കൊച്ചി: കന്യാസ്ത്രീയുടെ പീഡന പരാതിയില് ചോദ്യം ചെയ്യലിനുശേഷം പോലീസിന് തെളിവുകള് ഉണ്ടെങ്കില് ജലന്ധര് ഫ്രാങ്കോ മുളയ്ക്കലിനെ അറസ്റ്റ് ചെയ്യുന്നതില് തടസമില്ലെന്ന് ഹൈക്കോടതി വ്യക്തമാക്കി. ബിഷപ്പ് സമര്പ്പിച്ച മുന്കൂര് ജാമ്യാപേക്ഷ പരിഗണിക്കുന്നത് കോടതി ഈ മാസം 25 ലേക്ക് മാറ്റിവച്ചു. ജസ്റ്റിസ് രാജാ വിജയരാഘവന്റെ ബെഞ്ചാണ് ഹര്ജി പരിഗണിക്കുന്നത്.
അടിയന്തരമായി ഹര്ജി പരിഗണിക്കണം എന്ന് ജാമ്യാപേക്ഷയില് മുളയ്ക്കല് ആവശ്യപ്പെട്ടിരുന്നു. എന്നാല് ഹര്ജിയില് സര്ക്കാരിനോട് കോടതി വിശദീകരണം തേടി. അറസ്റ്റ് തടയണമെന്ന് ബിഷപ്പിന്റെ അഭിഭാഷകന് ആവശ്യപ്പെട്ടില്ല. ബുധനാഴ്ച പോലീസ് ചോദ്യം ചെയ്യാനിരിക്കെയാണ് ഫ്രാങ്കോ മുളയ്ക്കല് ഇന്ന് കോടതിക്ക് മുന്പാകെ മുന്കൂര് ജാമ്യാപേക്ഷ സമര്പ്പിച്ചത്. എന്നാല് ചോദ്യം ചെയ്യലിനുശേഷം പോലീസിന് തെളിവുകള് ഉണ്ടെങ്കില് ഫ്രാങ്കോ മുളയ്ക്കലിനെ അറസ്റ്റ് ചെയ്യുന്നതില് തടസമില്ലെന്നും കോടതി വ്യക്തമാക്കി. അറസ്റ്റിന് സാധ്യതയുണ്ടെന്ന നിയമോപദേശത്തിന്റെ പശ്ചാലത്തലത്തിലാണ് ബിഷപ്പ് ഫ്രാങ്കോ മുളയ്ക്കല് മുന്കൂര് ജാമ്യാപേക്ഷ നല്കിയത്.
കന്യാസ്ത്രീക്ക് തന്നോട് വ്യക്തിവൈരാഗ്യം ഉണ്ടെന്നും അതിനാലാണ് ഇത്തരത്തില് ഒരു പരാതി നല്കിയത് എന്നുമാണ് ജാമ്യാപേക്ഷയില് ഫ്രാങ്കോ മുളയ്ക്കല് ഉന്നയിച്ചിരിക്കുന്നത്. കന്യാസ്ത്രീ മഠത്തിലെ സ്ഥിരം ശല്യക്കാരിയായിരുന്നു. അവര്ക്കെതിരെ ഗുരുതര ആരോപണങ്ങള് ഉയരുകയും ഇതിന്റെ തെളിവുകള് സഭയ്ക്ക് ലഭിക്കുകയും ചെയ്തു. ആരോപണങ്ങള്ക്കെതിരെ താന് ഉള്പ്പടെയുള്ള സംഘം അന്വേഷണത്തിന് ഉത്തരവിട്ടു. കന്യാസ്ത്രീയെ ചുമതലകളില് നിന്നും നീക്കി. ഇതിനു പിന്നില് താനാണ് എന്ന തെറ്റിദ്ധാരണയാണ് വ്യക്തിവൈരാഗ്യം ഉണ്ടാകാന് കാരണം എന്നും മുന്കൂര് ജാമ്യാപേക്ഷയില് പറയുന്നു.
