കണ്ണൂര്: പാല് ഉല്പ്പാദനത്തിന്റെ കാര്യത്തില് സംസ്ഥാനം സ്വയംപര്യാപ്തതയിലേക്ക് കടക്കുകയാണെന്ന് ടി.വി.രാജേഷ് എംഎല്എ. പാല് ഗുണനിയന്ത്രണ ജാഗ്രതാ യജ്ഞത്തിന്റെ ഭാഗമായി ക്ഷീര വികസനവകുപ്പും കടന്നപ്പള്ളി തെക്കേക്കര ക്ഷീരോല്പ്പാദക സഹകരണ സംഘവും സംഘടിപ്പിച്ച പാല് ഗുണനിലവാര ബോധവല്ക്കരണ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ചന്തപ്പുര ഗ്രാമപഞ്ചായത്ത് സംസ്കാരിക നിലയത്തില് നടന്ന ചടങ്ങില് കടന്നപ്പള്ളി പാണപ്പുഴ പഞ്ചായത്ത് പ്രസിഡണ്ട് ഇ.പി.ബാലകൃഷ്ണന് അധ്യക്ഷത വഹിച്ചു.
ജൂണ് ഒന്നു മുതല് ആഗസ്റ്റ് 31 വരെ നടക്കുന്ന പാല് ഗുണനിയന്ത്രണ ജാഗ്രതാ യജ്ഞത്തിന്റെ ഭാഗമായാണ് ക്ഷീര വികസന വകുപ്പിന്റെ നേതൃത്വത്തില് ബോധവല്ക്കരണ ക്ലാസ് സംഘടിപ്പിച്ചത്. ശുദ്ധമായ പാല് ഉല്പാദനം എന്ന വിഷയത്തില് കണ്ണൂര് ക്ഷീര വികസന വകുപ്പ് അസിസ്റ്റന്റ് ഡയറക്ടറും ക്വാളിറ്റി കണ്ട്രോള് റൂം ഓഫീസറുമായ എന്.വി രജീഷ് കുമാറും, പാല് പരിശോധനയുടെ പ്രാധാന്യം എന്ന വിഷയത്തില് തളിപ്പറമ്പ് ക്ഷീര വികസന വകുപ്പ് ഓഫീസര് മെറിന് ജേക്കബ് തോമസും ക്ലാസെടുത്തു. പരിപടിയില് ക്വാളിറ്റി കണ്ട്രോള് റൂം ലാബ് ടെക്നീഷ്യന് സുനില് കുമാര് കെ.പി ഗുണനിലവാര പരിശോധനയുടെ ഡമോണ്സ്ട്രേഷന് അവതരിപ്പിച്ചു.
ഗ്രാമ പഞ്ചായത്ത് മെമ്പര് കെ.രാമചന്ദ്രന് മാസ്റ്റര്, സഹകരണ സംഘം മുന് പ്രസിഡന്റ് പി.വി ഭാസ്കരന് തുടങ്ങിയവര് സംസാരിച്ചു. സഹകരണ സംഘം പ്രസിഡന്റ് പി.കെ കൃഷ്ണന് സ്വാഗതവും സെക്രട്ടറി കെ.സുവര്ണ്ണന് നന്ദിയും പറഞ്ഞു.
