വന്‍ ഇളവുകള്‍

ന്യൂദല്‍ഹി: ചരക്ക് സേവന നികുതിയില്‍ വന്‍ ഇളവുകളുമായി ജിഎസ്ടി കൗണ്‍സില്‍. ഹോട്ടലുകളില്‍ നിരക്ക് ഏകീകരിക്കാനും 211 ഉത്പന്നങ്ങളുടെ നികുതി കുറയ്‌ക്കാനും ജിഎസ്ടി കൗണ്‍സില്‍ യോഗം തീരുമാനിച്ചു. എസി, നോണ്‍ എസി റസ്‌റ്റോറന്റുകളില്‍ ഇനി അഞ്ച് ശതമാനം മാത്രമാകും നികുതി. നേരത്തെ എസിയില്‍ 18 ശതമാനവും നോണ്‍ എസിയില്‍ 12 ശതമാനവുമായിരുന്നു നികുതി.

പഞ്ചനക്ഷത്ര ഹോട്ടലുകളിലൊഴികെ ഭക്ഷണത്തിന് വന്‍തോതില്‍ വില കുറയാന്‍ ഇടയാക്കുന്ന സുപ്രധാന തീരുമാനമാണിത്. നേരത്തെ ജിഎസ്ടിയുടെ മറവില്‍ ഹോട്ടലുകള്‍ കൊള്ളലാഭം കൊയ്യുന്നതായി പരാതി ഉയര്‍ന്നിരുന്നു. നികുതി വലിയ തോതില്‍ കുറഞ്ഞതും ഏകീകരിച്ചതും ഹോട്ടലുകളിലെ ‘പിടിച്ചുപറി’ അവസാനിപ്പിക്കും.

ഇന്നലെ ഗുവാഹത്തിയില്‍ ചേര്‍ന്ന യോഗത്തില്‍ കേന്ദ്ര ധനമന്ത്രി അരുണ്‍ ജയ്റ്റ്‌ലി അധ്യക്ഷത വഹിച്ചു. ഈ മാസം 15 മുതല്‍ നിരക്കുകള്‍ നിലവില്‍ വരുമെന്ന് ജയ്റ്റ്‌ലി അറിയിച്ചു. പഞ്ചനക്ഷത്ര ഹോട്ടലുകളില്‍ 28 ശതമാനവും ഔട്ട്‌ഡോര്‍ കാറ്ററിങ്ങിന് 18 ശതമാനവും നികുതി തുടരും. 7,500 രൂപയില്‍ കൂടുതല്‍ വാടക ഈടാക്കുന്ന മുറികളുള്ള ഹോട്ടലുകളെ പഞ്ചനക്ഷത്ര ഹോട്ടലുകളായി കണക്കാക്കും.

നിത്യോപയോഗ സാധനങ്ങളുള്‍പ്പെടെ 211 ഉത്പന്നങ്ങളുടെ നികുതിയാണ് കുറച്ചത്. ഏറ്റവും ഉയര്‍ന്ന സ്ലാബ് നികുതിയായ 28 ശതമാനം ചുമത്തിയിരുന്ന 178 ഉത്പന്നങ്ങള്‍ക്ക് 18 ശതമാനമാക്കി കുറച്ചു. അമ്പത് ഉത്പന്നങ്ങള്‍ക്ക് മാത്രമാകും ഇനി 28 ശതമാനം നികുതി ഈടാക്കുക. ഇതില്‍ ഏറെയും ആരോഗ്യത്തിന് ഹാനികരമായതും ആഡംബര ഉത്പന്നങ്ങളുമാണ്.

ഉയര്‍ന്ന നികുതി 62 ഉത്പന്നങ്ങള്‍ക്ക് മാത്രമായി പരിമിതപ്പെടുത്തണമെന്ന് ഫിറ്റ്‌മെന്റ് കമ്മിറ്റി ശുപാര്‍ശ ചെയ്തിരുന്നു. കൗണ്‍സില്‍ യോഗം ഇത് അമ്പതായി കുറച്ചു. 13 എണ്ണത്തിന്റെ നികുതി 18 ശതമാനത്തില്‍നിന്ന് 12 ശതമാനമായും ആറ് എണ്ണത്തിന്റെത് 18 ശതമാനത്തില്‍നിന്ന് അഞ്ച് ശതമാനമായും എട്ട് എണ്ണത്തിന്റെത് 12 ശതമാനത്തില്‍നിന്ന് അഞ്ച് ശതമാനമായും കുറച്ചു. അഞ്ച് ശതമാനമായിരുന്ന ആറെണ്ണത്തിന്റെ നികുതി ഒഴിവാക്കി. ഇതോടെ വിലക്കയറ്റത്തില്‍ കാര്യമായ കുറവുണ്ടാകും. സര്‍ക്കാരിന് 20,000 കോടി രൂപയുടെ വരുമാന നഷ്ടമുണ്ടാക്കുന്നതാണ് തീരുമാനമെന്ന് ബിഹാര്‍ ഉപമുഖ്യമന്ത്രിയും കൗണ്‍സില്‍ അംഗവുമായ സുശീല്‍ കുമാര്‍ മോദി പറഞ്ഞു.

മാര്‍ബിള്‍, ഗ്രാനൈറ്റ്, ച്യൂയിംഗം, ഷേവിങ് ക്രീം, ഷൂ പോളിഷ്, ഡിറ്റര്‍ജന്റ്, ഷാംപൂ, ചോക്ലേറ്റ്, സൗന്ദര്യവര്‍ധക വസ്തുക്കള്‍ എന്നിവക്ക് നികുതി കുറയും. പാന്‍മസാല, സിഗരറ്റ്, പെയിന്റ്, സിമന്റ്, വാഷിങ് മെഷീന്‍, എസി, എന്നിവ 28 ശതമാനത്തില്‍ തുടരും. മദ്യം, റിയല്‍ എസ്റ്റേറ്റ്, വൈദ്യുതി, പെട്രോളിയം തുടങ്ങിയവ ജിഎസ്ടി സമ്പ്രദായത്തില്‍ ഉള്‍പ്പെടുത്തിയിട്ടില്ല.