കേന്ദ്ര പദ്ധതികള്‍ നടപ്പാക്കുന്നതില്‍ കേരളത്തിന് അലംഭാവം: കേന്ദ്രമന്ത്രി വിജയ് ഗോയല്‍

ന്യൂദല്‍ഹി: കേരള സര്‍ക്കാരിന്റെ വികസന വിരുദ്ധ മനോഭാവത്തിനെതിരെ ആഞ്ഞടിച്ച് കേന്ദ്ര പാര്‍ലമെന്ററികാര്യ സഹമന്ത്രി വിജയ് ഗോയല്‍. കേന്ദ്ര പദ്ധതികള്‍ നടപ്പാക്കാന്‍ കേരളം താല്‍പര്യമെടുക്കുന്നില്ലെന്നും സമയബന്ധിതമായി പൂര്‍ത്തിയാക്കുന്നില്ലെന്നും മന്ത്രി പറഞ്ഞു.

ആറായിരം കോടിയിലേറെ രൂപയുടെ നഷ്ടമാണ് രാജ്യത്തിന് സംസ്ഥാനം വരുത്തിവച്ചത്. കേരളത്തിന്റെ ഗതാഗത മേഖലയുടെ വികസനവുമായി ബന്ധപ്പെട്ട് ‘ജന്മഭൂമി’ ദല്‍ഹി അശോക ഹോട്ടലില്‍ സംഘടിപ്പിച്ച ‘ട്രാന്‍സ്‌കേരള കോണ്‍ക്ലേവ്’ ഉദ്ഘാടനം ചെയ്യുകയായിരുന്നു കേന്ദ്രമന്ത്രി. 

അടിസ്ഥാന സൗകര്യ വികസന മേഖലയില്‍ 21,774.25 കോടിരൂപ ചെലവില്‍ 21 പദ്ധതികള്‍ കേന്ദ്രം കേരളത്തിന് അനുവദിച്ചിരുന്നു. പദ്ധതി വൈകിയതോടെ ചെലവ് 27,871.82 കോടിയിലെത്തി. 6,097.57 കോടി രൂപയാണ് സംസ്ഥാന സര്‍ക്കാരിന്റെ മെല്ലപ്പോക്ക് കാരണം പാഴാകുന്നത്. വികസനത്തില്‍ കേരളത്തിന് പൂര്‍ണ സഹകരണം കേന്ദ്ര സര്‍ക്കാര്‍ നല്‍കും. കൊച്ചി വൈപ്പിനിലെ എല്‍പിജി ടെര്‍മിനല്‍ പദ്ധതിക്കെതിരേ പ്രദേശവാസികളുടെ എതിര്‍പ്പുണ്ടായപ്പോഴും പ്രശ്‌നങ്ങള്‍ പരിഹരിച്ചെന്നാണ് സംസ്ഥാന സര്‍ക്കാര്‍ അറിയിച്ചത്. പദ്ധതി 2019 മെയ് മാസത്തില്‍ പൂര്‍ത്തിയാക്കാനാണ് ലക്ഷ്യമിട്ടത്. ഇനി എന്താകും ഭാവിയെന്ന് അറിയില്ല. 

 കൊച്ചി-സേലം ഗ്യാസ് പൈപ് ലൈന്‍ പദ്ധതിയില്‍ ഭൂമി ഏറ്റെടുക്കാനും അലൈന്‍മെന്റ് നിശ്ചയിക്കാനും സംസ്ഥാനം നടപടിയെടുത്തില്ല. അങ്കമാലി-എരുമേലി ശബരിമല റെയില്‍ പാതയുടെ ചെലവ് കേന്ദ്രവും സംസ്ഥാനവും തുല്യമായി വഹിക്കാമെന്ന് ആദ്യം അറിയിച്ച കേരളം ഇപ്പോള്‍ പറ്റില്ലെന്നാണ് അറിയിച്ചിരിക്കുന്നത്.

പദ്ധതിയിലൂടെ 130 കിലോ മീറ്റര്‍ പുതിയ റെയില്‍ പാളമുണ്ടായാല്‍ അഞ്ച് നഗരസഭകളിലും 11 ചെറിയനഗരങ്ങളിലും പുതിയ റെയില്‍വേ സ്റ്റേഷനുണ്ടാകും. പദ്ധതി കേന്ദ്രം അവസാനിപ്പിക്കില്ല. സംസ്ഥാനത്തിന്റെ സ്ഥിതിവിവര സമാഹരണ ശേഷി മെച്ചപ്പെടുത്താനും അടിസ്ഥാന സൗകര്യം വികസിപ്പിക്കാനും കേന്ദ്രം 15 കോടി രൂപ നല്‍കിയതായും മന്ത്രി വ്യക്തമാക്കി. 

 ചടങ്ങില്‍ വി. മുരളീധരന്‍ എംപി അധ്യക്ഷത വഹിച്ചു. വികസന സൂചികകളില്‍ കേരളം മുന്‍പന്തിയിലാണെങ്കിലും സാമ്പത്തിക മേഖല പൂര്‍ണമായും പ്രവാസികളെ ആശ്രയിച്ചാണിരിക്കുന്നതെന്ന് അദ്ദേഹം പറഞ്ഞു. സംസ്ഥാനത്തെ ഗതാഗത മേഖലയുടെ വികസനം ദുഷ്‌കരമാണ്. വ്യക്തിപരവും രാഷ്‌ട്രീയപരവുമായ താല്‍പര്യത്തിന്റെ പേരില്‍ റോഡ് ഗതാഗത വികസനം തടസ്സപ്പെടുകയാണെന്നും കേരളത്തിന്റെ വികസനത്തില്‍ ജന്മഭൂമി കോണ്‍ക്ലേവ് നിര്‍ണായകമാകുമെന്നും അദ്ദേഹം ചൂണ്ടിക്കാട്ടി.

ജന്മഭൂമി എംഡി എം.രാധാകൃഷ്ണന്‍ സംസാരിച്ചു. ജന്മഭൂമിയുടെ രണ്ടാമത് ദല്‍ഹി കോണ്‍ക്ലേവാണ് ട്രാന്‍സ് കേരള. സംസ്ഥാനത്തിന്റെ ഗതാഗത വികസനത്തില്‍ നിര്‍ണായകമാകുന്ന ആശയങ്ങളും പദ്ധതികളും വിദഗ്ധര്‍ പങ്കുവെച്ചു.

ആസൂത്രണമില്ലാത്തത് യാത്രാസമയം വര്‍ദ്ധിപ്പിക്കുന്നു – മീനാക്ഷി ലേഖി