കൊച്ചി:എം സി റോഡിലെ കാലടി ശ്രീശങ്കര പാലത്തില് അടിയന്തര അറ്റകുറ്റപ്പണികള് നടക്കുന്ന സാഹചര്യത്തില് രാത്രി 10 മുതല് പുലര്ച്ചെ 6 മണി വരെ യാത്രാ നിയന്ത്രണം. ജൂലായ് 23, 24, 25 എന്നീ തീയതികളില് പാലത്തിലൂടെ ഗതാഗതം പൂര്ണമായും നിരോധിച്ചു.
അങ്കമാലി ഭാഗത്ത് നിന്നുള്ള വാഹനങ്ങള് അങ്കമാലിയില് നിന്നും എംസി റോഡ് വഴി പോകേണ്ടതാണ്. കെഎസ്ആര്ടിസി ബസുകള് ഉള്പ്പെടെ എല്ലാ വാഹനങ്ങളും ആലുവ വഴി പെരുമ്പാവൂര് എത്തി യാത്ര തുടരണം.പെരുമ്പാവൂരില് നിന്നും അങ്കമാലി ഭാഗത്തേക്കുളള വാഹനങ്ങളും ഇതേ പാതയിലൂടെ പോകണം.അങ്കമാലി ഭാഗത്ത് നിന്നും കോതമംഗലം ഭാഗത്തേക്കുളള വാഹനങ്ങള് മലയാറ്റൂര് കോടനാട് പാലത്തിലൂടെ കുറുപ്പംപടി വഴി പോകണം.
മൂവാറ്റുപുഴ-പെരുമ്പാവൂര് ഭാഗത്തു നിന്നും അന്താരാഷ്ട്ര വിമാനത്താവളത്തിലേക്ക് പോകുന്ന ചെറുവാഹനങ്ങള് വല്ലം ജംഗ്ഷനില് നിന്നും ഇടത്തോട്ട് തിരിഞ്ഞ് വല്ലം പാറക്കടവ്-ശ്രീമൂലനഗരം-കാഞ്ഞൂര് വഴി എയര്പോര്ട്ടിലേക്ക് പ്രവേശിക്കേണ്ടതാണ്.
