തിരുവനന്തപുരം: പ്രതികളെ കൈവിലങ്ങ് അണിയിക്കുന്നതു സംബന്ധിച്ച് കര്ശന മാര്ഗനിര്ദേശങ്ങളുമായി സംസ്ഥാന പോലീസ് മേധാവിയുടെ സര്ക്കുലര്. പ്രതികളെ ശിക്ഷിക്കാനോ ഭീഷണിപ്പെടുത്താനോ അപമാനിക്കാനോ ഉള്ള മാര്ഗമായി കൈവിലങ്ങ് ഉപയോഗിക്കരുതെന്നതാണ് ഡി.ജി.പി റവാഡ ചന്ദ്രശേഖര് പുറത്തിറക്കിയ സര്ക്കുലറിലെ അന്തസത്ത. 13 പ്രത്യേക വിഭാഗങ്ങളിലെ കുറ്റവാളികള്ക്ക് ഒഴികെ മറ്റുള്ളവരെ കൈവിലങ്ങ് ധരിപ്പിക്കുന്നതു വിലക്കി.
13 പ്രത്യേക വിഭാഗങ്ങള് ഇവയാണ് : സ്ഥിരം കുറ്റവാളികള്, കസ്റ്റഡിയില്നിന്ന് ചാടിപ്പോയ ചരിത്രമുള്ളവര്, സംഘടിത കുറ്റകൃത്യങ്ങളില് ഏര്പ്പെട്ടവര്, ഭീകരവാദ പ്രവര്ത്തനങ്ങളില് പങ്കാളികളായവര്, മയക്കുമരുന്നുമായി ബന്ധപ്പെട്ട കേസുകളിലെ പ്രതികള്, അനധികൃതമായി ആയുധങ്ങളും വെടിമരുന്നുകളും കൈവശം വച്ചവര്, കൊലപാതകക്കേസിലെ പ്രതികള്, ബലാത്സംഗക്കേസ് പ്രതികള്, ആസിഡ് ആക്രമണം നടത്തിയവര്, വ്യാജനോട്ട്, നാണയ നിര്മാണം നടത്തുന്നവര്, മനുഷ്യക്കടത്തുമായി ബന്ധപ്പെട്ട കേസുകളിലെ പ്രതികള്, കുട്ടികള്ക്കെതിരായ ലൈംഗിക കുറ്റകൃത്യങ്ങള് ചെയ്തവര്, രാജ്യത്തിനെതിരായ കുറ്റകൃത്യങ്ങളില് ഏര്പ്പെട്ടവര്.
കൈവിലങ്ങ് ഉപയോഗിക്കുന്നതിന് മുന്പ് കുറ്റകൃത്യത്തിന്റെ ഗൗരവം, പ്രതിയുടെ മുന്കാല പെരുമാറ്റം, രക്ഷപ്പെടാനുള്ള സാധ്യത, അക്രമസ്വഭാവം എന്നിവ വിലയിരുത്തണം. കൈവിലങ്ങ് അണിയിക്കാനുള്ള കാരണം സ്റ്റേഷനിലെ ജനറല് ഡയറിയിലും രജിസ്റ്ററില് വ്യക്തമായി രേഖപ്പെടുത്തുകയും ഇത് കോടതിയുടെ ശ്രദ്ധയില്പ്പെടുത്തുകയും വേണം. പ്രതികളെ കൈവിലങ്ങണിയിച്ച് പരേഡ് ചെയ്യിക്കാനോ മാധ്യമങ്ങള്ക്കും പൊതുജനങ്ങള്ക്കും മുന്നില് പ്രദര്ശിപ്പിക്കാനോ പാടില്ല എന്നീ നിര്ദേശങ്ങളും സര്ക്കുലറിലുണ്ട്.
