അമുക്കുരം

ശാസ്ത്രീയ നാമം:

വിത്താസിയ സോമ്‌നിഫെറാ

സംസ്‌കൃതം: അശ്വഗന്ധാ

തമിഴ്: അമുക്കുരക്കിഴങ്ങ്

എവിടെക്കാണാം: ഈ ചെടി കേരളത്തില്‍ സ്വാഭാവികമായി വളരുന്നവയല്ല. പിന്നെ എന്തിന് വീട്ടുമുറ്റത്തെ ഔഷധ സസ്യങ്ങള്‍ എന്ന പംക്തിയില്‍ ചേര്‍ത്തു എന്ന് ചോദിച്ചാല്‍ നമ്മുടെ വീട്ടുമുറ്റത്ത് ഗ്രോബാഗുകളിലോ ചട്ടിയിലോ നട്ടാല്‍ വളരുകയും വളരെ പ്രയോജനമുള്ളതുമാകയാല്‍ ഈ പംക്തിയില്‍ ചേര്‍ക്കുന്നൂ. കര്‍ണ്ണാടകത്തില്‍ ഇതു കൃഷി ചെയ്തു വരുന്നുണ്ട്. ജമ്മു-കാശ്മീര്‍, പഞ്ചാബ,് മഹാരാഷ്‌ട്ര എന്നിവിടങ്ങളില്‍ വന്യമായി ഈ കുറ്റിച്ചെടി കണ്ടുവരുന്നു. ഇതിന്റെ കിഴങ്ങ് (വേര്) ആണ് ഔഷധത്തിനായി ഉപയോഗിക്കുന്നത്.

ചില ഔഷധപ്രയോഗങ്ങള്‍:

1) അമുക്കുരം ശക്തിയേറിയ വാജീകരണ ഔഷധമാണ് (വാജീകരണമെന്നാല്‍ പുരുഷലൈംഗികശക്തി വര്‍ദ്ധിപ്പിക്കുന്ന പ്രയോഗമെന്നര്‍ത്ഥം). അമുക്കുരം പാലില്‍ പുഴുങ്ങി ഉണക്കി പൊടിച്ച് 5 ഗ്രാം പൊടി 50 മില്ലി പാലില്‍ ദിവസം രാവിലെയും അത്താഴശേഷവും സേവിക്കുന്നത് ശരീരബലം വര്‍ദ്ധിപ്പിക്കുന്നതും നാഡിക്ഷയത്തെ ഇല്ലാതാക്കുകയും ഉറക്കം പ്രദാനം ചെയ്യുന്നതുമാണ്. കൂടാതെ ശുക്ലം വര്‍ദ്ധിപ്പിക്കുകയും ചെയ്യും.

2) അമുക്കുരം 2 ഗ്രാം ഉങ്ങിന്‍ തൊലി 2ഗ്രാം ഇവ പൊടിച്ച് പാലില്‍ സേവിച്ചാല്‍ തേള്‍ വിഷം ശമിക്കും.

3) അമുക്കുരം പാലില്‍ പുഴുങ്ങി ഉണക്കി പൊടിച്ചത് 10 ഗ്രാം, നായ്‌ക്കരുണപ്പരിപ്പ് പാലില്‍ പുഴുങ്ങി ഉണക്കിപ്പൊടിച്ചത് 10ഗ്രാം, ചെറുപയര്‍ മുളപ്പിച്ചത് 10 ഗ്രാം, പഴുത്ത തേങ്ങ ചിരകിയത് 10ഗ്രാം, മാതളപ്പഴത്തിന്റെ അല്ലി (ഉറുമാമ്പഴം) 10ഗ്രാം, ജീരകം 2ഗ്രാം ഇവ ഇളക്കി യോജിപ്പിച്ച് 5മില്ലി നെയ്യും ചേര്‍ത്ത് ദിവസം രണ്ടുനേരം എന്ന കണക്കില്‍ രണ്ടുമാസം സേവിച്ചാല്‍ പുരുഷ വന്ധ്യതയ്‌ക്ക് പ്രത്യേകിച്ച് ശുക്ലത്തില്‍ അണുക്കളുടെ കുറവ്, അണുക്കളുടെ ചലന ശക്തിക്കുറവ് ഇവയ്‌ക്ക് ശാശ്വത പരിഹാരമാകും.

4) മൂര്‍ഖന്‍ കടിച്ചാല്‍ ഉടനെ അമുക്കുരം പച്ച പശുവിന്‍ പാലില്‍ (5ഗ്രാം) അരച്ചുകുടിച്ചാല്‍ വിഷത്തിന്റെ ശക്തി ക്ഷയിക്കും.

5) മൂര്‍ഖന്‍ കടിച്ചാല്‍ ശരീരത്തില്‍ അസഹ്യമായ വേദന അനുഭവപ്പെടും. അപ്പോള്‍ അമുക്കുരം പച്ചപ്പാലില്‍ (പശുവിന്റെ) അരച്ച് ദേഹമാസകലം 20മിനിട്ട് വിട്ട് തേയ്‌ക്കുക. വേദന ശമിച്ച് വിഷവേഗം കുറയ്‌ക്കും.