നോയിഡ: പ്രധാനമന്ത്രി നരേന്ദ്ര മോദിയുടെ വാഹനവ്യൂഹത്തിനു വഴിതെറ്റിയ സംഭവവുമായി ബന്ധപ്പെട്ട് രണ്ടു പോലീസുകാര്‍ക്കു സസ്‌പെന്‍ഷന്‍. ക്രിസ്മസ് ദിനത്തില്‍ ദല്‍ഹി മെട്രോയുടെ മജന്ത ലൈന്‍ ഉദ്ഘാടനത്തിന് എത്തിയപ്പോഴാണ് പ്രധാനമന്ത്രിയുടെ വാഹനവ്യൂഹനത്തിനു വഴിതെറ്റിയത്. ഇത് വന്‍ സുരക്ഷാ വീഴ്ചയായി വിലയിരുത്തുകയും ചെയ്തു.
ഇതേതുടര്‍ന്നാണ് സംഭവത്തില്‍ അന്വേഷണം നടത്തി പോലീസ് നേതൃത്വം രണ്ട് ഉദ്യോഗസ്ഥര്‍ക്കെതിരേ നടപടിയെടുത്തത്. പ്രധാനമന്ത്രിയുടെ വാഹനവ്യൂഹത്തെ നയിച്ച നോയിഡ പോലീസിലെ ഉദ്യോഗസ്ഥര്‍ക്കെതിരേയാണു നടപടി. വാഹനവ്യൂഹത്തിലെ ആദ്യ വാഹനം ഓടിച്ചിരുന്നത് ഇവരായിരുന്നു.
നോയിഡയിലെ മഹാമയ ഫ്‌ളൈഓവറിനടുത്തുനിന്ന് ഇവര്‍ തെറ്റായ വഴിയിലൂടെ നീങ്ങിയതിനെ തുടര്‍ന്നാണ് പ്രധാനമന്ത്രിയുടെ വാഹനവ്യൂഹത്തിനു പൂര്‍ണമായി വഴിതെറ്റിയ സാഹചര്യമുണ്ടായത്. ഇതേതുടര്‍ന്ന് വാഹനവ്യൂഹം കടന്നു പോകുന്ന വഴിയിലൂടെ പ്രധാനമന്ത്രിക്ക് ട്രാഫിക് ഉദ്യോഗസ്ഥര്‍ വഴിയൊരുക്കുകയായിരുന്നു. സംഭവത്തില്‍ മുഖ്യമന്ത്രി യോഗി ആദിത്യനാഥ് ഡിജിപിയോടു കര്‍ശന നടപടി ആവശ്യപ്പെട്ടിരുന്നു.
