ഇരിട്ടി: നന്മ എഡ്യുക്കേഷണല് ആന്റ് ചാരിറ്റബിള് സൊസൈറ്റിയുടെ നേതൃത്വത്തില് ഓണക്കൂട്ടായ്മയും കുടുംബസംഗമവും മുട്ടന്നൂര് കോണ്കോഡ് കോളേജ് എന്എസ്എസ് അംഗങ്ങളുടെ സന്നദ്ധ പ്രവര്ത്തനവും കടത്തുംകടവ് ചക്കരക്കുട്ടന് ബാലസദനത്തില് നടന്നു. കോണ്കോഡ് കോളേജും നന്മ ചാരിറ്റബിള് സൊസൈറ്റിയും സംയുക്തമായി അയ്യങ്കുന്ന് പഞ്ചായത്തിലെ നിര്ദ്ധനരായ മുടിക്കയത്തെ സ്റ്റെനിന്, സ്റ്റെഫിന് എന്നീ ഇരട്ട സഹോദരന്മാര്ക്ക് നിര്മ്മിച്ച് നല്കുന്ന സൗജന്യ ഭവനനിര്മ്മാണത്തിന്റെ പ്രഖ്യാപനവും ഇവിടെ നടന്ന ചടങ്ങില് അഡ്വ.സണ്ണി ജോസഫ് എംഎല്എ നിര്വഹിച്ചു. മേഖലയിലെ ഏറ്റവും പ്രായം ചെന്ന തയ്യല് തൊഴിലാളി തന്തോടിലെ ചന്തുക്കുട്ടി മേസ്ത്രിയെ ജില്ലാ പഞ്ചായത്ത് പ്രസിഡന്റ് കെ.വി.സുമേഷ് ആദരിച്ചു. ബാലസദനത്തിലെ കുട്ടികള്ക്ക് നന്മ നല്കുന്ന ഓണക്കോടികളുടെ വിതരണവും കെ.വി.സുമേഷ് നിര്വ്വഹിച്ചു. കോണ്കോഡ് കോളേജ് എന്എസ്എസ് വളണ്ടിയര്മാര് ചക്കരക്കുട്ടന് ബാലസദനം പരിസരത്തു ഒരുക്കുന്ന വിഷരഹിത പച്ചക്കറിത്തോട്ടത്തിന്റെ ഉദ്ഘാടനം പായം പഞ്ചായത്ത് പ്രസിഡന്റ് എന്.അശോകനും നന്മയുടെ അംഗത്വ വിതരണോദ്ഘാടനം തളിപ്പറമ്പ് ഡിവൈഎസ്പി കെ.വി.വേണുഗോപാലും വിവിധ പ്രതിഭകള്ക്കുള്ള ഉപഹാര സമര്പ്പണം ജില്ലാ പഞ്ചായത്ത് മെമ്പര് തോമസ് വര്ഗ്ഗീസും നിര്വഹിച്ചു. ഇരിട്ടി എംജി കോളേജ് അസോ. പ്രൊഫസര് ഡോ.കെ.വി.ദേവദാസ് ചടങ്ങില് വെച്ച് ആദ്യ മെമ്പര്ഷിപ്പ് സ്വീകരിച്ചു. നന്മ ഡയറക്ടര് പടിയൂര് ബാലന് മാസ്റ്റര് ചടങ്ങില് അദ്ധ്യക്ഷത വഹിച്ചു. സന്തോഷ് കോയിറ്റി റിപ്പോര്ട്ടും പദ്ധതി വിശദീകരണം പി.ധനേഷും അവതരിപ്പിച്ചു. ബ്ലോക്ക് പഞ്ചായത്ത് മെമ്പര് കെ.മോഹനന്, പായം ഗ്രാമ പഞ്ചായത്ത് മെമ്പര് വി.ഷീബ, എം.ഒ.ജോര്ജ്ജ് മാസ്റ്റര്, പി.കെ.മാത്യു, പ്രൊ.സാജു ജോസ് തുടങ്ങിയവര് പ്രസംഗിച്ചു. പി. ഹരീന്ദ്രന് സ്വാഗതവും വി.കെ.സുധീഷ് നന്ദിയും പറഞ്ഞു. തുടര്ന്ന് ഓണസദ്യയും വിവിധ കലാ പരിപാടികളും അരങ്ങേറി.
