മഹാരാഷ്‌ട്ര: മേവാനിക്കും ഉമര്‍ ഖാലിദിനുമെതിരെ കേസ്

മുംബൈ: മഹാരാഷ്‌ട്രയില്‍ ഭീമ കൊറേഗാവ് യുദ്ധത്തിന്റെ ഇരുന്നൂറാം വാര്‍ഷികാഘോഷത്തിന്റെ മറവില്‍ അരങ്ങേറിയ അക്രമങ്ങള്‍ക്ക് പിന്നില്‍ ഭീകരസംഘടനകളുമായി ബന്ധമുള്ളവരാണെന്നതിന്റെ തെളിവുകള്‍ പുറത്തുവരുന്നു. സാമുദായിക സ്പര്‍ദ്ധ വളര്‍ത്തുന്നതരത്തില്‍ പ്രസംഗങ്ങള്‍ നടത്തി അക്രമങ്ങള്‍ക്ക് പ്രേരണ നല്‍കിയ ഗുജറാത്ത് എംഎല്‍എ ജിഗ്നേഷ് മേവാനിക്കും, ദല്‍ഹി ജവഹര്‍ലാല്‍ നെഹ്രു സര്‍വകലാശാലയിലെ വിദ്യാര്‍ത്ഥി നേതാവ് ഉമര്‍ ഖാലിദിനുമെതിരെ പൂനെ പോലീസ് കേസെടുത്തു. ഐപിസി 153(എ), 505, 117 വകുപ്പുകള്‍ പ്രകാരമാണ് കേസെടുത്തിരിക്കുന്നത്.

പാര്‍ലമെന്റ് ആക്രമണക്കേസില്‍ തൂക്കിലേറ്റപ്പെട്ട ഭീകരന്‍ അഫ്‌സല്‍ഗുരുവിന്റെ അനുസ്മരണ ചടങ്ങ് ജെഎന്‍യുവില്‍ സംഘടിപ്പിച്ചതിന്റെ പേരില്‍ ഉമര്‍ ഖാലിദിനെതിരെ ദേശവിരുദ്ധകേസ് പോലീസ് രജിസ്റ്റര്‍ ചെയ്തിരുന്നു. 2016ല്‍ ജെഎന്‍യുവില്‍ നടന്ന അനുസ്മരണചടങ്ങില്‍ ഇന്ത്യാവിരുദ്ധ മുദ്രാവാക്യങ്ങളാണ് ഉയര്‍ന്നത്. ഗുജറാത്ത് എംഎല്‍എ ജിഗ്നേഷ് മേവാനിയുടെ തെരഞ്ഞെടുപ്പ് പ്രചാരണങ്ങള്‍ക്ക് ചുക്കാന്‍ പിടിച്ചത് തീവ്രവാദ വിഭാഗങ്ങളായിരുന്നു. കേരളത്തില്‍ നിന്നുള്ള എസ്ഡിപിവൈ പോലുള്ള തീവ്രവാദ സംഘടനകളും മേവാനിക്കായി പ്രചാരണരംഗത്തുണ്ടായിരുന്നു.

ഡിസംബര്‍ 31ന് ശനിവാര്‍ വാഡയില്‍ നടന്ന ഭീമ കൊറേഗാവ് യുദ്ധവാര്‍ഷികാഘോഷത്തോടനുബന്ധിച്ച് സംഘടിപ്പിച്ച എല്‍ഗാര്‍ പരിഷത്തില്‍ മേവാനിയും ഖാലിദും പങ്കെടുത്തിരുന്നു. ഇരുവരുടെയും ‘തെരുവ് യുദ്ധത്തിന് ആഹ്വാനം ചെയ്തുള്ള തീപ്പൊരിപ്രസംഗങ്ങളാണ് അക്രമങ്ങള്‍ക്ക് പ്രചോദനമായത്. കലാപത്തിന് പ്രേരണയായ പ്രസംഗങ്ങളുടെ പേരിലാണ് പോലീസ് ഇരുവര്‍ക്കുമെതിരെ കേസെടുത്തത്. ഇരുവരുടെയും നീക്കങ്ങള്‍ പോലീസ് നിരീക്ഷിച്ചുവരികയാണ്.

ഇതിനിടെ മേവാനിയും ഉമര്‍ ഖാലിദും പങ്കെടുക്കാന്‍ നിശ്ചയിച്ചിരുന്ന വിദ്യാര്‍ത്ഥിസംഗമത്തിന് പോലീസ് അനുമതി നിഷേധിച്ചു. ജുഹുവിലെ മംഗള്‍ദാസ് ഓഡിറ്റോറിയത്തിലാണ് പരിപാടി സംഘടിപ്പിച്ചിരുന്നത്.

ഭാരിപ്പ ബഹുജന്‍ മഹാസംഘ് അധ്യക്ഷന്‍ പ്രകാശ് അംബേദ്കര്‍ ആഹ്വാനം ചെയ്ത ബന്ദില്‍ അരങ്ങേറിയ അക്രമസംഭവങ്ങളുമായി ബന്ധപ്പെട്ട് വിവിധ പോലീസ് സ്റ്റേഷനുകളിലായി 16 കേസുകള്‍ പോലീസ് രജിസ്റ്റര്‍ ചെയ്തു. അക്രമസംഭവങ്ങളുമായി ബന്ധപ്പെട്ട് 300 പേരെ പോലീസ് കസ്റ്റഡിയിലെടുത്തു. സംസ്ഥാന റോഡ് ട്രാന്‍സ്‌പോര്‍ട്ട് കമ്മീഷന്റെ 200 ബസ്സുകള്‍ ബന്ദനുകൂലികള്‍ തകര്‍ത്തിരുന്നു. കോലാപ്പൂരില്‍ 13 ബസ്സുകള്‍ തകര്‍ത്തിരുന്നു. ഇവിടെ ഇന്റര്‍നെറ്റ് സൗകര്യം തടഞ്ഞിട്ടുണ്ട്. പര്‍ബാനി ജില്ലയില്‍ ആര്‍എസ്എസ്സിന്റെ കാര്യാലയത്തിന് നേരെ ആക്രമണമുണ്ടായി. ആര്‍എസ്എസ് വിരുദ്ധമുദ്രാവാക്യങ്ങളും ഇവര്‍ മുഴക്കിയിരുന്നു.

പിന്നില്‍ ഇന്ത്യയെ ശിഥിലമാക്കാന്‍ ലക്ഷ്യമിട്ടുള്ള സംഘടനകള്‍: മന്‍മോഹന്‍ വൈദ്യ

ഉജ്ജയിന്‍: മഹാരാഷ്‌ട്രയിലെ കലാപങ്ങള്‍ക്ക് പിന്നില്‍ ഇന്ത്യയെ ശിഥിലമാക്കാന്‍ ലക്ഷ്യമിട്ടുള്ള സംഘടനകളാണെന്ന് ആര്‍എസ്എസ് വ്യക്തമാക്കി. ‘ബ്രേക്കിങ് ഇന്ത്യ ബ്രിഗേഡ്’ എന്ന് വിളിക്കപ്പെടുന്ന ഈ ശക്തികള്‍ മതത്തിന്റെയും ജാതിയുടെയും പേരില്‍ രാജ്യത്തെ വിഭജിക്കുവാനാണ് ശ്രമിക്കുന്നതെന്നും ആര്‍എസ്എസ് വക്താവ് മന്‍മോഹന്‍ വൈദ്യ പറഞ്ഞു.

2016ല്‍ ജെഎന്‍യുവില്‍ ദേശവിരുദ്ധ മുദ്രാവാക്യങ്ങള്‍ മുഴക്കിയ അതേ ശക്തികള്‍ തന്നെയാണ് ഹിന്ദു സമൂഹത്തെ വിഭജിക്കുവാന്‍ ശ്രമിക്കുന്നത്. ആര്‍എസ്എസ് ഇതനുവദിക്കില്ലെന്നും വൈദ്യ വ്യക്തമാക്കി. സമൂഹത്തിലെ എല്ലാവിഭാഗത്തിലുള്ളവരെയും ഒന്നിപ്പിക്കുവാനാണ് ആര്‍എസ്എസ് ശ്രമിക്കുന്നത്. രാഷ്‌ട്രീയ നേട്ടത്തിനായുള്ള ഇത്തരം നീക്കങ്ങളെക്കുറിച്ച് അമേരിക്കയിലെ ഇന്ത്യന്‍ വംശജനായ രാജീവ് മല്‍ഹോത്രയുടെ ‘ബ്രേക്കിങ് ഇന്ത്യ’ എന്ന പുസ്തകത്തില്‍ വ്യക്തമാക്കുന്നുണ്ട്. രാഷ്‌ട്രീയം ലക്ഷ്യംവച്ചുള്ള ബ്രേക്കിങ് ഇന്ത്യ ബ്രിഗേഡുകളുടെ നീക്കങ്ങള്‍ അനുവദിക്കില്ലെന്നും അദ്ദേഹം പറഞ്ഞു.

സര്‍സംഘചാലക് മോഹന്‍ ഭാഗവതിന്റെ അധ്യക്ഷതയില്‍ ചേര്‍ന്ന രണ്ടുദിവസത്തെ യോഗത്തില്‍ സ്ഥിതിഗതികള്‍ ചര്‍ച്ചചെയ്തതായും അദ്ദേഹം പറഞ്ഞു.