ന്യൂദല്‍ഹി: അന്തരീക്ഷ മലിനീകരണം നിയന്ത്രിക്കുവാന്‍ ദല്‍ഹി സര്‍ക്കാര്‍ നടപടികൾ സ്വീകരിക്കാത്തതിനെ രൂക്ഷമായി വിമർശിച്ച് ബിജെപി. മലിനീകരണം നിയന്ത്രിക്കുന്നതിന് സര്‍ക്കാര്‍ ഗൗരവമായ നടപടികള്‍ സ്വീകരിക്കുന്നില്ലെന്നും ബിജെപി വക്താവ് നുപൂര്‍ ശര്‍മ കുറ്റപ്പെടുത്തി.
ദേശീയ ഹരിത ട്രൈബ്യൂണലിന്റെ കടുംപിടുത്തത്തെ തുടര്‍ന്നു ഗതാഗത നിയന്ത്രണം ഏര്‍പ്പെടുത്താനുള്ള നീക്കത്തില്‍നിന്നു സര്‍ക്കാര്‍ പിന്‍മാറിയ നടപടി ശരിയല്ല. പ്രശ്ന പരിഹാരത്തിനായി ദേശീയ ഹരിത ട്രൈബ്യൂണല്‍ നൂറോളം പ്രതിവിധികള്‍ നിര്‍ദേശിച്ചിരുന്നു. എന്നാല്‍ ഇതു നടപ്പാക്കാന്‍ സര്‍ക്കാര്‍ തയാറാകുന്നില്ല- നുപൂര്‍ ശര്‍മ പറഞ്ഞു.
ഒറ്റയക്ക-ഇരട്ടയക്ക വാഹനനിയന്ത്രണത്തില്‍നിന്ന് ഒരു വാഹനങ്ങളെയും ഒഴിവാക്കാനാവില്ലെന്നു ഹരിത ട്രൈബ്യൂണല്‍ നിലപാട് അറിയിച്ചതിനു പിന്നാലെയാണ് സര്‍ക്കാര്‍ നീക്കത്തില്‍നിന്നു പിന്‍മാറിയത്. നിബന്ധനകള്‍ക്കു വിധേയമായി ഈ മാസം 13 മുതല്‍ 17 വരെ പദ്ധതി നടപ്പാക്കാന്‍ ഹരിത ട്രൈബ്യൂണല്‍ അനുമതി നല്‍കിയിരുന്നു.
