ലഖ്‌നൗ: കോണ്‍ഗ്രസ് മുന്‍ അധ്യക്ഷ സോണിയാ ഗാന്ധിയുടെ മണ്ഡലത്തില്‍ എംപി ഫണ്ട് വിനിയോഗിക്കാനൊരുങ്ങി കേന്ദ്ര ധനമന്ത്രി അരുണ്‍ ജെയ്റ്റ്‌ലി. ഗാന്ധികുടുംബം കൈപ്പിടിയിലൊതുക്കിയിരിക്കുന്ന മണ്ഡലമാണ് റായ്ബറേലി. ഉത്തര്‍പ്രദേശില്‍ നിന്നുള്ള രാജ്യസഭാ എംപിയാണ് അരുണ്‍ ജെയ്റ്റ്‌ലി. ഒരുമാസം മുമ്പാണ് എംപിമാരുടെ പ്രാദേശിക വികസന ഫണ്ട് വിനിയോഗിക്കാന്‍ റായ്ബറേലി ജില്ലയെ അരുണ്‍ ജെയ്റ്റ്‌ലി തിരഞ്ഞെടുത്തത്.
പ്രമുഖ രാഷ്‌ട്രീയ കുടുംബം പ്രതിനിധീകരിക്കുന്ന ജില്ലയായിട്ടും റായ്ബറേലി പിന്നാക്കാവസ്ഥയിലാണ്. കൂടാതെ ജില്ലയില്‍ നിന്ന് വിവിധ ആവശ്യങ്ങളും ഉയര്‍ന്നുവന്നു, ഇതാണ എംപി ഫണ്ട് വിനിയോഗിക്കാന്‍ റായ്ബറേലിയെ തെരഞ്ഞെടുക്കാന്‍ അരുണ്‍ ജെയ്റ്റ്‌ലിയെ പ്രേരിപ്പിച്ചതെന്ന് ഉത്തര്‍പ്രദേശ് ബിജെപി വക്താവ് ഹീറോ ബാജ്‌പേയി പറഞ്ഞു. പ്രാദേശിക വികസന ഫണ്ടായ അഞ്ചു കോടി രൂപയിലെ രണ്ടരക്കോടി രൂപ റായ്ബറേലി ചീഫ് ഡെവലപ്‌മെന്റ് ഓഫീസറുടെ പക്കലെത്തിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
നവംബറിലെ രണ്ടാമത്തെ ആഴ്ച ജെയ്റ്റ്‌ലി റായ്ബറേലി മണ്ഡലത്തില്‍ പര്യടനം നടത്തുമെന്നു പറഞ്ഞ ബാജ്‌പേയി 2019ലെ ലോക്‌സഭാ തെരഞ്ഞെടുപ്പില്‍ റായ്ബറേലിയില്‍ സോണിയാ ഗാന്ധിക്കെതിരെ ജെയ്റ്റ്‌ലി മത്സരിക്കില്ലെന്നും എന്നാല്‍ മേഖലയില്‍ ബിജെപിയെ ശക്തിപ്പെടുത്താനുള്ള ശ്രമങ്ങള്‍ നടത്തുമെന്നും കൂട്ടിച്ചേര്‍ത്തു.
സ്റ്റേഡിയത്തിനും സര്‍വകലാശാലയ്‌ക്കും ജനങ്ങള്‍ ആവശ്യമുയര്‍ത്തിയിട്ടുണ്ട്. കൂടാതെ ഒറ്റപ്പെട്ട മേഖലയില്‍ നിന്നുള്ളവര്‍ സോളാര്‍ വൈദ്യുത വിളക്കുകളും ആവശ്യപ്പെട്ടിട്ടുണ്ട്. ജില്ലയിലെ പൂര്‍ത്തിയാകാത്ത നിര്‍മാണപ്രവര്‍ത്തനങ്ങള്‍ ഉടന്‍ തന്നെ പൂര്‍ത്തിയാക്കുമെന്നു ബാജ്‌പേയി പറഞ്ഞു.
