഗിയുമുള്ള കര്‍മണി പ്രയോഗങ്ങള്‍ അറിയിപ്പുകളിലും പരസ്യങ്ങളിലും കാണാം

ധാന്യങ്ങള്‍ പൊടിച്ചുകൊടുക്കപ്പെടും, അപേക്ഷകള്‍ തയ്യാറാക്കി കൊടുക്കപ്പെടും, അധിക റേഷന്‍ 10വരെ വിതരണം ചെയ്യപ്പെടുന്നതാണ്, മത്സരങ്ങള്‍ യോഗത്തിന് ശേഷമാണ് നടത്തപ്പെടുക. ഈ വാക്യങ്ങളില്‍ കൊടുക്കും, വിതരണം ചെയ്യും, നടത്തുക എന്നിങ്ങനെ ചേര്‍ക്കുന്നതാണ് ഭംഗി. ഈ യോഗത്തിലേക്ക് എന്നെ ക്ഷണിക്കപ്പെട്ടപ്പോള്‍ എന്നത് ചില പ്രസംഗകരുടെ സ്ഥിരം പ്രയോഗമാണ്. എന്നെ ക്ഷണിച്ചപ്പോള്‍ എന്ന് മതി. ക്ഷണിക്കപ്പെട്ടാലേ തൃപ്തിയാകൂ എങ്കില്‍ എന്നെ ഒഴിവാക്കി ഞാന്‍ എന്ന് ചേര്‍ക്കണം. 

പഞ്ചായത്തിനെ പ്രതിനിധീകരിച്ച് വൈസ് പ്രസിഡന്റ് യോഗത്തില്‍ പങ്കെടുത്തു. പ്രതിനിധീകരിക്കുക എന്നാല്‍ പ്രതിനിധിയാക്കല്‍ ആണ്. ഉദ്ദേശിച്ചിരിക്കുന്നത് അതല്ല. പ്രതിനിധിയായിരിക്കുക(പ്രാതിനിധ്യം വഹിക്കുക)എന്നുദ്ദേശിക്കുമ്പോള്‍ പ്രതിനിധാനം ചെയ്തു എന്നേ എഴുതാവൂ. പഞ്ചായത്തിനെ പ്രതിനിധാനം ചെയ്ത് വൈസ് പ്രസിഡന്റ് യോഗത്തില്‍ പങ്കെടുത്തു(ശരി). വിദ്യാര്‍ത്ഥികളെ നിയന്ത്രിക്കാന്‍ രക്ഷകര്‍ത്താക്കള്‍ക്കു കഴിയുന്നില്ല. രക്ഷകര്‍ത്താക്കള്‍(തെറ്റ്), രക്ഷാകര്‍ത്താക്കള്‍(ശരി). ലേബര്‍ ക്യാമ്പില്‍ അയാള്‍ക്ക് രാപ്പകല്‍ പണിയെടുക്കേണ്ടി വന്നു. രാപകല്‍ ആണ് ശരി രൂപം. 

അര്‍ത്ഥത്തിന് തുല്യ പ്രാധാന്യമുള്ള രണ്ടു പദങ്ങള്‍ ചേരുമ്പോള്‍ ഇരട്ടിപ്പ് ആവശ്യമില്ല. രാ+ പകല്‍= രാപകല്‍, കൈ+ കാലുകള്‍= കൈകാലുകള്‍. നമസ്‌തെ എന്ന് പല സ്ഥലങ്ങളിലും എഴുതിവെച്ചിരിക്കുന്നത് കാണാം. നമ: തേ= നമസ്‌തേ. തേ എന്ന് തന്നെ വേണം. നമസ്തുതേയും തെറ്റ്. നമോസ്തുതേ ശരി. ദേശീയോത്ഗ്രഥനത്തിന്റെ കാര്യം പല പ്രാദേശിക കക്ഷികളും മറക്കുന്നു. ദേശീയോത്ഗ്രഥനം(തെറ്റ്), ദേശീയോദ്ഗ്രഥനം(ശരി). 

ഒരു വാര്‍ത്തയുടെ തലക്കെട്ട്:  പാതയോരത്തെ പൊതുയോഗം മറികടക്കാന്‍ നിയമം വ്യവസ്ഥകള്‍ റദ്ദാക്കിയ ഹൈക്കോടതി വിധിക്ക് സ്‌റ്റേയില്ല. അര്‍ത്ഥം ആലോചിച്ചാല്‍ ആരും കുഴങ്ങിപ്പോകും. 

പിന്‍കുറിപ്പ്: 

കടകള്‍ തുറന്നില്ല

വണ്ടികള്‍ ഓടിയില്ല. ഇത് പത്രഭാഷയിലാക്കുക

ഉത്തരം: കടകമ്പോളങ്ങള്‍ അടഞ്ഞുകിടന്നു, വാഹനങ്ങള്‍ നിരത്തിലിറങ്ങിയില്ല.