തളിപ്പറമ്പ്: തളിപ്പറമ്പ് കണികുന്ന് സോമേശ്വരത്തെ മാധവന് ഗുരുസ്വാമിയെ നാട് ആദരിക്കുന്നു.52 വര്ഷമായി ശബരിമല ദര്ശനം നടത്തുന്നു. മിക്കവാറും വര്ഷങ്ങളില് കരിമല ചവുട്ടി മകരവിളക്ക് ദര്ശിക്കും. മാധവന് ഗുരുസ്വാമിക്കിത് ആയിരം പൂര്ണചന്ദ്രന്മാരെ ദര്ശിച്ച് 84 വയസു പിന്നിടുന്ന വേളകൂടിയാണ്. സ്വാമിമാര്ക്ക് മാലയിട്ടും കെട്ടുമുറുക്കികൊടുത്തും ശരണം വിളികളാല് മുഖരിതമാകുന്ന ജീവിതം. അയ്യപ്പ ഭക്തിയിലലിഞ്ഞു ചേര്ന്നുള്ള ജീവിതത്തിനിടെ നൂറുകണക്കിന് സ്വാമിമാരെ മലചവിട്ടിച്ചു. ഓരോ വര്ഷവും മണ്ഡലമകരവിളക്കു കാലത്ത് 500 ലേറെ സ്വാമിമാര്ക്ക് മാലയിട്ടു കെട്ടു നിറച്ച് കൊടുക്കും. തളിപ്പറമ്പ് അരവത്തു ക്ഷേത്രം, തൃച്ചംബരം അയ്യപ്പക്ഷേത്രം, പാലക്കുളങ്ങര ധര്മശാസ്താ ക്ഷേത്രം തുടങ്ങിയ ക്ഷേത്രങ്ങളില് കെട്ടുനിറക്കാനെത്തുന്നു.
നാലു പതിറ്റാണ്ടോളം തയ്യല്തൊഴിലാളിയായിരുന്നു. സോമേശ്വരത്തെ സുനിതാനിവാസിലാണ് താമസം. ഭാര്യ: പി.ശാന്ത. മക്കള്: വിനോദ്കുമാര്, സുനിത, സുനന്ദ. മാധവന് ഗുരുസ്വാമിയുടെ ശിഷ്യന്മാര് ചേര്ന്ന് രൂപവത്കരിച്ച സ്നേഹാദരകമ്മിറ്റിയാണ് ആദരം നല്കുന്നത്. ഞായറാഴ്ച തളിപ്പറമ്പ് രാജരാജേശ്വര ക്ഷേത്ര സ്റ്റേജില് നടക്കുന്ന ചടങ്ങ് രാവിലെ 10.30ന് മന്ത്രി രാമചന്ദ്രന് കടന്നപ്പള്ളി ഉദ്ഘാടനം ചെയ്യും. രാജരാജേശ്വര ക്ഷേത്രം തന്ത്രി ഇ.പി.കുബേരന് നമ്പൂതിരി അനുഗ്രഹപ്രഭാഷണം നടത്തും. ഡോ.ആര്.സി.കരിപ്പത്ത് ഉപഹാരം സമ്മാനിക്കും. ടിടികെ ദേവസ്വം പ്രസിഡന്റ് കെ.കെ.മഹേശ്വരന്നമ്പൂതിരി പൊന്നാട അണിയിക്കും. ടിടികെ ദേവസ്വം എക്സിക്യൂട്ടിവ് ഓഫീസര് എം.നാരായണന്നമ്പൂതിരി, രാജരാജേശ്വരക്ഷേത്രം നവീകരണ കമ്മിറ്റി സെക്രട്ടറി ടി.സി.രമേശന്, ആഘോഷകമ്മിറ്റി സെക്രട്ടറി പി.രാമചന്ദ്രന് മാസ്റ്റര് എന്നിവര് സംസാരിക്കും. സ്നേഹാദരകമ്മിറ്റി ചെയര്മാന് ഇ.വി.ജയകൃഷ്ണന്, കണ്വീനര് രാഹുല് ദാമോദരന്, രാജീവന്, കെ.സന്തോഷ്കുമാര് എന്നിവര് പത്രസമ്മേളനത്തില് പങ്കെടുത്തു
