അടിമാലി: ഇടിഞ്ഞ് വീണ കല്ലും മണ്ണും നീക്കം ചെയ്തില്ല, അപകടക്കെണിയായി സംസ്ഥാന പാത. ജില്ലാ ആസ്ഥാനത്തേയ്ക്കുള്ള കല്ലാര്കൂട്ടി ചെറുതോണി റോഡാണ് മഴ ശക്തമായതോടെ പറക്കല്ലുകള് ഇടിഞ്ഞ് വീണ് അപകടക്കെണിയായി മാറിയിരിക്കുന്നത്.
ഇടുക്കി ജില്ലയില് ഏറ്റവും കൂടുതല് തിരക്കേറിയ റോഡുകളില് ഒന്നാണ് ജില്ലാ ആസ്ഥാനത്തേയ്ക്ക് കൂടി എത്തുന്ന കല്ലാര്കുട്ടി ചെറുതോണി റോഡ്. മലയോരത്തുകൂടി നിര്മ്മിച്ചിരിക്കുന്ന റോഡിന്റെ ഒരു വശം നൂറ് കണക്കിന് അടി ഉയരമുള്ള പാറ കെട്ടുകളും മറുവശം അതിലേറെ താഴ്ച്ചയുള്ള കൊക്കയുമാണ്. വീതി കുറഞ്ഞ റോഡിലേക്ക് പതിച്ചിരിക്കുന്ന കല്ലുകള് നീക്കം ചെയ്യുന്നതിനും നടപടിയില്ല.
അതു കൊണ്ട് തന്നെ ഇന ഭാഗത്ത് കൂടി ഒരു വാഹനത്തിന് മാത്രമാണ് കടന്നു പോകുവാന് കഴിയുന്നത്. തിരക്കേറിയ സമയങ്ങളില് ഈ ഭാഗങ്ങളില് ഗതാഗത കുരുക്കും രൂക്ഷമാണ്.
മഴക്കാലമായാല് ജീവന് ഭയന്നാണ് ഇതുവഴി വാഹനങ്ങള് കടന്നു പോകുന്നതെന്ന് ഓട്ടോ തൊഴിലാളികള് പറയുന്നു. നിലവില് ഇടിഞ്ഞ് വീണിരിക്കുന്ന കല്ലും മണ്ണും നീക്കം ചെയ്യുന്നതിനും. റോഡ് സുരക്ഷ ഉറപ്പുവരുത്തുന്നതിനും അടിയന്തിര നടപടി സ്വീകരിച്ചില്ലെങ്കില് വലിയ അപകടങ്ങള്ക്കും സാധ്യതയേറയാണ്.
