നാഗ്പൂര്: ഭാരതീയ ഭാഷകളെയും ലിപികളെയും സംരക്ഷിക്കുന്നതിന് ആവശ്യമായ നടപടികള് ഉണ്ടാവണമെന്ന് ആര്എസ്എസ് അഖില ഭാരതീയ പ്രതിനിധി സഭ പ്രമേയത്തിലൂടെ ആവശ്യപ്പെട്ടു. വിജ്ഞാനം ഏറെയും നിലനിന്നത് നാടന് കലകളിലും നാട്ടു മൊഴികളിലും നാടന് പാട്ടുകളിലുമാണ്. നമ്മുടെ ശ്രേഷ്ഠ സംസ്കാരവും പവിത്രമായ പാരമ്പര്യവും വിശിഷ്ട വിജ്ഞാനവും സംരക്ഷിക്കുന്നതില് ഭാഷകളും ലിപിയും ഏറെ പങ്ക് വഹിച്ചു. വ്യക്തിയുടെയും സമൂഹത്തിന്റെയും സ്വത്വം നിലനിര്ത്തുന്നതില് സുപ്രധാന ഘടകമാണ് ഭാഷയും ലിപികളും. സംസ്കാരത്തിന്റെ സംവാഹക ഘടകമാണ് ഭാഷ. ഭാരതീയ ഭാഷകള് ഉപയോഗിക്കുന്നതില് വന്കുറവുണ്ടാകുന്നു. തദ്ദേശീയ ഭാഷകളില് വിദേശ ഭാഷകളുടെ കലര്പ്പ് ഉണ്ടാകുന്നത് പ്രധാന വെല്ലുവിളിയാണ്. തദ്ദേശീയ ഭാഷകളും ലിപികളും ഇല്ലാതാവുന്നതും നിലനില്പ്പ് അപകടത്തിലാവുന്നതും ഇന്ന് കാണുന്ന മറ്റൊരു പ്രവണതയാണ്.
പ്രാഥമിക വിദ്യാഭ്യാസത്തിന്റെ മാധ്യമം മാതൃഭാഷയോ ഭാരതീയ ഭാഷയോ ആകണമെന്ന് നിഷ്കര്ഷിക്കുന്നതില് രക്ഷിതാക്കളും സര്ക്കാരുകളും ഉചിതമായ നടപടികളെടുക്കണം. നീറ്റ് പരീക്ഷയിലടക്കം യൂണിയന് പബ്ലിക് സര്വ്വീസ് കമ്മീഷന്റെ പരീക്ഷകള് ഭാരതീയ ഭാഷകളിലാക്കിയത് സ്വാഗതാര്ഹമാണ്. മറ്റു മത്സര പരീക്ഷകളിലും ഇത് നടപ്പാക്കണം. നീതിന്യായ മേഖലയിലും നീതി നിര്വ്വഹണവ്യവസ്ഥയിലും സര്ക്കാര് നടപടികളിലും ഭാരതീയ ഭാഷകള്ക്ക് മുന്ഗണന നല്കണം. പൊതു സമൂഹം, സന്നദ്ധ സംഘടനകള്, നയനിര്മ്മാതാക്കള് എന്നിവര് ഭാരതീയഭാഷകളെയും മൊഴികളെയും ലിപിയെയും സംരക്ഷിക്കുന്നതിന് വേണ്ടി ശക്തമായ പരിശ്രമം നടത്തണം.
ലോകത്തുള്ള വ്യത്യസ്ത ഭാഷകള് പഠിക്കുന്നത് വിവിധങ്ങളായ അറിവുകള് സ്വാംശീകരിക്കുന്നതിന് സഹായകരമാണെന്ന് പ്രതിനിധി സഭ കരുതുന്നു. എന്നാല് ബഹുഭാഷാ രാഷ്ട്രമായ ഭാരതത്തില് നമ്മുടെ സംസ്കാരത്തിന്റെ വാഹകരായ ഭാഷകളെ സംരക്ഷിക്കുന്നതിലും വളര്ത്തുന്നതിലും ശക്തമായ നടപടികള് എടുക്കണം. പൊതുസമൂഹം, സര്ക്കാരുകള്, മാധ്യമങ്ങള്, ധാര്മ്മിക സംഘടനകള്, വിദ്യാഭ്യാസ സ്ഥാപനങ്ങള്, ബുദ്ധിജീവികള് എന്നിവര് ഇക്കാര്യത്തില് ഉചിതവും സാധ്യമായതുമായ എല്ലാ നടപടികളും എടുത്ത്, ഭാരതീയ ഭാഷകളുടെ വ്യാകരണം, ലിപി, ഉപയോഗം എന്നിവയിലെ ശുദ്ധി കാത്തുസൂക്ഷിക്കുന്നതില് മുന്നിട്ടിറങ്ങണമെന്നും പ്രമേയം ആവശ്യപ്പെട്ടു.
