കുമാരനല്ലൂര്: കുമാരനല്ലൂര് ദേവീക്ഷേത്രത്തിലെ നവരാത്രി ആഘോഷങ്ങള്19ന് ദേവീഭാഗവത നവാഹയജ്ഞത്തോടെ ആരംഭിക്കും. ഭാഗവതരത്നം വേങ്ങക്കാട്ട് കൃഷ്ണന് നമ്പൂതിരി യജ്ഞാചാര്യനായിരിക്കും. 21ന് മഹാഗണപതി ഹോമത്തോടെ നവരാത്രി തുടങ്ങും. ദിവസവും തന്ത്രി കടയിക്കോല് കൃഷ്ണന് നമ്പൂതിരിയുടെ നേതൃത്വത്തില് പന്തീരായിരം പുഷ്പാഞ്ജലി, കാഴ്ചശ്രീബലി, ഋഗ്വേദമുറജപം എന്നിവനടക്കും.
നവരാത്രി സംഗീതോത്സവത്തിന്റെ രജതജൂബിലി ആഘോഷങ്ങള് 21ന് വൈകിട്ട് 6ന് നാദസ്വര ചക്രവര്ത്തി തിരുവിഴ ജയശങ്കര് ഉദ്ഘാടനം ചെയ്യും. തുടര്ന്ന് സംഗീത സംവിധായകന് ജയ്സണ് ജെ നായര് സംഗീതക്കച്ചേരി നടത്തും. താമരക്കാട്ട് കൃഷ്ണന് നമ്പൂതിരി, തകഴി കൃഷ്ണകുമാര്, വിനയചന്ദ്രന്, ആരതി എസ് നായര്, സ്മിത പിഷാരടി, വിഷ്ണുശേഖര്, കുമാരി വൃന്ദാഹരി തുടങ്ങിയവര് ഓരോ ദിവസവും സംഗീതകച്ചേരി അവതരിപ്പിക്കും. മഹാനവമി ദിവസം രാവിലെ മുതല് സംഗീതാരാധനയ്ക്ക് സൗകര്യം ഉണ്ടായിരിക്കും. സംഗീതക്കച്ചേരി നടത്തുവാന് ആഗ്രഹിക്കുന്നവര് 9447127475 എന്ന നമ്പറില് ബന്ധപ്പെടണം. വിദ്യാരംഭം 30ന് രാവിലെ ആരംഭിക്കും. വിദ്യാരംഭം മുന്കൂട്ടി രജിസ്റ്റര് ചെയ്യുന്നതിന് 0481-2312737 എന്ന നമ്പറില് ബന്ധപ്പെടണം.
